00:00:00 IGIHE NETWORK KN KINYARWANDA EN ENGLISH FR FRANCAIS

Impungenge ku hazaza h’abakoresha Internet kuri uyu munsi Mpuzamahanga wa Password

Yanditswe na Umwali Zhuri
Kuya 5 May 2022 saa 11:20
Yasuwe :

Ku nshuro ya cyenda, kuri uyu wa Kane tariki 5 Gicurasi 2022, Isi yizihije Umunsi Mpuzamahanga wahariwe ‘ijambo cyangwa umubare w’ibanga’ (Password).

Ni umunsi ukomeye mu gihe Isi igeze kure yinjizwa mu buryo bw’ikoranabuhanga aho amabanga n’ubuzima bw’abantu n’ubw’ibihugu, ahazaza habwo haryamye mu biganza bya internet.

Password ni ingenzi cyane ku bakoresha internet kuri ubu by’umwihariko aho amabanga ya muntu menshi asigaye abikwa ku mbuga no mu bikoresho bitandukanye by’ikoranabuhanga aho kubyinjiramo ari ako kanya mu gihe byaba bitarinzwe neza.

Ikinyamakuru India Today cyatangaje ko mu gihe hizihizwa Umunsi Mpuzamahanga wahariwe Password, ari umwanya wo gutekereza ku buryo amabanga yawe kuri internet cyangwa mu bindi bikoresho by’ikoranabuhanga abitswe, aho ubona bitifashe neza ugakaza ubwirinzi ukoresha password yizewe kandi idashobora korohera abagizi ba nabi.

Yaba password ukoresha ufungura telefone yawe, iyo muri banki, iya email n’ibindi zose zikwiriye kuba zihagije kandi zidasa mu rwego rwo kwirinda ko uwabasha kuvumbura iyo ukoresha hamwe, yahita avumbura n’izindi ubuzima bwawe bwose bukajya ku karubanda.

Kuri ubu, hari porogaramu nyinshi za internet ziriho zifasha abantu kumenya neza niba passwords bakoresha zizewe cyangwa ari nkene ku buryo abagizi ba nabi bazinjiramo uko bishakiye.

Umuhanga mu by’Ikoranabuhanga, Mark Burnet, ari na we wasabye ko habaho Umunsi Mpuzamahanga wahariwe password, yanditse igitabo acyita “Perfect Passwords”.

Yagaragaje ko password yizewe ari ihindurwa mu gihe runaka aho kuba imwe ihoraho idahinduka. Ni ukuvuga ko mu gihe runaka ukwiriye kugenzura passwords zawe kandi ukazihindura, kugira ngo wizere ko urinzwe neza.

Izi Passwords zikwiriye kuba zikomeye kandi zigizwe n’ibintu byinshi ku buryo bitorohera buri wese kuzifata mu mutwe cyangwa se kuzikeka.

Umunsi Mpuzamahanga wa Password watangijwe na Sosiyete Intel Security mu mwaka wa 2013.

Ni byiza gukoresha password zitandukanye kandi zikomeye ahantu hatandukanye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .