U Rwanda rushobora kubona icyogajuru cya mbere mu 2020

Yanditswe na Rabbi Malo Umucunguzi
Kuya 12 Ukuboza 2017 saa 11:43
Yasuwe :
0 0

Inzego z’Abikorera mu Rwanda no mu Buyapani ziri mu bufatanye bukomeye mu ikoranabuhanga, harimo n’ubushobora gutuma u Rwanda rukora amateka rukabona icyogajuru kizajya mu kirere, aho gukomeza kwifashisha iby’abandi.

Umuyobozi Wungirije mu Rugaga rw’Abikorera mu cyiciro cy’Ikoranabuhanga, Robert Ford, yabigarutseho mu kiganiro cyihariye yagiranye na IGIHE, kuri uyu wa Mbere, ubwo Ambasaderi w’u Buyapani mu Rwanda, Takayuki Miyashita, yakiraga itsinda ry’abikorera bo mu Buyapani bari mu ruzinduko mu Rwanda.

Ni itsinda ry’abantu 12 baturutse mu Mujyi wa Kobe mu Buyapani, usanzwe ufite ubufatanye bwihariye n’Umujyi wa Kigali.

Ford yagize ati “Hari ubufatanye na Kaminuza ya Tokyo na Kaminuza ya Kyūshū, mu gushyiraho ikigo cya mbere mu Rwanda cy’ibijyanye n’ubumenyi bw’ikirere, ibijyanye n’ibyogajuru, ku buryo natwe dushobora kuzatwara icyogajuru cyacu cy’u Rwanda, kigashobora kujya mu kirere, noneho tukajya dufata amakuru yacu y’u Rwanda, bitadusabye kugira abandi bantu ducaho, twishyura kugira ngo dushobore kugera ku cyogajuru.”

Yavuze ko biri gukorwa ku bufatanye n’abikorera mu ikoranabuhanga, Ikigo cy’Abayapani Gishinzwe Ubutwererane Mpuzamahanga, JICA, Ikigo Ngenzuramikorere, RURA n’Ikigo cyo mu Buyapani gishinzwe ibyogajuru, JAXA.

Yakomeje agira ati “Turi kugira ngo dushyireho icyogajuru cya mbere cy’Abanyarwanda mu kirere mu 2020. Twe niho tureba, twatangiye urugendo, turumva mu bufatanye bwacu bitazagorana kuko n’abanyeshuri ba mbere bagiye gufata ayo mahugurwa mu Buyapani bagiye uyu munsi (bane). Ariko hari n’abandi bazagenda muri Abe Initiative y’igihembwe cya gatandatu."

Ibyogajuru bifasha ibihugu mu itumanaho, gukusanya amakuru akenewe nko mu bikorwa by’ubutabazi cyangwa igisirikare, bikaba bimaze kugaragara ko ari ikoranabuhanga rishoboka kuri uyu mugabane.

Nka Afurika y’Epfo yohereje icyogajuru cya mbere mu 1999, Nigeria icyohereza mu 2003 hagamijwe kugenzura ibijyanye n’ibiza, Misiri yohereza icya mbere mu 2007 hagamijwe ubushakashatsi mu by’ubumenyi, n’ibindi bihugu nka Maroc, Algeria nabyo bikora bityo, kugeza kuri Ghana yacyohereje ejo bundi muri Nyakanga 2017.

Ibindi bihugu byo muri Afurika nka Ethiopia, Angola na Kenya (yo bivugwa ko icyogajuru cya mbere yacyohereje mu 1970) bikomeje kunoza umushinga wo gushyiraho ibigo bizatuma hoherezwa ibyogajuru byinshi mu kirere.

Hateganywa byinshi mu bufatanye

Ubufatanye bwihariye bw’Umujyi wa Kobe n’Umujyi wa Kigali, bumaze igihe, gusa byageze ku rundi rwego ubwo mu 2016 Umuyobozi w’Umujyi wa Kobe yazaga mu Rwanda aherekejwe n’abayoboye amasosiyete 15 akomeye yo muri Kobe, basura Kigali babonana n’uwari Umuyobozi wayo, Monique Mukaruliza, basinyana n’amasezerano y’ubufatanye n’imijyi yombi.

Ubwo yakiraga abandi bashoramari bashaka gukorera mu Rwanda, kuri uyu wa Mbere, Amb. Miyashita yabasabye gushaka aho bashora imari, atari no muri Afurika y’Iburasirazuba gusa ahubwo bakajya no mu Burengerazuba, ariko abereka ko u Rwanda rufite umwihariko.

Yakomeje agira ati "Aha ni ahantu heza kuri mwe, hari umutekano, nta ruswa iharangwa kandi hari n’ikirere cyiza, ku buryo haba igicumbi cy’ibigo by’u Buyapani.”

Yavuze ko yizeye ko nyuma yo kwitegereza amahirwe bashobora gushoramo imari muri iki gihugu, bazatanga raporo nziza ku bigo baturutsemo mu Buyapani ku buryo hazavukamo ubufatanye bukomeye.

Muri uru rugendo bazasoza ku wa Gatanu, bazagira umwanya wo gusura ibikorwa bitandukanye birimo Kigali Innovation City, Kaminuza y’u Rwanda, Zipline, Imirima y’i Kawa i Rwamagana bareba niba hari ikoranabuhanga bashyira mu bahinzi borozi n’ibindi.

Umuyobozi w’Umujyi wa Kigali, Pascal Nyamurinda, yashimiye aba bashoramari bo mu Mujyi wa Kobe, avuga ko Abanyarwanda bakwiye kurushaho kureba uko bafatanya n’aba bashoramari, cyane ko hari intambwe ikomeye bagezeho.

Yakomeje agira ati “Uretse imishinga y’ikoranabuhanga hari n’ibindi bamaze gushima ko bashoramo imari, ku buryo nyuma y’uru rugendo bishoboka ko hari n’indi mishinga izabamo ubufatanye.”

Hari ishoramari rikomeye rimaze kugerwaho

Shigenori Tanabe uyoboye iri tsinda ryaturutse mu Mujyi wa Kobe, yavuze ko ubwo mu mwaka ushize Meya wa Kobe, Kizō Hisamoto yasinyaga amasezerano y’ubufatanye n’Umujyi wa Kigali, hatangiye imishinga irimo kuzamura ubushobozi bw’abakozi hagati y’inzego za leta n’abikorera, ku buryo biri gutanga umusaruro.

Mu kwezi gushize kandi itsinda ry’abacuruzi bo mu Rwanda n’abayobozi muri guverinoma basuye Umujyi wa Kobe, aho ngo yizera ko wabaye umwanya mwiza wo kubaka ubufatanye hagati y’inzego za leta n’abikorera.

Yakomeje agira ati “Muri ubu buryo habaye ubufatanye ku mpande zombi, hakaba hari abanyeshuri bo mu Rwanda baje mu Buyapani mu myaka ine ishize, abaje muri Kobe muri gahunda ya Abe Initiative n’izindi gahunda barenga 30.”

Robert Ford yavuze ko Abayapani hari bimwe mu bigo bamaze gushoramo imari birimo DMM yashoye imari muri AC Group yazanye ikoranabuhanga ryo gukoresha amakarita ku modoka, na Hehe Labs yaje no guhinduka DMM Hehe. Hari n’indi yitwa Otowa Electric Co, Ltd iri gukorana n’Umujyi wa Kigali n’Akarere ka Rutsiro mu kwirinda inkuba.

Yakomeje agira ati “Dufite n’indi yitwa Toyota Tsusho, ishami rya Toyota ariko ry’ikoranabuhanga, ubu bari gukorana na RURA ngo bashyireho uburyo bwa Traffic Management System, uburyo bushingiye ku makuru ava kuri telefone, akagira ahantu ajya, agasesengurwa, akavamo amakuru wahereza abatwara imodoka ngo bamenye ahantu habaye umubyigano w’imodoka.”

“Dufite indi sosiyete yitwa Kobe Digital imenyerewe mu gukora za applications zitandukanye. Bari gukorana na Kaminuza y’u Rwanda Koleji y’Ubumenyi n’Ikoranabuhanga, ngo bakorane n’abanyeshuri b’Abanyarwanda bashobore gukora ama porogaramu atandukanye yafasha Abanyarwanda.”

Uretse Abanyarwanda 30 kandi bamaze gutyaza ubwenge muri Kobe Institute of Computing mu Buyapani, hari n’ibigo byo mu Buyapani ubu biri guhugura abakozi 45 mu birebana n’ikoranabuhanga rya mudasobwa.

Ibyo byiyongeraho ko hari aba-Engineer boherejwe n’Umujyi wa Kobe baheruka kuza mu Rwanda kureba uko bateza imbere ibyerekeye amazi n’isukura.

Mu gihe cy’imyaka ibiri ishize mu bufatanye bw’imijyi yombi, hari amasosiyete akomeye arenga umunani y’Abayapani amaze gushora imari mu Rwanda arimo Mitsui & Co Ltd, Toyota, Sumitomo, Nikken Sekkei Ltd, Hitachi na Panasonic ishaka kuza gukora indege zitagira abapilote ariko zo nini kurutaho.

Habayeho gusangira ku bw'umubano w'Imijyi yombi
Tanabe waje ayoboye itsinda ryaturutse mu Buyapani, avuga ibyo biteze ku Rwanda
Umuyobozi w'Umujyi wa Kigali, Pascal Nyamurinda hamwe na Ambasaderi Takayuki Miyashita
Umuyobozi w'Umujyi wa Kigali, Pascal Nyamurinda, yagaragaje ko hari inzego nyinshi Umujyi wa Kigali n'uwa Kobe bakeneye gufatanyamo
Abanyarwanda n'Abayapani baraganira inzego bashobora gufatanyamo mu ishoramari
Amb. Takayuki Miyashika yakiriye aba bayobozi iwe mu rugo, mu Mujyi wa Kigali
Impande zombi zasangiye ibyishimo kubera umubano urangwa hagati y'Umujyi wa Kigali n'uwa Kobe
Umuyobozi Wungirije mu Rugaga rw'Abikorera mu Rwanda, mu Cyiciro cy'Ikoranabuhanga, Robert Ford

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza