Afurika yahawe miliyoni €15.4 azifashishwa mu gukwirakwiza internet mu byaro

Yanditswe na Ishimwe Israel
Kuya 20 Ukuboza 2018 saa 04:47
Yasuwe :
0 0

Umuryango w’Ubumwe bw’u Burayi (EU) wahaye Afurika miliyoni €15.4, asaga miliyari 15 Frw, azifashishwa mu gukwirakwiza internet ku mugabane by’umwihariko mu bice by’icyaro.

Ibihugu bizagerwaho n’iyi nkunga birimo u Rwanda, Kenya, Uganda, Zambia na Repubulika Iharanira Demokarasi ya Congo.

Ni igice cya miliyoni €495 EU yagenewe Afurika mu mishinga y’ubwikorezi, urwego rw’ingufu no gusakaza internet.

Banki y’Ishoramari y’Abanyaburayi (European Investment Bank, EIB) ku wa Kabiri yatangaje ko iri shoramari rizita ku kubaka ibikorwa remezo bizafasha gukwirakwiza internet mu byaro.

Amasezerano ashyira umukono kuri iri shoramari yahagarariwe n’abakuru b’ibihugu barimo Perezida Paul Kagame uyoboye Umuryango wa Afurika Yunze Ubumwe (AU) mu Ihuriro rya Afurika n’u Burayi ryabereye i Vienne muri Autriche ku wa 18 Ukuboza 2018.

Uyu mushinga w’imyaka ibiri ugamije gufasha ibihugu kuzamura urwego rwabyo mu gukoresha internet no gushyigikira urwego rw’ubucuruzi bwifashishije ikoranabuhanga.

Mu itangazo ryagenewe itangazamakuru, Perezida wa EIB, Werner Hoyer, yavuze ko “Ubwikorezi burambye, ingufu n’itumanaho ritomoye ari ibibazo bihuriweho hagati y’u Burayi na Afurika. Imikoranire yacu izadufasha kurengera ubuzima bwa benshi.”

EU yizera ko ishoramari ryayo rizanoza ihanahana ry’amafaranga, kunoza imitangire ya serivisi z’ubuzima no kubona amakuru ahagije y’ibiciro by’ibikomoka ku buhinzi.

Nation yanditse ko inkunga yatanzwe izanifashishwa mu guhanga imirimo, bizagabanya umubare w’urubyiruko rutakaza ubuzima rushaka ubuzima i Burayi.

Uyu muyoboro ureshya n’ibilometero 4,850 niwuzura uzafasha abantu miliyoni icyenda kugerwaho na internet.

EIB izanatera inkunga imishinga mishya mu Misiri, Guinea n’ibyo muri Afurika y’Uburasirazuba. Irimo kwagura umuhanda wa Gari ya Moshi wa Cairo, kuzuza ibikorwa remezo bizafasha abantu 200,000 kugerwaho n’amashanyarazi muri Guinea no kongerera imbaraga urwego rw’ingufu muri Guinea, Mali, Liberia na Côte d’Ivoire.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza