Nyuma yo gukumirwa na Amerika, Huawei yasinyanye amasezerano akomeye n’u Burusiya

Yanditswe na Umwali Zhuri
Kuya 7 Kamena 2019 saa 09:53
Yasuwe :
0 0

Ikibazo cya Huawei na Leta Zunze Ubumwe za Amerika, cyagaragaje uburyo ihangana ry’ibihugu bikomeye mu Isi rikomeje gufata indi ntera. Leta Zunze Ubumwe za Amerika zidacana uwaka na Leta y’u Bushinwa hamwe n’iy’u Burusiya.

Leta Zunze Ubumwe za Amerika ziherutse gutangaza ibihano byafatiwe Sosiyete y’Ikoranabuhanga ya Huawei, by’umwihariko Google yanzura ko Huawei itazongera gukoresha porogaramu zayo za Android muri telefoni ishyira ku isoko.

Izingiro nyamukuru ry’ikibazo cya Leta Zunze Ubumwe za Amerika na Huawei ni uko iki gihugu cy’igihangange ku Isi cyagaragaje impungenge zo kuba u Bushinwa (aho Huawei ibarizwa) bushobora kwifashisha ibikoresho bya Huawei mu kuneka ibindi bihugu n’ibigo bitandukanye.

Iyo ni yo mpamvu mu 2012 Amerika yabujije sosiyete zitandukanye gukoresha ibikoresho bitanga internet bya Huawei.

Mu gihe Isi ikataje na internet yihuta ya 5G, Huawei nk’ikigo cya mbere mu gukora ibikoresho by’ikoranabuhanga byifashishwa mu gusakaza internet yari ku isonga mu kureba uko yabigeza ku isoko ku bwinshi ariko yahise itangira gukomwa mu nkokora.

Imaze gusinyana amasezerano n’ibihugu birenga 30 mu gihe Nokia yo muri Finland yo imaze gusinyana n’ibihugu 12 ariko ayo masezerano yayo yasinywe mu mezi abiri ashize.

Nyuma yo gukumirwa muri Leta Zunze Ubumwe za Amerika, kuri uyu wa Kane Huawei yasinye amasezerano agamije kubaka ikoranabuhanga rya 5G mu Burusiya.

Aya masezerano Huawei yayasinyanye n’Ikigo cya mbere mu Burusiya mu by’itumanaho MTS mu biganiro bya Perezida w’u Bushinwa Xi Jinping na mugenzi we Vladimir Putin by’uruzinduko Xi yagiriye i Moscow.

Yasinywe mu gihe Leta Zunze Ubumwe za Amerika zikomeje gushyira imbaraga mu kubwira ibihugu zifitanye umubano ko zareka ubufatanye na Huawei.

Huawei yakunze kwamagana ibirego ishinjwa na Amerika ivuga ko nta gikoresho cyayo na kimwe gishobora guhungabanya umutekano w’ibihugu.

Inkuru wasoma: Sobanukirwa ingaruka gukumira Huawei mu gukoresha serivisi za Google bizagira

Uruzinduko rwa Xi mu Burusiya bwasize hasinywe amasezerano hagati ya Huawei na Sosiyete ya MTS

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza