APR FC izatangira imikino ya gisirikare yisobanura na UPDF ya Uganda

Yanditswe na Eric Tony Ukurikiyimfura
Kuya 13 Kanama 2019 saa 01:34
Yasuwe :
0 0

APR FC yagiye ihagarariye u Rwanda mu mikino ya gisirikare itangira kuri uyu wa Kabiri mu Mujyi wa Nairobi muri Kenya, izakina umukino wayo wa mbere ku wa Gatatu yisobanura na UPDF FC ihagarariye Uganda.

Iyi mikino igiye kuba ku nshuro ya 12 yitabiriwe n’abakinnyi bagera kuri 500 baturutse mu bihugu bitandatu bigize Umuryango wa Afurika y’Iburasirazuba ari byo u Burundi, Kenya, u Rwanda, Sudani y’Epfo, Tanzania na Uganda.

Iyi mikino itangizwa ku mugararo kuri uyu wa 13 Kanama 2019, izakinwa muri siporo eshanu zirimo umupira w’amaguru (abagabo); Netball (abagore); Volleyball (abagore); Basketball (abagabo) n’imikino ngororangingo (abagabo n’abagore).

APR FC yahagarariye u Rwanda mu mupira w’amaguru izakina umukino wayo wa mbere kuri uyu wa Gatatu, aho izahura na UPDF FC y’Ingabo za Uganda, aho iyi kipe yahoze yitwa Simba kuri ubu ikina mu cyiciro cya kabiri.

Ikipe y’Ingabo z’u Rwanda izagaruka mu kibuga ku wa Gatandatu tariki ya 17 Kanama ihura na Muzinga yo mu Burundi , yisobanure na Simba ya Tanzania tariki ya 20 Kanama mu gihe umukino wa nyuma izawukina na Ulinzi Stars ya Kenya tariki ya 23 Kanama 2019 .

Ulinzi Stars yegukanye igikombe ubushize ubwo iyi mikino yaberaga mu Burundi, irakina umukino ufungura irushanwa hamwe na Muzinga ihagarariye u Burundi kuri Moi International Sports Center (MISC), Kasarani kuri uyu wa Kabiri guhera saa 16:30.

Iyi mikino yashyizweho mu masezerano yasinywe mu 1998, akavugururwa mu 2001, izasozwa tariki ya 26 Kanama 2019.

Aya masezerano y’ubufatanye yarimo guhana amahugurwa ya gisirikare, gusabana no kumurika imico y’ibihugu bigize Umuryango wa Afurika y’Iburasirazuba.

Iyi mikino yabaye bwa mbere mu 2005, ikinirwa muri Uganda, Kenya iyakira mu 2006, Tanzania mu 2007, Uganda yongeye kuyakira mu 2008, ibera mu Rwanda mu 2009, mu Burundi mu 2011, muri Kenya mu 2013, muri Zanzibar mu 2014, Uganda mu 2015, u Rwanda rwayakiriye mu 2016 mu gihe iheruka kubera mu Burundi mu 2017.

APR FC izakina umukino wa mbere muri Kenya kuri uyu wa Gatatu
Ulinzi Stars ya Kenya ni yo yatwaye Igikombe ubwo iyi mikino yaherukaga kuba mu 2017

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza