Ibikorwa bidasanzwe bya Habiyaremye wazamuye impano nyinshi za ruhago ku Mumena (Amafoto)

Yanditswe na Ngabo Roben
Kuya 10 Mutarama 2019 saa 06:22
Yasuwe :
0 0

Ubuhanga n’ubuhangange bwa benshi mu bakinnyi bavuka mu gace ka Nyamirambo bwaremewe ku kibuga cyo ku Mumena, mu biganza by’umugabo umwe, Habiyaremye Déo.

Iki kibuga cyabaye isoko y’abakinnyi nka Nshizirungu Hubert Bébé, Shyirakumutima Aziz Billy, Tuyizere Donatien Djojori, Mugiraneza Jean Baptiste Migi, umutoza wungirije wa Mukura VS Rwaka Claude, Sibomana Abouba wakiniye amakipe atandukanye arimo Rayon Sports, na Gor Mahia yo muri Kenya, n’abandi benshi.

Biragoye kuganira ku nkomoko y’impano z’abakinnyi benshi bakiniye Amavubi n’amakipe atandukanye mu Rwanda, utagarutse ku magana y’abazamukiye ku Mumena ahahoze hitwa Stade de l’Amitié.

Nyuma ya Jenoside yakorewe Abatutsi mu 1994, umusaza Kanamugire Aloys ni we watoje benshi mu bana bavuyemo abakinnyi bakomeye. Ubu ari mu kiruhuko cy’izabukuru.

Mu myaka 12 ishize habonetse undi mutoza wageze ikirenge mu cye, Habiyaremye Déo wakiniye Kiyovu Sports kuva 1989 kugera muri 1993, agahagarika gukina akiri muto kubera ikibazo cy’umutima cyatumye ajya muri koma akamaramo amezi atatu.

Nyuma yo kubona ko impano zizamukira ku Mumena zagabanutse, uyu mutoza ku nkunga ya Ashraf Munyaneza Kadubiri nawe wakiniye Kiyovu Sports ubu uba mu Budage, yatangije umushinga w’amakipe y’abana mu byiciro bitandukanye, mu 2007.

Kuva ubwo kugeza ubu, Habiyaremye amaze gutoza abana barenga ibihumbi bibiri barimo amazina azwi nka myugariro Ombolenga Fitina, Dominique Savio Nshuti bakinana muri APR FC, Ahoyikuye Jean Paul wa Kiyovu Sports, Nyirinkindi Saleh wa APR FC wanahagarariye u Rwanda mu marushanwa y’abana ya Copa Coca Cola 2016 yabereye mu Bufaransa n’abandi.

Ni akazi gasaba ubwitange

Mu kiganiro cyihariye uyu mutoza yagiranye na IGIHE, yavuze ko aka kazi amazemo imyaka 12 atagakora kubw’amaramuko, ahubwo akabonamo ibyishimo.

Ati “Nta kintu gishimisha nko kubona umwana wazamuye ageze ku rwego rwiza aho ashobora kwitunga no gutunga umuryango we. Kwicara kuri stade cyangwa kuri Televiziyo nkareba abana banjye bakina mu makipe atandukanye no kubona ruhago y’u Rwanda ijya ku rundi rwego, bintera ishema n’ibyishimo byinshi biruta ibiva mu mafaranga.”

Nyuma yo gutangiza uyu mushinga agakora amakipe ane y’ibyiciro bitandukanye; abatarengeje imyaka 10, 14, 16 n’abatarengeje imyaka 18, ikipe ya Kiyovu Sports yaramwegereye yemera gutera inkunga umushinga we.

Ubu niyo iha imipira bakina, imyenda bambara, amazi banywa mu myitozo n’itike ibajyana mu mikino yabo.

Anenga inzego zidaha agaciro imikino y’abana

Habiyaremye avuga ko inzego zireberera umupira w’amaguru by’umwihariko FERWAFA, idakoresha neza inkunga ya $250 000 ihabwa na FIFA buri mwaka, igamije guteza imbere impano z’umupira w’amaguru mu bana.

Ati “Ikintu cya mbere kigoranye ni uko (gutegura abana) Minispoc yabiteye umugongo ikabiharira Ferwafa, ikigo cyigenga gikora ibintu uko abakiyobora bashaka gusa. Nyamara gutegura abana ni inyungu z’igihugu muri rusange.”

“Ferwafa nta kintu na kimwe idufasha kuko ntituyisaba make muri ayo mafaranga ihabwa na FIFA. Nibura nitegure shampiyona y’abana ihoraho ifite uduhembo tworoheje, abana bakinane ishyaka kuko bazi ko hari icyo barwanira. Ibyo nabyo byarayinaniye? Buri komite ijyaho yabishyize mu mihigo ariko nibyo bya mbere barenza ingohe iyo bafashe ubuyobozi.”

Gusa Habiyaremye ntabwo bimuca intege kuko kuva ku wa Mbere kugera kuwa Gatanu agera ku kibuga cyo ku Mumena saa 13:15 agataha saa 18:40, atoza abana b’ibyiciro bitandukanye.

Ubwo IGIHE yamusuraga yasanze arimo gutoza abana 136 mu kibuga kimwe, kandi bose abitaho akabaha imyitozo ijyanye n’imyaka yabo n’imbaraga bafite.

Mu bana Habiyaremye atoza ubu harimo umwana w’imyaka 12 wa Mafisango Patrick witwa Mutesa Tuyishimire Tabu Crespo, Oleko Salum uvukana Ombolenga Fitina, na Sibomana Faraj, umwana wa Sibomana Abouba.

Ubu akazi ko kubona abana karamworohera kuko ababyeyi babo babijyanira bakiri bato, bagasabwa kubakurikirana mu masomo yabo ngo badatwarwa n’umupira bakibagirwa kwiga. Banabashakira ibyangombwa by’ibanze nk’ubwisungane mu kwivuza, inkweto n’ibindi.

Nubwo aba bana bavamo abakinnyi bakomeye, abagurwa ahabwaho amafaranga ibihumbi 500 Frw amategeko ya Ferwafa yita indezo, nayo avuga ko ashirira mu kugura ibindi bikoresho by’abana nka ‘chasuble’ na ‘corner’ zikoreshwa mu myitozo.

Abana baba bafite umuhate mu myitozo
Habiyaremye afasha abana gukuza impano zabo kandi abimazemo igihe
Mu 2012 Nshuti Dominique Savio yari mu bana batoragura imipira ku kibuga
Abana bamufata nk'umubyeyi kandi baramwizera
Ahoyikuye Jean Paul yazamukiye mu makipe y'abana atozwa na Habiyaremye none ubu ni umwe mu bo Kiyovu Sports igenderaho
Bakora imyitozo ikarishye ariko imikino ibahuza n'abandi bana iracyari mike
Faraj Sibomana, umwana wa Sibomana Abouba yifuza kugera ikirenge mu cya Se
Gutegura abana ntibisaba byinshi kuko bo ubwabo baryoherwa na ruhago
Hari ubwo bisaba gukoresha igitsure ngo abana bamwumve
Ibikoresho ni bike kandi byinshi birashaje, ngo nta nkunga ya Ferwafa bazi
Ikinyabupfura ni cyose, abana bibwiriza kwiragiza Imana mbere yo gutangira imyitozo
Impano zigaragara umwana atarageza n'imyaka 10
Imyitozo ikomeza umubiri niyo ibanziriza gukora ku mupira
Kugira umuvuduko ni kimwe mu byo abana batozwa
Kuko Habiyaremye yakinnye umupira, abanza kuberekera ibyo ashaka ko bakora
Mu bakinnyi bazamukiye mu biganza bya Habiyaremye harimo na Ombolenga Fitina uri mubo yahereyeho mu myaka ya 2007 - 2008
Mu gihe andi mashuri y'umupira w'amaguru aba afite abatoza b'abanyezamu, Deo Habiyaremye we arabyikorera kuko ubushobozi bukiri buke
Mu 2012 Ahoyikuye Jean Paul bita Mukonya nta wari uziko yakinira Amavubi
Ni bato cyane ariko ahazaza ni heza
Niyonkuru Shaban ni murumuna wa Nizeyimana Djuma ukina muri Kiyovu Sports, nawe atozwa na Habiyaremye
Bagerageza no kurekura amashoti akomeye ku rwego rwabo
Nyirinkindi Saleh w'imyaka 19 APR FC yatije muri Marines FC ari mu batanga icyizere cy'ahazaza muri ruhago y'u Rwanda bakuriye ku Mumena
Umwana wa Sibomana Abouba azwiho gutanga imipira ivamo ibitego
Umwe mu bahiga abandi mu mpano zidasanzwe Habiyaremye yazamuye harimo na Savio Nshuti, aha ni mu 2011
Urebye uburyo Nshuti Dominique Savio akunzwe ubu watungurwa n'aho yari ari mu myaka umunani ishize
Aha ni muri 2012, umwaka wa nyuma Savio Nshuti yakiniye ku Mumena mbere yo kujya mu Isonga FC
Wenda azaba Lionel Messi w'ahazaza
Oleko Salum afite icyizere cyo kuzagera ikirenge mucya bakuru be Abouba Sibomana na Ombolenga Fitina
Ombolenga Fitina muri 2009 yari muto cyane ariko atanga icyizere
Uyu mwana wa Mafisango mbere yo gukora inshingano ze mu kibuga abanza kumva amabwiriza y'umutoza

Amafoto: Ntare Julius


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza