Uyu Munya-Uganda Rayon Sports yatijwe na URA FC, yasesekaye ku Kibuga Mpuzamahanga cy’Indege cya Kigali mu ijoro ryo kuri uyu wa Mbere, tariki ya 30 Mutarama 2023, ahagana saa tatu n’iminota 34.

Mu ijambo rye akigera i Kigali, uyu mukinnyi ukina aca ku mpande yijeje abakunzi ba Rayon Sports kubaha ibyishimo.

Yagize ati "Rayon Sports ni ikipe nzi ko ikomeye hano mu Rwanda. Icyo nabwira abafana ni uko nje kugirana ibihe byiza ndetse no gutwara ibikombe na Rayon Sports, tukajya muri CAF Champions League na Confederations Cup."

Tariki 28 Mutarama 2023, ni bwo URA FC yatangaje ku rubuga rwayo ko yatije uyu mukinnyi muri Rayon Sports.

Yagize iti "Twishimiye kubatangariza ko umukinnyi wacu uca ku mpande Joackiam Ojera yatijwe muri Rayon Sports yo mu Rwanda mu gihe cy’amezi atanu, ku bwumvikane bw’impande zombi. Uyu akaba ari we mukinnyi wa mbere dutije hanze y’Igihugu mu mateka y’ikipe yacu."

Ojera yahamagawe kenshi mu Ikipe y’Igihugu ya Uganda guhera mu 2018 ndetse yari muri Uganda Cranes yatwaye Igikombe cya CECAFA Challenge Cup 2019 n’iyakinnye CHAN 2020 yabereye muri Cameroun, itozwa n’Umunya-Ecosse Jonathan McKinstry.

Uyu mukinnyi w’imyaka 25 yabanje muri 11 ba Uganda banganyije n’Amavubi y’u Rwanda 0-0 muri iryo rushanwa kuri Stade de la Réunification tariki 18 Mutarama 2021.

Joackiam Ojera yari muri URA FC yakinnye imikino ya CAF Confederation Cup mu 2021 ikaza gusezererwa na Al Masry SC yo mu Misiri ku ijonjora ry’ibanze.

Joackiam Ojera akigera i Kigali yakiriwe n'Umuvugizi wa Rayon Sports, Nkurunziza Jean Paul

Ojera yahamagawe kenshi mu Ikipe y’Igihugu ya Uganda guhera mu 2018

Joackiam Ojera yageze muri Rayon Sports nk'intizanyo ya URA FC

Joackiam Ojera yavuze ko asanzwe azi Rayon Sports nk'ikipe ikomeye

Joackiam Ojera yinjira mu modoka

Joackiam Ojera yari afite akanyamuneza ku maso

Amafoto: Ntare Julius

Video: Mugisha Dua