Kayiranga yerekanye ikintu yifuza cyarokora Pépinière FC icyiciro cya kabiri

Yanditswe na Manzi Rema Jules
Kuya 12 Mutarama 2017 saa 10:49
Yasuwe : XX
0

Kugeza ku munsi wa 12 wa shampiyona y’u Rwanda, Pépinière FC iri ku mwanya wa nyuma n’inota rimwe gusa ariko umutoza wayo Kayiranga Baptiste asanga ikintu kimwe cyarokora iyi kipe ntizamanuke mu cyiciro cya kabiri ari uko yabona abakinnyi bakuze bafite inararibonye bakaza kurera abana bato asanganywe.

Nyuma y’ibibazo byinshi yaciyemo birimo gufungirwa ikibuga cyo ku Ruyenzi byari byanatumye isezera muri shampiyona ariko ikaza kwisubiraho izamze kuganira na Ferwafa, Pépinière FC iracyari mu byago byinshi byo kumanuka ikajya mu cyiciro cya kabiri dore ko imaze kubona inota rimwe gusa kuri 30 y’imikino 10 yakinnye.

Umutoza wayo Kayiranga Baptiste avuga ko we nk’umuntu umenyereye shampiyona kandi watoje ku nzego zayo zose haba amakipe akomeye ndetse n’arwanira amahirwe ya nyuma yo kuguma mu cyiciro cya mbere, ngo ntabwo yatunguwe n’umusaruro wa Pépinière FC nk’uko yabitangarije IGIHE.

Ati “Twanyuze mu bibazo byinshi ariko naje muri Pépinière FC mbyiteguye. Ndibuka ko nabanje kwicarana na perezida ambwira ko ubushobozi dufite butatwemerera guhanganira umukinnyi n’ikipe iyo ariyo yose mu Rwanda, uretse na Rayon Sports ntabwo dushobora no kuzana umukinnyi urangije amasezerano mu Magaju FC akimushaka.”

“Ubu ikintu mbona cyamfasha ni uko nibura imikino yo kwishyura yarangira tumaze gusatira ariya makipe aturi imbere (Gicumbi FC ifite amanota arindwi na Marines ifite 11). Murabona turacyafite ibirarane bibiri, tuzashaka uko tubyitwaramo neza wenda n’indi mikino isigaye mbere y’uko agace ka mbere ka shampiyona karangira.”

Uyu mutoza wanyuze mu makipe atandukanye nka Rayon Sports, Kiyovu Sports ndetse akanatoza Amavubi, avuga ko agifite icyizere ko azakorana amateka na Pépinière FC akayifasha kuguma muri shampiyona y’icyiciro cya mbere nubwo nta mahirwe ihabwa.

Ati “Hari abakinnyi nshaka bakuze, bakinnye shampiyona bayizi bazamfasha kurera bariya bana mfite. Ndamutse mbonye nka bane cyangwa batanu nta kabuza ntitwamanuka.”

Yongeraho ko aba bakinnyi baganiriye atabatangaza amazina kuko bataraba abakinnyi ba Pépinière FC ariko nibamara gusinya abantu bazababona.

Benshi mu bakinnyi Pépinière FC isanzwe ikoresha ntabwo bahembwa ahubwo ni abana batari barabonye amahirwe yo kwigaragaza yafashe ubwo yari imaze kuzamuka umwaka ushize ibashyira hamwe yongeramo abandi bake ariko nabo badasanzwe bafite amazina akomeye muri ruhago y’u Rwanda.

Uretse ikirarane cy’umunsi wa 10 iyi kipe igomba kuzakina na AS Kigali igakurikizaho icya Marines FC bitaramenyekana igihe bizabera.

Pépinière FC iherutse gutsindwa na Rayon Sports 3-1 igomba gukina na Bugesera FC, Amagaju FC, na Gicumbi FC mbere y’uko agace ka mbere ka shampiyona karangira.

Kayiranga n'abo bafatanya gutoza Pépinière FC barashaka igisubizo cyatuma bagumisha ikipe mu cyiciro cya mbere
Pépinière FC iheruka gutsindwa na Rayon Sports
Kayiranga avuga ko abonye abakinnyi batanu bakuze bamufasha kurokora ikipe ntizamanuke

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza