Masoudi Djuma umaze kumenyera ubushomeri yahishuye ko yigeze gukoresha amarozi

Yanditswe na Manzi Rema Jules
Kuya 11 Ukwakira 2017 saa 07:18
Yasuwe :
0 0

Masoudi Djuma yigaruriye imitima ya benshi mu myaka ibiri yamaze ku ntebe y’ubutoza muri Rayon Sports, ikipe aheruka gutandukana na yo ayisigiye urwibutso rw’igikombe cya Shampiyona yaherukaga mu 2013 n’icy’Amahoro, byatumye abafana bamuvuga imyato mu mpinga z’imisozi yose itatse u Rwanda.

-  Rayon Sports muri CAF Champions League twarahomahomaga

-  Nta kipe yindi ndaganira nayo kuva nasezera muri Rayon Sports

-  Yiteguye gutoza APR FC

-  Yakoresheje uburozi ubwo yari akiri umukinnyi

-  Nta byinshi avugana na Karekezi wamusimbuye

Masoudi ufite impamyabumenyi ya Licence A y’ubutoza itangwa na CAF yageze muri Rayon Sports mu Ukuboza 2015 aje gufatanya n’Umubiligi Ivan Minnaert wari umutoza mukuru waje kuyivamo akayisigarana.

Uyu mugabo wari umaze kunywana na Rayon Sports, ku wa 8 Nyakanga 2017 nyuma yo gutsinda Azam FC ibitego bine kuri bibiri mu mukino iyi kipe yahereweho igikombe cya Shampiyona ya 2016/2017, nibwo yatangaje inkuru y’incamugongo ku bafana ba ‘Gikundiro’ ko atandukanye na yo ku mpamvu yise ize bwite.

Masoudi Djuma wagiriye ibihe byiza n’ibibi muri Rayon Sports, mu kiganiro cyihariye yagiranye na IGIHE yatangaje byinshi ku mibereho ye y’ubushomeri nyuma yo gutandukana n’iyi kipe y’ubukombe mu rwa Gasabo, anahishura ko yigeze gukoresha uburozi ubwo yari akiri umukinnyi.

Ikiganiro kirambuye IGIHE yagiranye na Masoudi Djuma

IGIHE: Urugendo rwawe kugeza uhawe inshingano zo gutoza Rayon Sports ni uruhe?

Masoudi: Ntabwo ari urugendo rwari rworoshye gusa byasabaga kwihangana. Navuye i Burundi mfite intego yo gutoza imwe mu makipe atatu nakiniye (APR FC, Rayon Sports na Kiyovu Sports) niyo mpamvu nkiza nabanje gusaba akazi muri APR FC ariko biranga.

Naje kujya muri Rayon Sports ntangira nk’umutoza wa kabiri murabyibuka. Umutoza wa mbere (Yvan Minnaert) ibyo yari yasabye ko uwamwungiriza agomba kuba yujuje nari mbifite. Harimo kuba yarakiniye Rayon Sports, atari umusaza, akundwa n’abafana.

Nabonye amahirwe yo gukorana nawe, hari byinshi namwigiyeho igihe kiragera arasezera aragenda. Abayobozi bampaye imikino itatu yo kungerageza. Ndibuka umukino wa mbere twaranganyije na Espoir FC ariko twakinnye neza ariko kuva icyo gihe byaje kugenda neza dutangira gutsinda kugera twegukanye igikombe.

IGIHE: Umaze gusigarana Rayon Sports nk’umutoza mukuru ni iki cyakugoye?

Masoudi: Icyo gihe ntabwo twari dufite ikipe imeze neza. Yari ifite nka 13 wabonaga ko babikora ariko hagira uwo usimbuza uje akaba ari ku rwego rwo hasi cyane nta kintu yagufasha. Byarangoye cyane ndetse biri mu byatumye dutakaza igikombe cya shampiyona uwo mwaka twari dufiteho amahirwe.

Ikindi ntabwo byari byoroshye kwemeza abantu ko Masoudi bazi nk’umukinnyi mwiza ashobora no kuvamo umutoza mwiza. Wasangaga hari n’abaza kureba ikipe bavuga bati “Ese ko yitwaye neza ku mukino uheruka na none arabikora?” Byansabaga gukora cyane n’abakinnyi baba inshuti zanjye bigafasha ikipe kwitwara neza.

IGIHE: Ni ibihe bihe byagushimishije mu gihe wamaze utoza Rayon Sports?

Masoudi: Igihe cyanshimishije ni ubwo twari tumaze gutakaza amahirwe ku gikombe cya shampiyona (2015-2016) noneho tukicara n’abakinnyi n’abayobozi ubona ko twese dushyize hamwe kandi umwuka ari mwiza maze tukiyemeza ko tugomba gutwara icy’Amahoro kandi tukabigeraho. Nahigiye ikintu gikomeye n’ubu nzi neza ko kizamfasha aho nzajya hose.

Masoudi Djuma nta kibazo abona mu kuba yatoza APR FC

IGIHE: Ni uwuhe mukino wagushimishije cyane mu myaka ibiri wamaze utoza Rayon Sports?

Masoudi: Ni umukino wa mbere wa shampiyona 2016-2017 twatsinzemo Police FC. Sinzi niba mubyibuka, icyo gihe twari dutangiranye ibibazo byinshi ariko twitwara neza ndetse biduha icyizere. Indi mikino yanshimishije ni imikino ibiri twakinnye na Busegera FC ubanza n’uwo kwishyura ndetse n’umukino wa nyuma dutsinda Mukura VS tukegukana igikombe.

IGIHE: Ni iyihe mikino yakubabaje cyane?

Masoudi: Si myinshi ni umwe gusa, ni umukino twatsinzwemo na APR FC muri shampiyona igitego 1-0. Si uko twatsinzwe kuko ni ibisanzwe ariko nababajwe n’uko twakinnye nabi cyane. Ni hahandi narebaga mu kibuga nkabura icyo nakosora, nareba ibyo nabwiye abakinnyi ngasanga nta n’umwe ubikora, narababaye cyane kabisa.

IGIHE: Inzozi zawe zo kugeza Rayon Sports mu matsinda mu mikino Nyafurika zayoyotse ku munota wa nyuma, ni iki cyakomye mu nkokora umuhigo mwari mwihaye?

Masoudi: Ikintu cya mbere ni uko twatangiye gutegura dutinze. Icya kabiri abakinnyi benshi ntabwo bari bamenyereye ariya marushanwa kandi uretse umurindi w’abafana benshi babaga bari inyuma yabo, ntabwo abayobozi babashaga kubasezeranya ibintu bikomeye bya bindi byatuma n’umukinnyi yemera akagwa mu kibuga.

Nk’urugero umukinnyi agiye gukina Champions League ukamubwira uti nimutsinda uyu mukino urahabwa agahimbazamusyi k’igihumbi cy’amadorali icyo gihe urumva ko hari ikintu umwongeye mu mutwe. Gusa sindeganya ubuyobozi kuko icyo gihe nta bushobozi bwari buhari, hari ibibazo byinshi ku buryo aho twageze nabwo bitanze cyane.

Ikibazo cya gatatu ni abakinnyi batari bameze neza, murabizi umwaka wari wabanje twari twatakaje Emmanuel Imanishimwe wagiye muri APR FC tuzana Abouba Sibomana arwaye ntiyagira icyo adufasha, Camara nawe ararwara, Kone ntiyari umukinnyi wagira icyo ahindura mbese byari uguhomahoma.

IGIHE: Nyuma yo gusezererwa muri Champions League havuzwe byinshi ko wariye ruswa ngo witsindishe uranahagarikwa, ubundi byavuye he?

Masoudi: [Aseka] Akazi k’umunwa ni ukuvuga, ntabwo wabuza umuntu kuvuga. Barampagaritse bavuga ko nariye amafaranga ariko reka nkubwire ikintu, iyo nza kuba narariye amafaranga ntabwo nari kugaruka muri Rayon Sports. Nari kuba ngiye gukora iki se kandi mfite amafaranga?

Biriya ni amagambo ntacyo yambwiye. Nari kubabara iyo hagira unkubita naho ubundi narabaretse baravuga nyuma nsubira ku kazi ndakora kandi neza kuko narinzi icyo nshaka kandi mbereka ko ibyo bavuze ataribyo.

IGIHE: Umaze guhagarikwa wanze kongera kuvugana n’itangazamakuru na nyuma ugarutse ku kazi ukomeza kunangira, wapfaga iki naryo?

Masoudi: Hahahaa! Ntacyo napfaga n’itangazamakuru ariko murabizi nta mutoza uhagarikwa kuriya, ntabwo bibaho. Kwanga kuvugana n’abanyamakuru rero nirindaga ko nagira uburakari hakagira amagambo atari meza mvuga ugasanga ikibazo kirushijeho gukomera. Ikindi kandi namwe [abanyamakuru] hari ubwo umuntu avuga ijambo rimwe mukarishyiraho ibindi, nibyo nirindaga.

IGIHE: Umwaka warangiye mwegukanye igikombe cya shampiyona, uri umutoza ukunzwe cyane mu bafana n’abakinnyi ariko uratungurana uregura, wabitekereje ute gufata iki cyemezo kandi wari ushyigikiwe?

Masoudi: Reka nkubwize ukuri, nta muntu n’umwe uzi impamvu yankuye muri Rayon Sports nta n’uzigera ayimenya kuko izahora mu mutima wanjye kereka ubwo uzawunkuramo wenda niwe uzayimenya.

Rayon Sports nyifata nk’iwacu mu rugo, ndayikunda kandi n’abafana bayo barankunda hari na benshi kugeza ubu tuvugana baba bambwira bati turakwifuriza amahirwe aho uzajya hose.

Nta mukinnyi wa Rayon Sports nagiranye nawe ikibazo, na ba bandi wenda mupfa ko utabakinisha barazaga tukaganira bikarangira mu buzima busanzwe tukaba turi inshuti n’ubu niko bimeze, icyo kibazo rero kireke sinzigera ngisubiza.

Nari mfite amasezerano y’imyaka itatu, nta kibazo cy’umushahara nari mfite kuko nari mbizi ko bari bagiye kunyongeza amafaranga ariko nafashe icyemezo cyanjye.

IGIHE: Bibaye ngombwa ko Rayon Sports yongera kugushaka ngo uyitoze wabyemera?

Masoudi: Birashoboka kimwe n’uko najya mu yindi kipe yose. Naje mu Rwanda nifuza gutoza amakipe atatu nakiniye ariko Rayon Sports ni yo yampaye amahirwe ngaragaza icyo nshoboye, ni ikipe yo ku mutima ubwo icyatumye mvamo gikemutse nayitoza.

Nyuma y’uko nyivamo haje abandi kandi bari kwitwara neza ndanabyishimira.
IGIHE: Karekezi Olivier wagusimbuye mujya muvugana?

Masoudi: Kuvugana? Oya, wenda turasuhuzanya bisanzwe nk’abavandimwe, nk’abantu twakinanye nta bindi. Icyo nzi ni uko bafite ikipe nziza, hahandi ushobora gukoramo amakipe abiri meza, Imana ibafashije bazitwara neza. Bazanye Rutanga, Saddam, Yannick, Caleb, banagarura Diarra urebye bafite amahirwe pe. Umukinnyi mbona ko batakaje ni Savio gusa abandi bose barahari.

IGIHE: Kugeza ubu nta kipe ufite utoza, ni wowe washatse gufata ikiruhuko cyangwa ni uko ntayo urabona?

Masoudi: Si uko nduhutse, oya rwose ahubwo nta kazi mfite. Ariko mu buzima bwanjye sinkunda ya kipe nzajyamo ngo ndwanira imyanya ku rutonde, nshaka ya yindi izatuma nkora cyane ubusanzwe yifitemo guhatanira ibikombe. Ayandi makipe sinyasuzuguye ariko iyo niyo ntego yanjye nka Masoudi.

IGIHE: Umaze gusezera muri Rayon Sports byavuzwe ko ugiye kwerekeza muri Police FC nyuma havugwa Mukura VS, ubu haravugwa APR FC ko yakuganirije, habura iki ngo ujye muri ayo makipe?

Masoudi: Mbwire n’abafana cyangwa abantu bose bahora bumva ngo Masoudi arajya aha n’aha, ntabwo ari ukuri. Aya makuru yose ni abanyamakuru bayazana sinzi aho bayakura. Nta kipe n’imwe ndaganira nayo.

IGIHE: Ese APR FC iramutse ikwegereye ishaka ko uyitoza hari imbogamizi ubibonamo?

Masoudi: Njye ndi umukozi, nakubwiye ko ikipe nifuza iyo ariyo yose ihatanira igikombe kandi APR FC iri no mu makipe nakiniye by’umwihariko nubwo n’izo ntakiniye nta cyambuza kuzitoza. Ubwo rero nta mbogamizi n’imwe mbona.

IGIHE: Ku mukino w’Igikombe cy’Intwari mwakinnye na APR FC havuzwe amarozi ndetse Shassir ashyirwa mu majwi cyane, ariko se nkawe umaze imyaka myinshi muri uyu mukino wemera amarozi?

Masoudi: Njye sindi umurozi ntabwo navuga ko bibaho cyangwa bitabaho ariko hari abantu babyemera. Ntabwo nababwira ngo ntimubyemere kuko biterwa n’umutwe w’umuntu.

Ngikina nanjye narabikoze ariko nkiri umwana ariko nabonye ko ntacyo bimarira nsaba Imana imbabazi nkina umupira. Iyo wabinshyizemo uba wumva hari icyo byagufasha ariko uburozi ntibukina ni ikibazo cy’imyumvire gusa.

IGIHE: Kenshi tubona abakinnyi basuka amazi mu mazamu y’andi makipe cyangwa bagatamo utuntu, ese buriya nibwo burozi?

Masoudi: Ndibuka kera hari ubwo batangaga ibintu ku ikipe yose ariko ibyo sinigeze mbikoresha. Ahubwo hari ukuntu twakoraga uruziga tugapfukama umuntu akavuga amagambo runaka ariko ibintu byo kumpa ibintu byo kwambariraho ntabwo nigeze mbikora.

Ikibazo cy’amarozi gikunze kuvugwa mu mupira w’amaguru ku isi ndetse by’umwihariko mu Rwanda mu mukino w’umunsi wa cyenda wa shampiyona wabereye kuri stade ya Huye ku ya 16 Ukuboza 2016, wahuje Rayon Sports na Mukura VS, amakipe yombi akanganya 1-1 havuzwemo gukoresha amarozi. Ibi byatumye Ishyirahamwe ry’Umupira w’Amaguru mu Rwanda (Ferwafa) rihagurukira amarozi rinashyiraho n’ibihano ku bazongera kuyakoresha.

Masoudi Djuma yababajwe no gutsindwa na APR FC
Masoudi wagiriye ibihe byiza muri Rayon Sports yatangaje ko yigeze gukoresha amarozi
Masoudi aracyifuriza Rayon Sports ibyiza
Masoudi yagiranye ikiganiro n'umunyamakuru wa IGIHE amusanze iwe mu rugo
Masoudi udafitanye ikibazo n'abakunzi ba Rayon Sports yishimira ibihe byiza bagiranye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza