MINALOC ivuga iki ku nkunga ihabwa amakipe y’uturere yagabanyijwe abakinnyi bagataka inzara?

Yanditswe na Eric Tony Ukurikiyimfura
Kuya 11 Kamena 2019 saa 12:14
Yasuwe :
0 0

Umwaka w’imikino 2018/19 uragenda ugana ku musozo ariko hari byinshi usize bishobora no kuzagaragara mu mwaka utaha w’imikino, aho amakipe menshi afashwa n’uturere yagiye avugwamo amikoro make ndetse abakinnyi bamwe bagahagarika imyitozo bavuga ko bishwe n’inzara.

Amezi abaye 15 Minisiteri y’Ubutegetsi bw’Igihugu ifashe icyemezo cyo kugabanya ingengo y’imari y’amafaranga yahabwaga amakipe y’umupira w’amaguru afashwa n’uturere, igasigara ingana na miliyoni 60 Frw muri buri karere ndetse na yo agasaranganywa imikino yose.

Uyu ni umwe mu myanzuro yafatiwe mu mwiherero w’iminsi itatu wahuje Ubuyobozi bw’inzego z’ibanze kuva tariki ya 28 kugeza 30 Werurwe 2018. Hemejwe ko guhera mu ngengo y’imari y’umwaka w’ibikorwa wa 2018/2019 nta ngengo y’imari y’ikipe izongera kubaho ko hazajya habaho iya siporo muri rusange kandi na yo itarenze miliyoni 60 Frw.

Iki cyemezo cyashyizwe mu bikorwa, aho makipe menshi yagabanyirijwe amafaranga yahabwaga ndetse uyu mwaka waranzwe no kudahemba ku makipe afashwa n’uturere, abakinnyi bamwe bivumburira imyitozo bavuga ko bishwe n’inzara dore ko nta handi amakipe yabo yajyaga akura ubushobozi.

Tariki ya 23 Mata uyu mwaka, abakinnyi b’Amagaju bandikiye ubuyobozi bwabo ko umusaruro mubi ikipe yari ifite waterwaga n’inzara dore ko bari bafitiwe amezi abiri y’ibirarane ndetse bavuze ko bashobora guhagarika imyitozo.

Nyuma y’ibyumweru bibiri, ikibazo nk’iki cyagaragaye i Kirehe, abakinnyi banga kujya mu myitozo, aho umutoza Sogonya Hamiss ‘Kishi’ yisanze ku kibuga wenyine. Abakinnyi ba Kirehe FC bishyuzaga ubuyobozi amezi ane batahembwe ndetse n’amafaranga bamwe bemerewe n’ikipe ubwo bagurwaga.

Espoir FC, Kiyovu Sports na Mukura Victory Sports ni andi makipe afashwa n’uturere na yo yavuzwemo kudahemba abakinnyi n’ubwo bitageze ku rwego nk’urw’Amagaju na Kirehe FC.

AS Muhanga, Kirehe FC, Musanze FC n’Amagaju ntabwo zitabiriye igikombe cy’Amahoro cy’uyu mwaka byasabaga gutanga ibihumbi 100 Frw kugira ngo wiyandikishe, aho impamvu nyamakuru yatumye aya makipe adakina iri rushanwa ari amikoro mu gihe Sunrise FC yikuye muri iri rushanwa idakinnye nyuma yo kwisanga izatangirira i Rusizi kwa Espoir FC kandi igomba kuva i Nyagatare.

Ubwo yasubizaga itangazamakuru ryari rimubajije kuri iki kibazo cy’amikoro make avugwa mu makipe bitewe n’igabanuka ry’ingengo y’imari yagenerwaga n’uturere, Minisitiri w’Ubutegetsi bw’Igihugu, Prof. Shyaka Anastase, yavuze ko amafaranga y’uturere atari yo kampara kugira ngo amakipe akine kuko ashobora kwishakira ibisubizo.

Ati” Nk’uko mwabibonye, ntabwo nzi niba gukina umupira neza biterwa n’amafaranga ya shampiyona. Ni ukwishamo ibisubizo tugashaka n’ubundi buryo bikorwa kuko igishobora kuba cyonona siporo yacu ni ugutekereza ko ikipe izabaho ari uko akarere kayihaye amafaranga kandi wenda ifite abacuruzi cyangwa abandi bantu bayigira iyabo bakayitera n’imbaraga kurusha, icyo gihe rero ugasanga bagiye kumera nk’abakozi ba Leta atari abakozi ba Leta.”

Minisitiri Shyaka yavuze ko bazakomeza gukangurira uturere kongerera imbaraga amakipe, ariko atari ukugira abakinnyi abakozi ba Leta.

Ati "Tuzakomeza gukangurira uturere kongerera imbaraga ayo makipe atandukanye, ntabwo ari Football gusa, mu buryo butandukanye, ariko ntabwo tuzajya mu kubakangurira cyane kuba bagira cyane abakinnyi ba siporo abakozi ba Leta. Icyo nicyo gikunda kuzanamo ibibazo. Nari nzi ko mumbaza muti ‘byagenda gute kugira ngo ayo makipe agire imicungire inoze y’amafaranga make abona kandi siporo itezwe imbere banarere aba bana babazamukiremo kuko akenshi usanga n’uburyo bakurikirana usanga bitaranozwa neza.”

Minisitiri w’Ubutegetsi bw’Igihugu yavuze ko bashaka ko siporo y’u Rwanda no muri shampiyona izamuka, ubushobozi buzaba buhari mu nzego z’ibanze no mu turere bushobora gufasha ayo makipe batazashidikanya mu kubutanga.

Amagaju FC (Nyamagabe), AS Kigali, AS Muhanga, Bugesera, Etincelles (Rubavu), Espoir FC (Rusizi), Gicumbi FC, Kirehe FC, Kiyovu Sports (Nyarugenge), Mukura Victory Sports (Huye), Musanze FC na Sunrise FC (Nyagatare) ni yo makipe yakinnye icyiciro cya mbere mu Rwanda muri uyu mwaka w’imikino wa 2018/19 ahabwa inkunga n’uturere abarizwamo.

Amagaju FC na Kirehe FC zamanutse mu cyiciro cya kabiri mu mwaka utaha w’imikino nyuma yo gusoza shampiyona y’uyu mwaka w’imikino wa 2018/19 ziri munsi y’umurongo utukura.

Minisitiri w'Ubutegetsi bw'Igihugu, Prof. Shyaka Anastase avuga ko amakipe azakomeza gufashwa mu gihe hari ubushobozi ariko na yo akwiye kwishakira ibisubizo
Kiyovu Sports na Bugesera FC ni amwe mu makipe afashwa n'uturere
Kirehe FC yavuzwemo kudahemba muri uyu mwaka w'imikino ndetse abakinnyi banga kwitabira imyitozo
Abakinnyi ba Kirehe FC bishyuza amezi ane batahembwe mbere y'uko bahagarika imyitozo
Abakinnyi b'Amagaju bandikiye ubuyobozi bwabo bavuga ko bafite inzara
Ibaruwa yanditswe n'abakinnyi b'Amagaju muri Mata uyu mwaka
Abakinnyi bose bayisinyeho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza