Abakinnyi basaga 250 bategerejwe muri Cogebanque Tennis Open igiye kuba ku nshuro ya kane

Yanditswe na Eric Tony Ukurikiyimfura
Kuya 24 Nyakanga 2019 saa 06:54
Yasuwe :
0 0

Irushanwa rya Cogebanque Tennis Open rigiye kubera mu Rwanda ku nshuro ya kane, muri uyu mwaka ryitezwemo abakinnyi bari hagati ya 250 na 300 baturutse mu Rwanda, u Burundi, Uganda na Repubulika Iharanira Demokarasi ya Congo.

Cogebanque Tennis Open izamara iminsi umunani iteganyijwe gutangira ku wa Gatanu, tariki ya 26 Nyakanga kugeza ku wa Gatandatu tariki ya 3 Kanama 2019.

Umuyobozi w’iri rushanwa, Rwabukumba Jean Paul, yabwiye IGIHE ko uyu mwaka rizakinwa n’ibyiciro bitandukanye birimo icy’abakina ari umwe, icya babiri mu bagabo, abakina ari umwe mu bagore, abakiri bato n’abafite ubumuga bakina bicaye mu tugare.

Yagize ati “Ni irushanwa rizitabirwa n’abakinnyi bavuye mu Rwanda, mu Burundi, RDC na Uganda mu babigize umwuga. Akarusho karimo ni uko n’abafite ubumuga bazakina kandi n’abatarabigize umwuga na bo bazakina byaba umuntu ku giti cye cyangwa babiri.”

Yakomeje ati “Riritabirwa cyane kuko ribamo ibihembo bishimishije cyane ku babigize umwuga. Buri mwaka rigenda rikomera kurushaho.”

Umuyobozi ushinzwe Imenyekanishabikorwa muri Cogebanque, Iyamuremye Antoine, yavuze ko bategura iri rushanwa mu rwego rwo kwegera Abanyarwanda bakina n’abakunda umukino wa Tennis, ngo bagezweho serivisi iyi banki ibafitiye.

Yagize ati “Abantu bagera hafi 300 bazitabira iri rushanwa, ni amakipe menshi azaza arimo ayo hanze n’ayo mu Rwanda. Ni abantu b’ingeri zitandukanye, biba byiza rero iyo tubegereye kuko benshi aba ari abakiliya ba Cogebanque cyangwa dushaka ko bakorana nayo bakungukira mu byiza byinshi ibafitiye.’’

“Kuri twe ni umwanya wo kugira ngo twegereze abakiliya n’abatari abakiliya ibyiza Cogebanque ifite nka Banki iri kwizihiza imyaka 20. Ni byinshi tuba dufite byo kubasobanurira nk’abantu bakina Tennis.”

Imwe muri serivisi zigezweho muri Cogebanque ni iyo gufasha Abanyarwanda kubona icumbi ‘Cogebanque Mortgage’, aho buri wese ashishikarizwa kugana ishami ry’iyi banki rimwegereye cyangwa agahamagara umurongo utishyuzwa 5050 agasobanurirwa uburyo ashobora kubona inzu yifuza bitamugoye.

Iyamuremye yavuze ko ari umwanya wo gusobanurira abakiliya byinshi kuri serivisi za Cogebanque no kubashimira gukorana n’iyi banki Nyarwanda itanga serivisi mpuzamahanga.

Ati “Kuri iyi nshuro tuzaboneraho kubasobanurira serivisi nshya twabazaniye ya ‘Cogebanque Mortgage’, aho umuntu agomba gutunga icumbi rye, ku nyungu ya 16%. Ni umwanya mwiza wo kubibabwira na bo bakabigeza kuri bagenzi babo.”

Cogebanque kandi ifite uburyo bugezweho bufasha abakiliya bayo kutagendana ibifurumba by’amafaranga binyuze mu gukoresha ikoranabuhanga rya Internet Banking, Mobile banking cyangwa amakarita ya Mastercard.

Cogebanque Tennis Open yatangiye yitabirwa n’Abanyarwanda gusa, ariko uko irushanwa rigenda rikura ryitabirwa n’ibindi bihugu byiganjemo iby’ibituranyi by’u Rwanda.

Ibibuga bizakoreshwa muri iri rushanwa ni bitandatu biherereye muri Cercle Sportif de Kigali mu Rugunga.

Cogebanque Tennis Open yitabirwa n'abantu benshi
Irushanwa rya Tennis riterwa inkunga na Cogebanque rihuriza hamwe abakinnyi bakomeye mu Rwanda no mu Karere
Minisitiri wa Siporo n'Umuco, Nyirasafari Espérance na Nyampinga w'u Rwanda wa 2018, Iradukunda Elsa mu batanze ibihembo mu irushanwa riheruka
Tennis ni umukino umaze kugira abakunzi benshi mu Rwanda
Iri rushanwa ryitabirwa n'abarimo abanyamahanga
Abakinnyi basaga 250 bategerejwe muri Cogebanque Tennis Open igiye kubera mu Rwanda ku nshuro ya kane

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza