Karate: Abakinnyi babiri bahagarariye u Rwanda muri shampiyona y’Isi bagiye gutangira guhatana

Yanditswe na Ngabo Roben
Kuya 6 Ugushyingo 2018 saa 08:14
Yasuwe :
0 0

Abakinnyi babiri bahagarariye u Rwanda muri shampiyona y’Isi y’imikino njyarugamba ya Karate, kuri uyu wa Kabiri nibwo batangira guhatana muri iri rushanwa riri kubera mu gihugu cya Espagne.

Abahagarariye u Rwanda ni Ngarambe Vanily na Ntungane Espoir Emery, bamaze kumenya abakinnyi bazahangana nabo.

Bahagurutse mu Rwanda ku wa 3 Ugushyingo 2018 bajya ku mugabane w’u Burayi aho bakoreye imyitozo y’iminsi ibiri mbere yo gutangira guhangana muri shampiyona y’isi yatangiye kuri uyu wa kabiri, izasozwa ku Cyumweru tariki 11 Ugushyingo 2018.

Mu ijoro ryo kuri uyu wa Kabiri nibwo kapiteni w’ikipe y’igihugu y’u Rwanda Ngarambe Vanily w’imyaka 25 ukina mu cyiciro cy’abatarengeje ibiro 84 atangira gukina, aho ahangana na Heidar Agust Sveinbjornsson ukomoka muri Iceland.

Mugenzi we Ntungane Espoir Emery we azaseruka kuri uyu wa Gatatu tariki 7 Ugushyingo 2018, aho azahangana n’Umutaliyani Luigi Busà.

Mbere yo gutangira guhangana Ngarambe Vanily yatangarije IGIHE ko bafite intego yo kuzamura ibendera ry’u Rwanda mu Isi y’umukino wa Karate, aho nta mateka akomeye u Rwanda rusanganywe.

Ati “Tumaze iminsi twitegura kuko ni irushanwa rije rikurikira shampiyona ya Afurika twakiriye kandi tuyitwaramo neza. Turashaka kwerekana ko umusaruro twabonye muri shampiyona yabereye iwacu twari tuwukwiriye. Intego y’ibanze dufite aha ni ugushaka itike y’imikino Olempike izabera Tokyo muri 2020”.

Iyi mikino yose iri kubera muri WiZink Center Sport Hall isanzwe ikoreshwa n’amakipe ya Volleyball na Basketball ya Real Madrid.

Ngarambe Vanily na Ntungane Espoir Emery bihaye intego yo gushaka itike y'imikino Olempike bitwara neza muri shampiyona y'isi
Imikino yose iri kubera muri WiZink Center Sport Hall iri i Madrid

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza