00:00:00 IGIHE NETWORK KN KINYARWANDA EN ENGLISH FR FRANCAIS

Ben Kayiranga yahuje imbaraga na Amag, Riderman yongera kugaruka… Indirimbo nshya za Weekend

Yanditswe na Uwiduhaye Theos
Kuya 14 May 2022 saa 09:28
Yasuwe :

Abakurikira IGIHE by’umwihariko igice cy’imyidagaduro bamaze kumenyera ko mu mpera za buri Cyumweru, dukora urutonde rw’indirimbo nshya z’abahanzi zirimo iz’abakizamuka n’abamaze kubaka izina. Ni gahunda igamije guteza imbere umuziki nyarwanda.

Twakoze urutonde rw’indirimbo zishobora kugufasha kuryoherwa na yo cyane ko indirimbo zimwe na zimwe zishobora kuba zitazwi ariko ari nziza.

Ngwino

Ni indirimbo ya Ben Kayiranga yakoze mu myaka 26 ishize yasubiyemo afatanyije n’umuraperi Amag The Black, Mary Igena ndetse na Producer Ayoo Rash.

Yavuze ko Amag The Black ari we watumye afata icyemezo cyo kongera kuyisubiramo nyuma y’igihe yari imaze. Ati “Hari amashusho banyoherereje ya Amag The Black avuga ko iyi ndirimbo ariyo yatumye akora umuziki.”

Yaje gufata umwanya akurikirana Amag The Black asanga hari ibyo bahuje mu muziki no mu buzima busanzwe cyane ko Amag akora Frigo mu gihe Kayiranga akora amashanyarazi. Yahise afata iya mbere ajya kureba uyu muhanzi batangira umushinga w’iyi ndirimbo batyo.

Kayiranga amaze iminsi mu Rwanda ni na ho yafatiye amashusho y’iyi ndirimbo.

Mbogamizi

Ni indirimbo ya Mupenzi Inshongore ukora injyana ya gakondo. Iyi ndirimbo ye nshya ni iyo yahimbiye umugore we. Uyu muhanzi hari aho aririmba ati “Nkinguruka ndirimbe izo ngabire yihariye. Mureke ashingure intambwe yicume ansange. Mpigamire ngo mukozeho imitwe y’iminwe. Afite ubutumwa bw’Impamba Imana yamuntumyeho.”

Yabwiye IGIHE ati “Mbogamizi rero ni iy’urukundo natuye umufasha wanjye. Ariko yafasha benshi bakundana nifuje ko abumva ikinyarwanda bose bayikoresha bakayumva kandi izabaryohera cyane ndabihamya ntabwo kandi ndekeraho kuko mfite ibihangano byinshi mbikiye abakunzi ba gakondo biri hafi gukurikira.”

Uyu muhanzi avuga ko ari umuhanzi wa gakondo kuko yayibayemo igihe kinini akagira uruhare mu gushinga amatorero nawe kandi akayabamo. Ni umutaramyi byahamye cyane urugero hari itorero rizwi cyane ryaciye ibintu muri Kigali rikorera Kimironko ryitwa Inshongore z’Urukaka akaba umwe mu baritangije hari kandi Indahangarwa ryo yararishinze aribera umuyobozi.

30 Mins

Ni indirimbo ya Radjab Shyirambere Kevin [ Famous Gets ] Umuraperi ukomoka i Nyamirambo mu Mujyi wa Kigali ivuga ku rukundo rwo kwimara ipfa. Yumvikanamo inkuru y’umusore ufite urukumbuzi rw’umukunzi we wifuza ko bamarana iminota 30 bakimara ipfa.

Ati “Inyanja irimo imiraba ngashya impande zose ubwato bwanjye ntiburohama mu mivu n’imihengeri.”

Famous Gets ubusanzwe ni umuririmbyi, umwanditsi w’indirimbo, umusizi akaba n’umuraperi. Aherutse gushyira hanze indirimbo yise ’40’ ikubiyemo ubutumwa bwo kunenga abantu baciraho abandi iteka.

Ni wowe

Ni indirimbo y’umuhanzikazi Gloria Cyuzuzo, uyu mukobwa asanzwe ari umunyeshuri wiga ubuganga muri Kaminuza y’u Rwanda akaba n’umuririmbyi. Irimo ubutumwa bw’urukundo nyarwo yageneye umukunzi we ku munsi wabo w’ubukwe.

Cyuzuzo kandi akaba anazwi cyane muri Rwanda Catholic All Stars no mu marushanwa atandukanye yo kuririmba yagiye yitabira hano mu Rwanda, harimo Supra Voice. Si ibyo gusa afite umushinga wagutse wo gukomeza kwerekana impano ye; binyuze cyane cyane mu ndirimbo ziri mu njyana ya Opera imenyerewe mu bazungu.

Urakomeye

Ni indirimbo Imana yamuhaye ayikomora ku ijambo ry’Imana risangwa mu Kuva 3: 13-15. Muri iri jambo Imana yabwiraga umukozi wayo Mose ngo ajye gucyura ubwoko bwayo muri Egiputa iramubwira ngo uzababwire ko ndiho kandi nahozeho kandi nyuma yabakujeyo amaboko akomeye.

Isaac Rabine iyi ndirimbo yayihuriyemo na Gentil Misigaro na Patient Bizimana. Rabine yakuriye mu Rwanda, yaririmbaga muri chorale nkuru ya ADEPR Nyarugenge yitwa Hoziana yabayemo imyaka irenga 10 n’andi matsinda harimo nka The Worshipers Team n’ahandi hatandukanye. Asengera muri ADEPR Namur mu Bubiligi.

Bayoboke b’Uhoraho

Ni indirimbo y’umuhanzi Jean de Dieu Ngendahayo ukunze kwiyita Ishongore ya mwiza. Yavuze ko ari nk’umuvugo wo kuvuga ibigwi Imana. Ati “Ni nk’umuvugo wo kurata ibyiza Uhoraho Imana ikorera umuntu muri byinshi anyuramo ariko ikaza kumuhindurira amateka ahari amaganya hagahinduka umunezero.”

Jean de Dieu Ngendahayo ubusanzwe avuka mu karere ka Nyamasheke i Burengerazuba ubu atuye mu nkengero z’Umujyi wa Kigali afite umugore n’umwana umwe. Yatangiye gucuranga mu 2003.

Yanditse indirimbo zitandukanye z’Amakorali harimo “Ngwino Roho Muhoza” ya Chorale BUUIA yo muri St Famille. Harimo nka Ndagiwe n’Umushumba mwiza yakunze no gukoreshwa mu bitaramo n’izindi.

Hejuru

Ni indirimbo y’umuhanzi mushya witwa Jowest. Igaruka ku musore wihebeye umukobwa. Hari aho aririmba ati “Reka nze nifunge icyangwe kirenze, wenda bazajya bakeka ko ndenze [...] Hariho abashaka kukwegukana ntibazi ko namaze kukwegukana, igihe kiraje reka mberurire ubu njye n’umukunzi wanjye ntitwikoraho. Ikintu batumva ni ukuntu unyumva, ikintu batabona ni ukuntu umbona.”

\

Nyegamo ya Nyagasani

Ni indirimbo Riderman yahuriyemo na Producer Chrisy Neat ukorera mu Ibisumizi akaba ari na ho yayitunganyirije. Indirimbo nshya ya Riderman yuzuyemo amagambo akangurira urubyiruko gukunda Igihugu.

Mu nyikirizo yayo yaririmbwe na Chrisy Neat bagira bati “U Rwanda ni Igihugu cyanjye, ururwanya ni njyewe aba arwanyije, sinzamureka ngo arugenze uko ashatse ni urwanjye, nzarurinda!.”

Kanoheli Christmas Ruth wafashe izina rya muzika rya Chrisy Neat, ni umwe mu bakobwa barangije amasomo mu Ishuri rya Muzika rya Nyundo.

Cope

Ni indirimbo y’umuhanzi Gitego Cedric ukoresha amazina ya Winner Messiah II. Igaruka ku kuntu abantu bamwe barya imitsi y’abandi ku buryo abakabaye barengerwa basigara babayeho nabi kubera abandi bita ku nyungu zabo kurusha iza rubanda.

Narayagaye

Ni indirimbo y’umuhanzi Giraye Jean wamenyekanye nka T-Rock mu ndirimbo yise ‘Nimba Padiri’ nyuma akaza guhindura izina akiyita Joni Boy. Igaruka ku musore wasazijwe n’umukobwa kubera ubwiza bwe.

T-Rock Joni Boy cyangwa se Jonib afite imyaka 27. Yatangiye umuziki mu 2014. Mu ndirimbo yakoze harimo ‘Mu mutwe’ yakoranye na Bruce Melodie , ‘Zanirindi’ ‘Ku izima’, ‘Amerika’, ‘Nimba Padiri’ yasubiranyemo na Bulldogg n’izindi.

Uziye igihe

Ni ni indirimbo y’umuhanzi Yverry yahimbiye umugore we nyuma yo gusezerana nawe mu mategeko.

Rugamba Yves uzwi nka Yverry aheruka gusezerana mu Murenge na Uwase Vanessa uzwi nka Vanillah baherutse kwemeranya kubana akaramata. Ni umuhango wabereye mu Murenge wa Kimihurura kuri uyu wa 5 Gicurasi 2022.

Yverry na Uwase bari bagaragiwe na bake mu nshuti n’abo mu miryango yabo. Aba bombi basezeranye imbere y’amategeko mu gihe habura iminsi mike bagakora ubukwe buteganyijwe ku wa 12 Kamena 2022.

Mu birori byo gusezerana imbere y’amategeko, Yverry yari aherekejwe n’inshuti ze zirimo n’abahanzi nka Olivis wo muri Active Group, Danny Nanone na Mento.

Ukuri

Ni indirimbo y’umuhanzi Eesam na Mr Kagame. Ni indirimbo igaragaza ko ukuri ari ikintu gikomeye mu buzima ariko byagera mu rukundo bikaba akarusho. Iyi ndirimbo aba bahanzi bishyira mu mwanya w’umusore wakunze umukobwa ariko we akamuhemukira undi akarenzaho agataha ubukwe bwe.

Uwo Rizagwira

Ni indirimbo nshya y’umuhanzi Yampano. Igaruka cyane ku mvune abantu batandukanye bahura nazo kugira ngo bagere ku nzozi zabo rimwe na rimwe bagashukwa n’abo bagendana bababwira ko nibatanywa ibiyobyabwenge cyane nk’abahanzi ntaho bazagera.

Hari aho aririmba ati “Icyo none ntibivuze igeno ryawe, ubyizere. Kandi iraha rirema urwango n’agato kava ku iguye, gabanya impungenge.”

Ntuzibagirwe ineza

Ni indirimbo ya Maurice Umwami uzwi nka Maurix Baru. Igaruka ku gukangurira abantu guhora bibuka ineza y’Imana kuri bo.

Maurix yamenyekanye cyane kuri studio ye yitwaga “Maurix music studio”, iyi yafashije benshi mu bahanzi mu myaka yo ha mbere ubwo uyu musore yari akiga muri Kaminuza y’u Rwanda i Butare.

Nyuma yo kurangiza amashuri, Maurix yimuriye studio ye mu Mujyi wa Kigali ayikura i Huye. Mu 2017 nibwo yabonye amahirwe yo kujya mu Buholandi kwiga icyiciro cya gatatu cya kaminuza.

Nyuma yo kurangiza amasomo akanabonayo akazi, ntabwo byamworoheye ko ahita agaruka mu Rwanda ngo akomerezeho iby’umuziki.

Mu minsi ishize nibwo Maurix yabonye akazi kamusaba kugaruka mu Rwanda bituma ahita anatekereza uburyo yasubukura ibijyanye n’umuziki.

Fora

Ni indirimbo y’umuhanzi Mayin. Niyo ya mbere ashyize hanze. Irimo ubutumwa bwo gutaka umukunzi. Uyu musore yishyira mu mwanya w’umusore ugirira amarangamutima umukunzi we akamutera. Mu nyikirizo akaririmba ati “Fora Muteteri wanjye, mbwira Mutoni wanjye[...] Erega ni wowe wanjye, nta wundi wanjye.”

Uko Yandyoheye

Ni indirimbo yahuriyemo abahanzi Jonathan Nish & Papi Clever. Muri iyi ndirimbo aba bahanzi baba bagaragaza ko bashaka kubwira abantu Yesu yabaryoheye. Hari aho bairimba bati “Mu rubyaro rwe, ndi Igikomangoma mu bwami bwe, mu kiganza cye, hari amahoro narahiriwe, ntazigera andeka.”

Nishimwe Jonathan[Jonathan Nish] wahurije hamwe aba bahanzi muri iyi ndirimbo ni umuramyi akanahimbaza Imana mu ndirimbo, ni umwanditsi w’indirimbo akaba n’umucuranzi. Ni n’umunyeshuri.

Yavukiye mu karere ka Rusizi, afite imyaka 24. ‘Uko yandyoheye’ yayishyize hanze mu 2018 ubwo yatangiraga umuziki, ubu nibwo yakoreye amashusho.

Nishike Mkono

Ni indirimbo y’umuhanzi Jonathan RB aho uyu muhanzi aba asaba Imana kumufata ukuboko. Araririmba ati “Mfata ukuboko Mana, unyobore mu nzira yawe, ntagufite nta hantu nagera Mana.”

  Inzara

Ni indirimbo Itsinda riramya rikanahimbaza Imana rya Comfort People Ministries ryahuriyemo n’Umuraperi Bull Dogg.

Ni iya kabiri bakoranye n’umuraperi nyuma y’iyitwa ‘Ubutunzi’ ryakoranye na nyakwigendera Jay Polly.

Comfort People Ministries igizwe n’abaramyi babarizwa mu matorero atandukanye. Iri tsinda rimaze gushyira hanze indirimbo ‘Ni we mutabazi’, ‘Jambo’ ryakoranye Sintex, ‘Ubutunzi’ ryahuriyemo na Jay Polly na ‘Praise you Lord’ ryakoranye n’Umunyamerika Anthony Sullivan.

  Edi

Ni indirimbo y’umuhanzi Ndabarinze Manoa uba muri Leta Zunze Ubumwe za Amerika.

Igitekerezo cyo kuyandika cyashibutse ku ijambo riri mu Gitabo cya Yosuwa 22:34 hagira hati “Nuko Abarubeni n’Abagadi bahimba icyo gicaniro Edi, risobanurwa ngo ni umuhamya wo muri twe, y’uko Uwiteka ari yo Mana.’’

Sintera inda njyenyine

Ni indirimbo nshya y’umuhanzi Daniel Ngarukiye afatanije na Soul T. Igaruka ku mukobwa washutswe n’umuhungu akamutera ariko nyuma akaza kumwihakana, uyu mukobwa aza kubura uko abigenza akimara kubimenya akajya asaba ubufasha umuhisi n’umugenzi, nyina akamubwira ati “Irya mukuru ntirihera”, umukobwa akamusubiza ati “Ntirigitinda”.

Aba bahanzi bagira inama abakobwa yo kutajya baha ikaze buri musore wese babonye ubabeshya ko yabakunze kuko, bamwe baza bishakira kuryamana nabo gusa byarangira bakigendera.

  Inshuti Nziza

Ni indirimbo ya Uwase Ruth usanzwe aririmba muri Korali Bethlehem yo muri ADEPR Gisenyi. https://www.igihe.com/imyemerere/muzika/article/uwase-ruth-uririmba-muri-korali-bethlehem-y-i-gisenyi-yatangiye-umuziki-nk

“Inshuti Nziza” yasohoye amashusho yayo ni iyo yahereyeho agitangira umuziki. Irimo ubutumwa buhumuriza umuntu wese usenga kuko ubutumwa burimo bugaragaza ko nta wundi wo kwizerwa keretse Yesu wenyine.

Uwase Ruth yatangiye kuririmba akiri umwana, nyuma y’igihe gito yerekeje muri Korali Bethlehem ADEPR Gisenyi mu Karere ka Rubavu. Uyu mukobwa anabarizwa mu muryango witwa “The Sister’s” w’abaririmbyi babarizwa muri iyi korali, bafite umwihariko mu kuririmba bakoresheje amajwi yabo y’umwimerere.

  Nguwo Araje

Ni indirimbo yakozwe na Gikundiro Rehema. Uyu muhanzikazi uri mu bafite ijwi ryiza akorera umuziki muri Leta Zunze Ubumwe za Amerika.

Mbere yo kwimukira hanze, Gikundiro Rehema yanyuze muri korali zitandukanye zirimo na Korali Shalom yo muri ADEPR Nyarugenge.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .