Dady De Maximo yifashishije umuvugo asobanura agahinda yatewe n’urupfu rwa Alexia Mupende

Yanditswe na Muvunyi Arsène
Kuya 10 Mutarama 2019 saa 01:46
Yasuwe :
0 0

Umunyamideli Dady De Maximo Mwicira-Mitali, yanditse umuvugo muremure, ugaragaza intimba yatewe n’urupfu rwa Alexia Uwera Mupende wishwe mu ijoro ryo kuwa 8 Mutarama 2018.

Uyu ni umunsi wa kabiri abanyarwanda bari mu mpande zitandukanye z’Isi bumvise inkuru mbi y’urupfu rw’umunyamideli Alexia Uwera Mupende. Intimba ku mitima iracyari yose, abo bari birirwanye baganira babyumva nk’inzozi ndetse benshi ntabwo barabasha kubyakira.

Yishwe mu ijoro ryo kuwa Kabiri, atewe icyuma mu ijosi bikaba bikekwa ko yaba yarishwe n’umukozi w’iwabo mu rugo i Kanombe, wahise anaburirwa irengero.

Umunsi w’ejo hashize, imbuga nkoranyambaga z’abantu ku giti cyabo n’inzego za leta, zari zuzuye amafoto ya nyakwigendera, aherekejwe n’amagambo y’akabaro, ibigwi bye no gukomeza umuryango.

Dady De Maximo Mwicira-Mitali umwe mu ba mbere binjiye mu bikorwa byo guhanga imideli akaba yaranakoranye by’umwihariko na nyakwigendera, yanditse umuvugo usobanura agahinda gasobetse umutima we.

Muri uyu muvugo agaragaza Mupende nk’umukobwa w’imico myiza, w’intangarugero kandi w’umunyabwenge.

Yagarutse ku buhanga yari afite mu kumurika imideli ubwo muri 2007 baserukiraga u Rwanda mu marushanwa ya Miss Common Wealth bagatambukana ishema n’isheja.

Dady De Maximo yemeje ko nta gushidikanya Alexia roho ye iri ijabiro kwa jambo n’ubwo agiye agikenewe cyane.

Umuvugo wa Dady De Maximo Mwicira-Mitali

Umunyamideli wa mbere mu Rwanda Alexia Mupende wishwe!

Nshuti yanjye twabanye mu bihe byiza Alexia Mupende; umutwe w’iyo nkuru ejo wanyicaje umutima nkwibarize se!!! Mbega Isi
Ubuzima si ubu
Kandi ubuzima ntibwaba ubu
Ariko ubu bwabaye uku,
Ubuzima si ibi kandi
ubuzima bwibi, si buzima bwo kwakira.
Nkimenya inkuru mbi yejo
Imbone ntiyarenze irembo,
Umutima uragobwa ntiwarimba
Ndaribwa ndazinukwa kandi ndashuhererwa.

Ibi niki ko adutwaye ingenzi?
Mwali mwiza, umwiza hose,
Si bwa bwiza bugwizwa uwatashye
Ibyawe byivugiraga, ibyawe byisobanuraga
Ibyawe byabaga mu buhanga, kandi m’uguhanga aho washyiraga ibiganza, umutima, umurava ntawahavaga mudacyuye inganji.

Ejo hatari ubu, ejo hashize hatazagaruka,
Ejo hacuze umuborogo, ejo hancuze umwuka, urupfu rwawe ruziba umutima mbura ijambo rimwe mu ryo nsanganywe,
Uwo munabi wagize nabi, iyo nabi itunyaze uwacu, Umwaka utangiranye intimba, imwe igize nabi, inabi ije nabi imbere yuko wambara agatimba ngo tuguherekeze bitinde, tukwizihire ubikwiye simbona tuguherekeza, iyo shusho iraremeye.

Twabanye mu bwiza, mu buto turahaha,
Mu kwiga tugana aheza, mu kubana turabiharanira, mu gukura duhitamo gukura inkweto umutima ukora ibihe byose
ngo tuzahirwe, umuhigo wari ubuzima ariko ishavu niri iryo bavuga ndaryumva, icyo ntumva nanze niyo saha yitambitse ibyiza by’imbere byinshi ntarondora.

Alexia mwiza, mwari ukwiye ibisigo,
Mwana warezwe aragwa ibyiza ngo bizamuherekeze ubuzima bwose usoje udahemutse, Mukobwa w’uburere n’ubupfura, umunyamurava, umunyabigwi,
Umukozi w’umunyamutima, nshuti yanjye twabanye isaha ntiyari iyi.

Isaha ntiyari iyi, igihe siki, umunota urahanda, isegonda ribyaye akaga, ishyano ntirigwira, iriryo kuryikorera ntibikunda. Niko nshuti yanjye ko twashyinguye benshi Ubu koko ibi niki? Uku gupfa gutya koko kuki bikwiye, kuki byaba ? Kuki byaduturamo? Kuki byakongera? Kuki byakubaho? Ese wowe kubera iki koko wataha nk’uku?

Ndakubaza ndagowe, ijoro ntiryakeye, umunsi wanze kwira, ejo nabuze icyo mvuga, intimba iganzwa n’umujinya, umwijima uratura, umutima ntiwatuza, mbura aho nkwirwa, inzu imbana nto, sinshobora kumva umuntu wahangaye inseko yawe ihoraho, sinshobora kumva uwatinyuka kuzimya urumuri, itara ryatangaga umunezero, umucyo w’umuryango kandi umwunganizi wa benshi; ikitamvamo nuko uwo muhanya wavuye mu bumuntu naketse ko wabanje kumusekera bimwe byawe ugirango arakina uwo mugome ukunyaze guheka.

Ndababaye cyane, imahanga si ahantu
Inkuru nkiyi ikwibutsa byinshi, ibyo twanyuzemo kenshi, tugasimbuka bimwe, ibindi bigatwara abacu batacumuye, uyu mugome ko atahushije byibura ngo agutize intambwe usanzwe umurusha ariko ngo ubeho tukwizihire?

Intimba irica, agahinda karahina, ariko inkota ni idutwaye umuhizi. Mupende Wakiraga neza abakugana, ntiwirataga cyangwa ngo wishongore nka benshi b’ubu, mu bwenge wacaga bugufi, mu ntego ukihuta kandi mu bikomeye mu kazi ukanyarutsa. Imfura nkawe mu ngiro no mu muco inkuru yawe ntiyacuze imiborogo, abahogoye ni benshi wari Umumararungu wicecekeye, ukaba umunyeshyaka utavuze menshi biragoye kwakira urupfu rwawe.

Twamenyanye kera ariko nkumenya neza mu bihe twoherezwaga na Leta guhagararira u Rwanda muri Miss Commonwealth/CHOGM 2007 ubuhanzi wari ubumazemo igihe, ariko kwerekana imyambaro ntiwabitangiye 2012 nkosore watangiye mbere, abakuzi watowe mu bakobwa batanu bagombaga guhagararira u Rwanda, Jolie Claudine Murenzi nanjye dusabwa kubaherekeza nibuka ko twatsinze ibindi bihugu cyane ahubwo akanama gakemura impaka kibaza uburyo u Rwanda rwaba urwa mbere kandi rwatumiwe yewe tutaranakolonijwe n’Abongereza!.

Abafana bari benshi b’abanyamahanga turi mu mahanga kandi gusa bafanaga u Rwanda; nabo twari kumwe muhagarariye u Rwanda mwaduhesheje ishema icyo nibuka nuko abayobozi batoraga bahisemo kuduha umwanya wa kabiri ngo bahikure. Mubo twajyanye ntabwo ari uko watabarutse nabo ibi babishimangira wari umunyeshyaka intambwe n’ubuhanga mu kugenda, mu kumenya kwisobanura kandi koko mu kumenya gutaka igihugu cyawe wari umuhanga mugahuza mwese mu kuganira neza kandi ntawe mwasobanuriraga ngo yo kutanyurwa;

Tubuze umuhanga mu ngeri usize icyuho ntawuzagusimbura; ntiwari umumurika myambaro gusa wari usobetse ubuhanga reka ukunde Imana yaguhaye impano kandi igutwaye utarananirwa ngo uhemberwe imirimo yawe, nubwo gutaha nk’uku ntakibishaka uwasaba yasaba ngo inkota isubire ahabikwa ikibi; ikibi ndakariye kandi nshavuriye gutaha gutya, nukuri bantu turekere aho ibi si iby’i Rwanda.

Ibihano birandura aka kaga birakwiye uwampa ubushobozi nagaba ubuzima ariko inkoramaraso, umutindi utunyaze ntazahirwe akwibagiwe azangare aturaje amajoro, azatuze asabye imbabazi naho ubundi ntazatuzwe ngo agoheke aticujije ntuhari bimwe byawe nziko wowe wamubabarira ariko kuri twe ibindi n’Imana yo kuduha gutwaza ariko ibi biragoye kubyakira.

Nkundira ngusezere nshuti yanjye ; inseko yawe irangose hose, ndahumiriza nkakubona henshi, nkundira ngusezere nubwo bigoye gutuza, nkundira nguhobere ahuri kuri twe nta rumuri nubwo hakonje wowe aho ubu umubiri wawe uruhukiye ndahamya ko umucyo ukikije roho yawe wari imfura ndabirahiye iruhukire mukobwa mwiza.

Simpari ngo ngusezere nkundira nkubwire ko mu bantu twabanye mu mwuga wo kwerekana imyambaro y’ubugeni n’isanzwe, mu bantu bakunda kwandika, bakunda kwikorera kandi bakunda imishinga; uri mutibagirana mu banyuze umutima wanjye ku bw’imikorere itatswe n’ubuhanga, ubupfura n’ikinyabupfura, nzagukumbura useka;

Nkundira ngusezere iyi si iwacu ariko mu by’ukuri nabonye byinshi nabuze byinshi ntawundi nifuriza gutaha nkawe kuko bituma nibaza impamvu twavuga Ngo « naka yitabye Imana » Ese kuki wayitaba bagukase ijosi? Ibyo ndabyanze kubyakira simbikozwa naka yishwe niryo jambo, uwo mutima mubi wamunzwe wica ucibwe iwacu burundu.

Nyemerera nguture Rugira, nyemerera nsoze; iruhukire kibondo, iruhukire nshuti nziza, isaha yawe urushinge rwahagaze ahabi hagoye nkundira nsabe Rurema akomeze benshi mu umuryango wawe, inshuti zatatanye kubw’iyi nkuru Rurema Aduhe kuguherekeza gitwali bigukwiye; Iy’Isi ntitwigisha ngo tubone uwakora yakoresha neza igihe cye nkawe. Numiwe kukurekura biragoye.

Ruhuka amahoro nshuti twabanye biragwa ibyiza.

RIP Alexia Uwera Mupende

Dady de Maximo Mwicira-Mitali

Benshi bananiwe kwakira urupfu rwa Alexia Mupende
Abanyamideli babuze umuntu w'ingenzi
Dady De Maximo ari mu bakoranye na Alexia Mupende kuva kera

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza