Mani Martin agiye gukorera album Iyamuremye w’imyaka 40 ucuranga gitari yakoze mu kajerekani

Yanditswe na Nsengiyumva Emmy
Kuya 9 Nzeri 2019 saa 11:15
Yasuwe :
0 0

Mani Martin uri mu bahanzi bamaze kubaka izina mu Rwanda, yiyemeje gufasha Iyamuremye Israel w’imyaka 40 wagaragaje ubuhanga mu gucuranga gitari, by’umwihariko akaba yaranayikoze yifashishije akajerekani, igiti n’insinga yatoraguye.

Tariki 31 Kanama 2019 mu Mujyi wa Kigali habereye igitaramo gikomeye cyahuriyemo abahanzi b’ibyamamare nka Orchestre Impala, Mavange Sudi na Byumvuhore.

Aba bahanzi bari bakereye gufasha abakunzi babo kwishimira isabukuru y’imyaka 100 Padiri Fraipont washinze HVP Gatagara yari kuba amaze iyo aba akiriho.

Ubwo iki gitaramo cyari kigeze hagati, Claude Kwizigira wari ukiyoboye yabwiye abitabiriye ko hari umuhanzi ugiye kubataramira batari basanzwe bazi ariko ufite impano.

Hazamutse umusore wavuze ko yitwa Israel ubundi atangira gucuranga gitari yikoreye ubwe mu ijerekani n’insinga. Yaracuranze abari muri iki gitaramo barizihirwa ku buryo ntagereranywa.

Mani Martin wari mu bihumbi by’abakunzi b’umuziki bari bitabiriye iki gitaramo yatahanye intego yo gufasha uyu mugabo ku buryo akabya inzozi ze. Ubu yiyemeje kumwishyurira album y’indirimbo.

Mani Martin mu kiganiro yagiranye na IGIHE yagize ati “ Njye narebye ubuhanga afite numva nkozwe ku mutima, ubu mpugiye mu gufasha Bill Ruzima mu mishinga ye ya vuba ariko bitarenze Ukwakira 2019 ndaba natangiye gukorana na Israel kuri album nshaka kumwishyurira.”

Mani Martin ahamya ko yaba ubuhanga mu miririmbire, mu gucuranga gitari n’ibindi byinshi bigaragaza Israel nk’umuhanzi wavamo icyamamare atijwe amaboko.

Iyamuremye Israel aganira na IGIHE yatangaje ko ari umugabo w’imyaka 40 wubatse ufite umugore n’abana babiri.

Yongeyeho ko asanzwe ari umuhanzi ariko yari atarabona amahirwe yo gutaramira mu gitaramo kinini nk’iki. Atangira umuziki yacurangiraga abantu bo mu muryango we mu gihe babaga bataramye.

Iyamuremye yavuze ko gitari yikorera, imwe ayigurisha amafaranga magana arindwi.

Ati “Ubujerekani simbubura, ibiti nabyo biba bihari, amaringi nkoresha nk’imirya nyura ahantu bakora amagare bakampa nkajya kwikorera gitari bayigura bakampa 700 Frw ubuzima bugakomeza.”

Ahamya ko yatangiye gukora gitari kuko yakundaga uburyo abantu bayicuranga ariko akabura ubushobozi bwo kugura igezweho.

Mani Martin yakozwe ku mutima n'impano ya Iyamuremye Israel yiyemeza kumufasha
Iyamuremye Israel acurangisha gitari yikoreye mu rubaho, akajerekani n'insinga atoragura

REBA HANO UKO IYAMUREMYE ARIRIMBA YIFASHISHIJE GITARI YIKOREYE


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza