Meddy agiye gutaramira muri Kenya

Yanditswe na Nsengiyumva Emmy
Kuya 11 Nzeri 2019 saa 09:50
Yasuwe :
0 0

Meddy ni umwe mu bahanzi bo mu Rwanda bamaze kugwiza abafana benshi mu bihugu binyuranye by’umwihariko ibituwemo n’abanyarwanda. Kuri ubu agiye gutaramira muri Kenya mu Mujyi wa Nairobi.

Uyu muhanzi usanzwe utuye muri Leta Zunze Ubumwe za Amerika yageze mu Rwanda mu minsi ishize yitabiriye ibirori byo Kwita Izina yari yatumiwemo.

Mu gitaramo cyo “Kwita Izina Concert”, Meddy yahuye n’akaga akurwa ku rubyiniro adasoje indirimbo yari yateguye,ibintu nawe yasabiye imbabazi abafana be.

Abinyujije ku mbuga nkoranyambaga akoresha yagize ati “Ndashaka kwisegura ku kuririmba igihe gito kwanjye kubera ibintu birenze ubushobozi bwanjye byabayeho. Ntabwo mu by’ukuri byari ubushake bwanjye.”

“Numvaga amajwi yanyu mu rwambariro mumpamagara. Mu by’ukuri nashakaga kuririmba buri ndirimbo nari nabateguriye. Murakoze kunyumva no ku rukundo rwanyu rw’ibihe byose. Kigali Arena nzagaruka. Kigali izahora ari iwacu haryoshye.”

Muri icyo gitaramo yaririmbye indirimbo ze eshatu, zirimo ‘Sibyo’, ‘Everything’ ye na Uncle Austin na ‘Ntawamusimbura’ n’agace gato k’iyo yise ‘Slowly’ arangije avangamo izindi ziganjemo iziri mu njyana ya Reggae nka ‘No Woman no cry’ , ‘Red Wine’ za Bob Marley n’izindi nke hashize iminota itageze kuri 20 ahita avanwa ku rubyiniro mu gihe yari yagenewe kuririmba igihe kigera ku isaha.

Nyuma yo kudahirwa n’igitaramo cyabereye i Kigali, Meddy agomba guhita ajya gutaramira mu Mujyi wa Nairobi mu kabyiniro kagezweho kitwa “B Club”.

Iki gitaramo kizaba tariki 12 Nzeri 2019 aho kwinjira bizaba ari amashilingi ya Kenya igihumbi (1000 KSH), bivuze ko ari ibihumbi umunani by’amafaranga y’u Rwanda (8000 Frw).

Iki gitaramo kizwi nka Rwanda Beauty Night si Meddy gusa ugitumiwemo cyane ko aka kabyiniro kajya gatumira abandi bahanzi. Abanyarwanda baherukayo ni The Ben, Charly na Nina.

Igitaramo cya Meddy i Nairobi
Meddy agiye gutaramira muri Kenya

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza