Mutoni Fiona yatowe mu bakobwa 32 bazahatanira ikamba rya Miss Africa

Yanditswe na Munyengabe Murungi Sabin
Kuya 7 Ukuboza 2017 saa 09:50
Yasuwe :
1 1

Fiona Mutoni Naringwa wabaye igisonga cya Gatatu cya Nyampinga w’u Rwanda umwaka wa 2015 ari mu bakobwa bazaturuka mu bihugu 32 bya Afurika bazahatanira ikamba rya Miss Africa 2017.

Fiona Mutoni Naringwa asanzwe ari umunyamideli ukomeye ndetse afite ikamba ry’igisonga cya Gatatu cya Miss Rwanda 2015. Ubu aritegura irushanwa rikomeye ry’ubwiza rizabera mu Mujyi wa Calabar muri Nigeria.

Irushanwa rya Miss Africa rigiye kuba ku nshuro ya kabiri, umwaka ushize ari nabwo ryatangijwe ryitabiriwe n’abakobwa 18, u Rwanda rwahagarariwe na Rachel Uwineza[umunyamideli wavukiye muri Kenya], icyo gihe ikamba ryahawe umukobwa wo muri Angola.

Mu kiganiro News Agency of Nigeria (NAN) yagiranye na Thomas Ikpeme wungirije Guverineri wa Leta ya Cross River ari nayo itegura irushanwa yavuze ko Miss Africa w’uyu mwaka azatangazwa mu birori bizaba mu ijoro ryo kuwa 27 Ukuboza 2017.

Yongeyeho ko kuri iyi nshuro ya kabiri ibihugu byatumiwe byiyongereye, byavuye kuri 18 bigera kuri 32 birimo u Rwanda, Gabon, Mali, Nigeria, Burkina-Faso, Morocco, Algeria, Tunisia, South Africa, Sudan, Uganda, Tanzania n’ibindi.

Abakobwa batoranywa hakurikijwe ibisabwa bireberwa ku rutonde rw’abiyandikisha bo muri Afurika yose bafite imyaka hagati ya 18 na 25. Irushanwa rikaba ritegurwa hagamijwe gusakaza ubutumwa bwo kwita no kubungabunga ibidukikije bahereye mu Mujyi wa Calabar no kuwumenyekanisha nka kamwe mu duce twa Nigeria dukorerwamo ubukerarugendo.

Yagize ati “Abo bakobwa 32 bazaba bahagarariye ibihugu bingana gutyo bya Afurika, urumva bazaba bakoresha imbuga nkoranyambaga bose bavuga irushanwa barimo n’ubwiza bw’Umujyi wa Calabar. Ni ikintu gikomeye kuri leta yacu, Calabar izamenyekana kurushaho.”

Yongeyeho ati “Mu bahanzi dufite harimo Davido, Teckno, Wizkid, Flavour, Patoranking, aba harimo abo tuzifashisha mu gususurutsa ibirori bya Miss Africa uyu mwaka.”

Mu mwaka ushize hatowe umukobwa wari waserukiye Angola witwa Loretta Mendez, yatowe mu birori byabaye mu ijoro ryo kuwa 26 Ugushyingo 2016 kuri Calabar International Conference Centre muri Leta ya Cross River.

Miss Mendez yahembwe amadorali 25, 000 n’imodoka nshyashya yo mu bwoko bwa SUV Jeep yatanzwe na Guverineri Ayade.

Mutoni Fiona Naringwa yagizwe igisonga cya Gatatu cya Miss Rwanda 2015
Miss Mutoni Fiona ni we uzaserukira u Rwanda muri Miss Africa 2017
Uwineza Rachel waserukiye u Rwanda mu 2016

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza