Ne-Yo yemeje ibihumbi byahuriye muri Kigali Arena mu gitaramo cyitabiriwe na Perezida Kagame- Uko cyagenze (Amafoto)

Yanditswe na Ishimwe Israel, Uwiduhaye Theos
Kuya 7 Nzeri 2019 saa 09:16
Yasuwe :
0 0

Umunyamerika Shaffer Chimere Smith wamamaye mu muziki nka Ne-Yo [Gogo] yagaragarijwe urukundo mu gitaramo gikomeye yaririmbyemo mu Mujyi wa Kigali cyanitabiriwe na Perezida Kagame.

Iki gitaramo cyiswe "Kwita Izina Concert" cyabereye mu nyubako ya Kigali Arena mu ijoro ryo ku wa Gatandatu rishyira ku Cyumweru, tariki ya 8 Nzeri 2019.

Cyateguwe n’Ikigo cy’Igihugu cy’Iterambere (RDB) mu bikorwa biri muri gahunda zo gusoza umuhango wo Kwita Izina abana 25 b’ingagi, wabereye mu Kinigi mu Karere ka Musanze ku wa 6 Nzeri 2019.

Ni ku nshuro ya mbere Kigali Arena ikorewemo igitaramo kuva yatahwa ku mugaragaro mu birori byabaye ku wa 9 Kanama 2019.

Abacyitabiriye batashye banyuzwe n’umuziki bagaburiwe n’umuhanzi Ne-Yo ariko bamwe batahana akangononwa kubera ipfa batamazwe na Meddy.

Abakunda ibirori no kwidagadura baserutse babyambariye biteguye gutaramana n’uyu muhanzi wabanjirijwe ku rubyiniro n’Abanyarwanda barimo Itsinda rya Charly na Nina, Bruce Melodie, Riderman na Meddie.

UKO IGITARAMO CYAGENZE:

-  Amafoto utabonye ya Perezida Kagame mu gitaramo cyo “Kwita Izina’’

Perezida Kagame asuhuza abitabiriye igitaramo cyabereye muri Kigali Arena
Perezida Kagame yakandagije ikirenge muri Kigali Arena aherekejwe n'abandi bayobozi barimo uw'Ikigo cy'Igihugu cy'Iterambere, Clare Akamanzi
Perezida Kagame yitabiriye igitaramo gikomeye cyatumiwemo Ne-Yo
Perezida Kagame aganira n'umubyinnyi w'icyamamare, Sherrie Silver
Umukuru w'Igihugu yari afite akanyamuneza ko kwitabira igitaramo cyaririmbyemo Ne-Yo
Perezida Kagame aganira na bamwe mu bayobozi bitabiriye igitaramo
Kigali Arena irimo televiziyo za rutura zifasha abantu kureba amashusho y'ibiyiberamo bayitegeye neza
Ibihumbi by'abitabiriye "Kwita Izina Concert" bakiranye urugwiro Perezida Kagame
Ubuheta bwa Perezida Kagame, Ingabire Ange Kagame ari mu bitabiriye iki gitaramo
Byari ibyishimo bidasanzwe ku bihumbi by'abaganuye ku gitaramo cya mbere cyabereye muri Kigali Arena

-  Ne-Yo yikuye ishati mu gusoza igitaramo yakoreye i Kigali

12:56: Mu minota ya nyuma y’igitaramo Ne-Yo yifashishije indirimbo zicurangitse mu buryo buvudutse zirimo ‘‘Play Hard’’ yakoranye na David Guetta na Akon; ‘‘Tonight’’.

Indirimbo zisoza igitaramo zakuye hasi ibihumbi by’abakunzi b’umuziki bateraniye muri Kigali Arena, barahaguruka barabyina karahava.

Uyu muhanzi yanyuzagamo akajya mu bafana bagafatanya kuririmba. Umurishyo ushyira iherezo kuri iki gitaramo wakomwe saa Sita n’iminota 57.

-  Ne-Yo ari kuririmba mu buryo bwa Semi-live

Ushobora kumva ko uyu muhanzi ari kuririmba semi-live ukagira ngo ni umuziki woroheje.

Ne-Yo yitwaje abacuranzi b’abahanga bari kuvanga umuziki uryoheye ugutwi ariko zimwe mu ndirimbo yakoranye n’abandi bahanzi ari kuziririmba yagera aho baririmbye abari ku buhanga bw’ibyuma bagashyiramo ijwi ryabo, na we agakomeza kuririmba ariko ku buryo utahita urabukwa.

Ne-Yo afatanya ubuhanzi no kubyina, kwandika indirimbo, gukina filime no gutunganya indirimbo
Uyu muhanzi yigaruriye imitima ya benshi binyuze mu bihangano bitandukanye birimo “So Sick”, “One In A Million” “Miss Independent”, “Marry You”, ‘‘Sexy love’’ yakoranye na Diamond Platnumz n’izindi
Ne-Yo w’imyaka 39 yatangiye kumenyekana mu 1998 . Yatangiye umuziki akiri umunyeshuri, aba mu itsinda ryitwaga Envy ryaje gusenyuka mu 2000, ahita awukora ku giti cye n’ubwo bitari byoroshye

12 :41: Ne-Yo yabyinishije abakobwa b’i Kigali n’Umunya-Tanzania

Ubwo yaririmbaga indirimbo yitwa Push Back yakoranye na Stefflon Don, Ne-Yo yahamagaye abakobwa batatu barimo babiri b’Abanyarwandakazi n’umwe ukomoka muri Tanzania bafatanya kubyina, bakaraga umubyimba mu buryo bwatangariwe cyane.

Ne-Yo yahise abaza uwitwaye neza muri bo hanyuma Umunya-Tanzania ahundagazwaho amajwi menshi ananyura uyu muhanzi wahise amwambika agakomo, anamuhemba kumubyinisha.

- Yahinduriye imyenda ku rubyiniro

Nyuma yo kuririmba indirimo zitandukanye mu cyiciro twakwita icya mbere, Ne-Yo yahinduye imyenda yo hejuru.

Mu gihe ku nshuro ya mbere yari yambaye ishati irimo amabara yiganjemo ayijimye, yagarutse ashyiramo ishati yera n’ingofero y’umweru.

Yahise aririmba indirimbo zirimo ‘‘Mad’’ yakunzwe cyane. Yanishimiwe mu ndirimbo ye iri mu nshya aheruka gukora yitwa Push Back yakoranye na Stefflon Don.

Ne-Yo ari gucurangirwa n’abantu bane barimo babiri bari gukirigita imirya ya gitari, uwa piano n’uw’ingoma.

Yanaririmbye n’indirimbo zirimo izo yandikiye abandi bahanzi bakomeye muri Leta Zunze Ubumwe za Amerika. Izo yifashishije zirimo ‘‘Let Me Love You’’ ya Omarion’’ na ‘‘Irreplaceable’’ ya Beyoncé.

- Nta munota wo kwicara !

Ne-Yo yaririmbye indirimbo zitandukanye zirimo izo yamamayemo cyane. Yageze ku yitwa ‘‘So Sick’’ arishimirwa cyane.

Uyu Munyamerika yanyuzagamo akaganiriza abitabiriye igitaramo biganjemo abamaze igihe kirekire bahagaze, bafatanya kubyina.

Abatari bake usibye abari mu myanya ya 3000 Frw, n’abo mu y’icyubahiro na bo bavuye hasi bakata umuziki nta kibatangira.

Yagize ati ‘‘Ni ku nshuro ya mbere ngeze mu Rwanda ariko naranyuzwe cyane. Nakunze imbaraga mufite. Uru rukundo rurarenze.’’

- Ne-Yo yateye “Miss independent”, Abanya-Kigali baramwikiriza

Imwe mu ndirimbo zatumye ubuhanzi bwa Ne-Yo buhamya ibigwi harimo n’indirimbo Miss independent.

Iyi ndirimbo yasohotse muri Nzeri 2008 yamamaye mu mahanga yose, ku migabane yose y’Isi.

Yayigezeho benshi bayisamira mu kirere, batangira kuyiririmbana, wumvaga amajwi y’abafana yiganje cyane nubwo abacuranzi ba Ne-Yo bafite umuziki uyunguruye unadunda ku buryo buhambaye.

Uyu muhanzi waririmbaga akananyuzamo akabyina asa n’unyerere mu mavuta, yayisoje, ahabwa amashyi atagira ingano.

Ne-Yo yashimishije ibihumbi byahuriye muri Kigali Arena mu gitaramo cyo "Kwita Izina"

11:55: Ne-Yo yageze ku rubyiniro ahagurutsa abantu ibihumbi bitabiriye iki gitaramo, bose bajya mu bicu barasimbuka. Yahereye ku ndirimbo "Let’s Go" yakurikijeho "She Knows" nyuma yayo aririmba "Miss Independent" aho abantu bose bamufashije bakaririmbana na we.

Ne-Yo w’imyaka 39 ari mu bahanzi bafite izina rikomeye mu muziki wo muri Leta Zunze Ubumwe za Amerika

- Ne-Yo yakandagiye ku rubyiniro muri Kigali Arena igitaramo gifata indi sura

Umushyushyarugamba Tino yabanje kubwira abafana ko igihe cyo gutegura ibyuma cyarangiye. Yabasabye kwitegura kwakira umuhanzi ukomeye mu muziki wa Leta Zunze Ubumwe za Amerika.

Ne-Yo akigera imbere y’abitabiriye iki gitaramo yakiranwe ubwuzu, abenshi barahaguruka bamuha amashyi yo kumwereka ko bamuhaye ikaze mu Mujyi wa Kigali no mu Rwanda by’umwihariko.

Mbere yo guseruka habanje kwerekanwa amashusho agaragaza ibihe by’ingenzi mu muziki we, uko afatanya kuririmba, kwandika indirimbo n’indi mirimo yatumye ahabwa ibihembo birimo ibya Grammy Awards.

Yatungutse ahirengeye benshi mu bari muri Kigali Arena bahita bahaguruka ngo bashobore kumureba bamwitegeye. Abari kure ye bifashishije televiziyo za rutura ziri muri stade, bamureba neza mu gihe abandi bazamuye telefoni mu kirere bafata amashusho y’uyu muhanzi.

Yasoje indirimbo ya mbere yatangiriyeho yitwa “Let’s Go” yakoranye na Calvin Harris ahabwa amashyi menshi y’urufaya.

Ne-Yo yaserutse yambaye inkweto z’umweru, ipantaro y’umukara, ishati n’ingofero nkuko bisanzwe.

Yahise asaba abakunzi be ati “Abanya-Kigali nimuvuze akaruru. Mwaba muri kugira ibihe byiza?’’

Yaririmbaga akanyuzamo akanabyina

11:45 UMUHANZI W’IMENA YAGEZE KU RUBYINIRO

Nyuma y’iminota isaga 50 ategerejwe, umuhanzi w’icyamamare Ne-Yo watumiwe muri iki gitaramo yageze ku rubyiniro.

Itsinda ry’abashinzwe ubuhanga bw’ibyuma ryabanje gufata umwanya wo kubishyira ku murongo, rimutegurira gusanga bivuga neza nta makaraza.

Yageze imbere y’abafana babarirwa mu bihumbi bateraniye muri Kigali Arena barimo baririmba indirimbo zitandukanye zirimo “Mariya Jeanne” ya Nsengiyumva François umaze kwamamara nka Igisupusupu, “Igipimo” ya Meddy n’izindi zitandukanye.

Ne-Yo uri mu Rwanda ku nshuro ye ya mbere ari mu byamamare byitabiriye umuhango wo Kwita Izina abana 25 b’ingagi zo mu Birunga wabereye mu Kinigi mu Karere ka Musanze ku wa 6 Nzeri 2019.

Izina yahaye umwana w’Ingagi ni “Biracyaza.”

Umunyamerika Shaffer Chimere Smith wamamaye mu muziki nka Ne-Yo [Gogo] yasigiye ibyishimo abakunzi b'umuziki i Kigali
Abakunzi b'umuziki bamwakiranye urugwiro

- IBYO WAMENYA KURI NE-YO

Ne-Yo ni we muhanzi wa mbere ufite izina wataramiye muri Kigali Arena nyuma y’igihe gito itashywe ku mugaragaro. Ni ku nshuro ya mbere yataramiye ku butaka bw’u Rwanda.

Uyu muhanzi yigaruriye imitima ya benshi binyuze mu bihangano bitandukanye birimo “So Sick”, “One In A Million” “Miss Independent”, “Marry You”, ‘‘Sexy love’’ yakoranye na Diamond Platnumz n’izindi.

Ne-Yo w’imyaka 39 yatangiye kumenyekana mu 1998 kugeza n’ubu. Yatangiye umuziki akiri umunyeshuri, aba mu itsinda ryitwaga Envy ryaje gusenyuka mu 2000, ahita awukora ku giti cye n’ubwo bitari byoroshye.

Mu 2004 nibwo yatangiye kumenyekana ubwo yagiraga uruhare mu kwandika indirimbo ya Mario yitwa “Let Me Love” yanakunzwe cyane.

Umwaka wa 2006 niwo wasize Isi yose irangamira uyu mugabo wavutse mu 1979 ubwo yashyiraga hanze album ye ya mbere yitwa “In My Own Words” yabaye iya mbere ku rutonde rukorwa na Billboard muri Amerika.

Mu 2007 yasohoye album yise “Because of you”; “Year of the Gentleman’’ yo mu 2008; mu 2010 yamuritse “Libara Scale’’, 2012 yasohoye ‘‘R.E.D’’, 2015 yasohoye ‘‘No-Fiction’’ naho mu 2018 yasohoye ‘‘Good Man’’.

IMINOTA IGERA KURI 60 YASHIZE NE-YO AGITEREJWE!

Kuva umuhanzi Meddy yava ku rubyiniro, itsinda ry’abacuranzi ba Ne-Yo ryamaze iminota igera kuri 44 rigitunganya ibikoresho mbere yuko uyu muhanzi aseruka imbere y’ibihumbi by’abafana bamutegereje.

Abatekinisiye b’uyu muhanzi bahinduye ibicurangisho byose byakoreshejwe n’abahanzi bamubanjirije, ari nabyo byifashishijwe na Symphony Band igizwe n’urubyiruko rw’abize umuziki ku Ishuri ryo ku Nyundo.

Muri ako kanya abitabiriye igitaramo baganiraga mu matsinda atandukanye mu gihe bari bagitegereje ko uyu muhanzi ahagera.

23: 15: PEREZIDA KAGAME YAGEZE MURI KIGALI ARENA

Umukuru w’Igihugu, Paul Kagame, yasesekaye muri Kigali Arena ahabereye “Kwita Izina Concert’’ iri mu bikorwa bijyana n’umuhango nyirizina wo Kwita Izina abana b’ingagi.

Perezida Kagame yahawe ikaze mu byishimo by’ikirenga n’abateraniye muri iyi nyubako yakira abantu ibihumbi 10.

Bamwakiriye mu majwi ahanitse, aherekejwe n’amashyi menshi bati “Muzehe wacu, muzehe wacu.’’

Perezida Kagame wafunguye Kigali Arena ku wa 9 Kanama 2019, yifatanyije n’Abanya-Kigali mu kuyiganuriramo igitaramo cya mbere gikomeye cyatumiwemo umuhanzi ukunzwe mu njyana ya RnB ku Isi, Ne-Yo.

Naomi Campbell hamwe n’abandi bise ingagi amazina kuri uyu wa Gatanu, bitabiriye iki gitaramo

Nta wamusimbura na Slowly yanyuze benshi!

Meddy yaririmbye indirimbo zitandukanye zirimo iz’icyamamare mu muziki wa Reggae Bob Marley na Redemption Song asa n’uzisubiramo.

Abakunzi be bizihiwe cyane aririmba indirimbo zirimo “Nta wamusimbura” na “Slowly” yagezeho agahita agenda mu buryo bwasize bamwe bigifite inyota yo kumubona.

Meddy yaririmbye "Slowly" na "Ntawamusimbura'' yerekwa urukundo

Uyu muhanzi yavuye ku rubyiniro ariko abafana be basigara bajujura, bavuga mu ijwi ryagutse, baririmba bati “Meddy, Meddy!!’’

Umushyushyarugamba Umulisa Ange wahoze ari umugore wa Dj Pius yaje imbere y’abafana ashaka kubaganiriza ariko babanza kumwima amatwi ahubwo bakaririmba bati “Oye Oye Oye.’’

Meddy yageze kuri "Everything" ahamagara Uncle Austin bararirimbana
Uyu muhanzi yakunzwe cyane kubera umuziki w'urukundo
Meddy ari ku ruhembe rw'abahanzi bakunzwe mu gihugu

- YAKIRIWE MU MASHYI Y’AMA-RAYON

Umuhanzi Ngabo Médard ubwo yahamagarwaga ku rubyiniro mbere y’uko akandagira imbere y’imbaga yitabiriye igitaramo cyo Kwita Izina, abakunzi b’ibihangano bye bakomaga amashyi menshi mu buryo busa neza n’ubwo abafana ba Rayon Sports ikina Shampiyona y’Umupira w’Amaguru mu Rwanda bakoresha mu kwishimira intsinzi y’ikipe yabo.

Uyu musore akigera ahirengeye yakiranwe ubwuzu bwinshi n’abiganjemo ab’igitsina gore banyurwa n’ibihangano bye byiganjemo ibiganisha ku rukundo.

22:35: Meddy yakiranwe urugwiro

Ngabo Médard Jobert wihaye akabyiniriro ka Meddy nk’umunyamuziki, yavukiye i Bujumbura mu Burundi, taliki ya 7 Kanama 1989.

Ni umuhanzi nyarwanda umaze kubaka izina mu buryo bukomeye ukora injyana ya R&B na Pop akaba akorera umuziki we aho yiga muri Leta ya Texas muri Amerika.

Ngabo Médard yari akikijwe n'itsinda ry'ababyinnyi babyambariye
Meddy yinjiye ku rubyiniro mu buryo budasanzwe
Meddy ari mu bahanzi bafite izina rikomeye mu Rwanda

Uyu muhanzi akunzwe mu ndirimbo yitwa ‘Down Town’ yinjiye ku rubyiniro ari kumwe n’ababyinnyi bamufashije kubyina na we akanyuzamo agafatanya naryo.

Yatangiriye ku ndirimbo yise ‘Sibyo’. Yanagaragarijwe urukundo mu ndirimbo “Everything”, yagezeho agahamagara Uncle Austin bayifatanyije.

Uku niko urubyiniro rwari ruteguye

Bafashije Charly na Nina kubyina ingwatira

22: 20: Itsinda rya Dream Team Djs ryavanze imiziki itandukanye irimo iya Dj Marnaud, Motigbana, Tetema na Kanyaga za Diamond n’izindi nyinshi zishyira abantu mu mwuka wo kubyina.

DJ Marnaud yashyushyaga abantu mu gihe bagenzi be bari kuvanga imiziki.

-  Ibyo wamenya ku bagize Dream Team Djs

Dj Miller

Karuranga Virgile uzwi cyane nka Dj Miller ari mu bayoboye mu kuvanga umuziki i Kigali. Uyu musore w’imyaka 27 yabyinjiyemo mu 2012 atojwe na Dj Karim bahuriye mu itsinda rya Dream Team DJs.

Yacuranze mu bitaramo bitandukanye bya Rock Events bikunze kuba harasirwamo ibishashi bitangiza umwaka, muri Waka Warrior Race 2015, mu birori byo Kwita Izina 2015, n’ibitaramo bya New Years’ Vibes.

Yibukirwa cyane ku gucurangira Sauti Sol ubwo bari mu rugendo rwa album yabo ya ‘Live and Die in Africa’ mu 2016, yanacuranze mu birori bya Jameson Connects Rwanda Party n’ibindi byinshi.

Dj Miller ni umwe mu bahinduye ubuzima bw’ijoro mu Mujyi wa Kigali cyane cyane ku basohokera muri Bougainvilla Boutique Hotel i Nyarutarama.

Dj Toxxyk

Uyu musore w’imyaka 25 ubusanzwe yitwa Arnold Ishimwe. Ni umwe mu bakora umwuga wo kuvanga umuziki bagezweho mu Mujyi wa Kigali, abasohokera mu bitaramo bikomeye byitabirwa n’abahanzi baba baturutse hanze y’iguhugu baramuzi cyane. Nyina ni Umunyarwandakazi, Se akaba Umushinwa.

Dj Toxxyk ni umwe mu bacuranze mu bitaramo bya ‘Silent Disco’ bimaze kuba inshuro zitari nyinshi mu Rwanda. Yacuranze mu cy’isabukuru y’umwaka umwe MTN itangije serivisi za Yolo cyabereye i Gisenyi mu mwaka ushize, icya ‘New Year Countdown’ cyitabiriwe na Sautisol na Yemi Alade yatumiwe no mu cya Mr. Eazi na Diamond cyabereye mu Mujyi wa Goma.

Mbere yo kwinjira mu byo kuvanga umuziki yabanje kuba umubyinnyi mu bwana ariko ntibyamuhira, aza kwinjira mu byo kuvanga umuziki kuko yawukundaga cyane. Nta shuri ryihariye yabyizemo usibye gukurikira uko abandi bakomeye ku Isi babikora byatumye asobanukirwa neza uwo mwuga kuri ubu akaba ari umwe mu bakomeye.

Yatangiye kumenyekana cyane ubwo yacurangaga muri Ogopogo Nightclub ku Kimihurura ndetse yakunzwe no gucuranga muri Chillax Lounge i Nyarutarama.

Dj Marnaud

DJ Marnaud ni umusore w’imyaka 24 ariko umurebye utabizi ushobora kumwibeshyaho ukagira ngo arayirengeje.

Uyu musore amaze kwerekana impano ye mu bitaramo bikomeye bitandukanye, yigaragaje cyane Mr. Eazi yaje i Kigali, acuranga mu cya Meddy i Nyamata, Shyuha Festival, mu bitaramo bya ROC NYE, icya Tekno ndetse aherutse no mu gisoza Iwacu Muzika cyari cyatumiwemo umuhanzi Diamond Platnumz wo muri Tanzania.

Afite umwihariko wo gushyushya abafana abaganiriza mu gihe aba ari kuvanga umuziki, binyura benshi.

Dj Marnaud ni umwe mu bavanga umuziki batangiye no kwinjira mu bijyanye no gukorana n’abahanzi mu mishinga y’indirimbo ahereye ku itsinda rya Active mu yo bise ‘‘Bape’’, ‘‘Ribuyu’’ ye Dj Pius, ‘‘Boku’’ ye na King James, “Reka Turye Show’’ yakoranye na Malaika Uwamahoro.

Dj Marnaud uri mu bagize Dream Team DJs ubwo yasusurutsaga abitabiriye igitaramo

SHERRIE SILVER YABYINNYE ANASHINGA UMUTWE

22: 10: Umunyarwandakazi Sherrie Silver wamamaye mu mbyino yinjiye ku rubyiniro, abafana batangira kuririmba indirimbo yitwa ‘Murera’ yamamaye ikunda gukoreshwa n’abantu mu birori bizihiwe.

Uyu mukobwa ari kumwe n’itsinda ry’ababyinnyi be bo mu Rwanda akunda gukorana naryo mu bikorwa bitandukanye.

Mbere y’uko ku rubyiniro babanje bashyiramo amashusho y’igihe yahabwaga igihembo cya MTV VMA nk’umubyinnyi mwiza, banashyiramo indirimbo yitwa ‘This America’ ya Childish Gambino yatumye abona uyu mwanya.

Bashyizemo amashusho yerekana ibihe byiza uyu mukobwa yagiriye mu Rwanda ubwo yasuraga ibirunga mu ntangiriro z’iki Cyumweru mbere yo kwita umwana w’ingagi.

Sherrie Silver yari aherekejwe n'itsinda ry'ababyinnyi
Yabyinnye bigera n'aho ashinga umutwe, ahabwa amashyi menshi
Sherrie Silver yagaragaje ubuhanga budasanzwe mu kubyina
Sherrie Silver yamamaye cyane mu ndirimbo ‘This America’ ya Childish Gambino
Sherrie Silver yanyuzagamo akagaragaza ubuhanga bwihariye mu kubyina
Abasore bari baherekeje Sherrie Silver bishimiwe mu mbyino baserukanye

21: 45: Umuraperi Gatsinzi Emery [Riderman] yinjiye ku rubyiniro. Uyu muhanzi aje indirimbo yitwa "Inyuguti ya R" yahagurukije umubare munini w’abateraniye muri Kigali Arena.

Riderman yaserutse imbere y’abakunzi ba muzika agaragiwe n’Umuraperi Siti True Karigombe uri mu mfura zo mu Ishuri ku Nyundo.

Yakomereje ku ndirimbo yise "Umwana w’i muhanda", "Ikinyarwanda’, "Abanyabirori" n’izindi nyinshi.

Riderman yavuze ko yaje muri iki gitaramo arembye ku buryo n’ubwo yishimiye kuririmbira abakunda ibihangano bye ariko atamerewe neza n’ubuzima bwe.

-  Riderman aracyari mu bakomeye muri Hip hop

Gatsinzi Emery [Riderman]. Yavukiye i Bujumbura mu Burundi, tariki 10 Werurwe 1986. Ni we mfura mu bavandimwe batanu bavukana; abahungu batatu n’abakobwa babiri.

Amashuri abanza yayize i Kabusunzu maze ayisumbuye ayiga mu Rwunge rw’Amashuri rwa St André, aho yakuye Impamyabumenyi mu bijyanye na Sciences Humaines.

Kaminuza yayize muri Université Libre de Kigali [ULK] mu Bukungu n’Icungamutungo nyuma yiga no muri Rwanda Tourism University College mu Ishami ry’Ubukerarugendo n’Icungamutungo.

Ni we washinze studio yitwa Ibisumizi akorana n’abatunganya indirimbo batandukanye barimo T-Brown, First Boy, Fazzo n’abandi.

Yatangiye kuririmba muri Gicurasi 2006 yinjiye muri UTP Soldiers, itsinda ryari rigizwe na NEG G The General na MIM.

Baje gukorana indirimbo umunani maze nyuma yaho na we asohora indirimbo ku giti cye ya mbere mu 2007. Iyo ndirimbo yayise “Turi muri Party”; biza no gutuma ahita ava muri iryo tsinda atangira gukora injyana ya RAP ku giti cye.

UTP yakomeje gukora dore ko yahise imusimbuza Puff G, maze Riderman na we akomeza inzira ye yo kuririmba ku giti cye aho yasohoye indirimbo zakunzwe cyane nka "Inkuba", maze asohora album ye ya mbere yari igizwe n’indirimbo 16 zarimo ‘‘Rutenderi’’, ‘‘Uwo mukobwa’’ n’izindi.

Ni umwe mu bafite ibigwi bikomeye mu muziki Nyarwanda ndetse ubu amaze kugira album zirindwi na Mixtape imwe.

Riderman ni umwe mu baraperi bakomeye mu Rwanda, yagaragaje ubukare mu gusuka amagambo ku muraperi wese wagerageje kumukora mu jisho, na we yeguraga ikaramu akandika indirimbo imukorogoshora akamubwirira mu migani ko ‘yabayoboye kuva muri 2008’.

Yatangiye kwandika imivugo ageze mu mashuri yisumbuye maze akumva indirimbo yibanda cyane ku magambo azigize; mu kumva indirimbo z’ umuhanzi 2Pac ni ho yakuye igitekerezo cyo gukoresha imivugo yahimbaga agatangira kuyiririmba.

Umuraperi Riderman yaririmbye afite uburwayi
Riderman yaririmbye ari gufashwa n'umuraperi Siti True Karigombe wize umuziki ku Nyundo

21:20: Bruce Melodie yinjiye ku rubyiniro mu ndirimbo yakoranye na Sunny bise ‘Kungola’ ikundwa na benshi muri iki gihe. Yitereraga mu bicu avuga ngo ‘simbuka’ maze abakunzi be bagasimbukana nawe.

Yakurikijeho iyo yise "Ntundize", "Complete Me", "Tuza", "Umuhungu wa Muzika" ye na Fireman, "Twarayarangije", "Ama G The Black’’ ye na Jay C, ’‘Ikinya’’, "Nta Kibazo" yakoranye n’abandi bahanzi mu gihugu.

Uko Bruce Melodie yasozaga indirimbo yakomerwaga amashyi y’urufaya yerekana ko yishimiwe mu buryo bukomeye. Ibihangano bye bimaze gucengerwa na benshi mu bakunzi b’umuziki Nyarwanda.

-  Izina rya Bruce Melodie rimaze gufata mu Rwanda

Itahiwacu Bruce [Bruce Melodie] ni umuririmbyi w’umunyempano, afite ubuhanga bwihariye mu guhanga no kwerekana ko ibyo akora biri mu maraso binyuze mu kuririmba. Ari mu bahanzi ba mbere bakunzwe cyane mu ndirimbo z’urukundo mu Rwanda.

Melodie yatangiye kuririmba mu 2012, icyo gihe yafashwaga na Producer Fazzo, yibandaga cyane ku ndirimbo zo mu njyana ituje nyuma agenda avangamo na Afrobeat.

Mu 2017 yabaye umuhanzi wo mu Rwanda wa mbere watumiwe muri Coke Studio Africa. Mu 2018 ni we wegukanye igihembo cya Primus Guma Guma Super Star cyanahise gihagarara.

Bruce Melodie ni mwene Ntibihangana Gervais na Verène Muteteri. Yavutse mu 1992. Ni ubuheta mu muryango w’abana bane barimo abahungu babiri n’abakobwa babiri. Avuka mu Kagari ka Kamashahi, Umurenge wa Nyarugunga, Akarere ka Kicukiro ari naho kugeza ubu abana n’umugore n’umwana babyaranye.

Iyo muganira umubaza ibyerekeye amashuri akubwira ko ‘yize bimugoye atari uko ari umuswa’ ahubwo ari ibibazo by’umuryango n’ubushobozi buke bwamwitambitse, gusa yarahanyanyaje nyuma yo gucikiriza amashuri akora ikizamini cy’abakandida bigenga [candidat libre] aza kubona impamyabumenyi.

Amashuri abanza yayize ku bigo bibiri harimo Ecole Primaire Busanza na Groupe Scolaire Camp Kanombe. Amashuri yisumbuye yayatangiriye i Kanombe kuri EFOTEC ayarangiriza kuri Lycée Islamique de Rwamagana.

Bruce Melodie yongeye gushimangira ko ari mu bahanzi bafite igikundiro mu muziki w'u Rwanda
Abitabiriye igitaramo basangizwaga ubutumwa bubashishikariza gusura ibyiza nyaburanga bitatse u Rwanda
Bruce Melodie yishimiwe cyane n'abitabiriye igitaramo
Igitaramo cya mbere gikomeye cyabereye muri Kigali Arena yakira abantu ibihumbi 10 cyitabiriwe n'abarimo Abanyarwanda n'abanyamahanga batari bake

20: 50: Itsinda rya Charly na Nina ryasesekaye ku rubyiniro. Ryaririmbye indirimbo zaryo ryise "Zahabu", "Nibyo’’, "Agatege" n’izindi. Banyuzamo bakaganiriza abitabiriye igitaramo cyabo bati ‘mumeze neza?’

Nina yahamagaye abasore babiri mu bafana bafatanya kubyinana nk’abakata umuziki w’ingwatira.

Uyu mukobwa na mugenzi we basoreje ku ndirimbo yazamuye ubwamamare bwabo yitwa "Indoro" ikiri mu mitwe ya benshi kuko bafatanyije kuyiririmba.

Charly ari mu nkingi zikomeye zigize iri tsinda
Nina yahamagaye umusore umwe bafatanya gukata umuziki
Na Charly hirya bamubyinishaga kakahava
Aha bafatanyaga kuririmba indirimbo yabo iri mu zakunzwe yitwa "Indoro"
Nina ari mu bahanzikazi bazi gukata umuziki
Charly aririmbana n'abafana bimwe mu bihangano by'itsinda abarizwamo byakunzwe hambere

-  Ibyo wamenya kuri Charly Na Nina

Charlotte Rulinda [uzwi nka Charly] Fatuma Muhoza [Nina] bamenyekanye cyane mu ndirimbo “Indoro’’ bahuriyemo na Big Farious igakundwa mu gihugu hose ndetse ikanabambutsa imipaka mu bihugu bituranye n’u Rwanda.

Izina ryabo ryakomeje kuzamurwa n’izirimo “Agatege’’, “Face 2 Face’’, “Owooma’’ mu minsi ishize baherutse gushyira hanze izirimo ‘Lazizi’ bakoranye na Orezi ndetse n’iyitwa ‘Nibyo’.

Nina yatangiye gukora ibikorwa bijyanye n’umuziki kuva mu 2009, akora indirimbo ebyiri ku giti cye imwe yitwa ’Uzabaze’, n’indi yitwa ’Igihe Kizagera’, gusa izo ntizamenyekanye cyane. Muri 2013 yongeye kubyutsa inganzo ye ajya mu irushanwa rya Tusker Project Fame gusa ntibyamuhira kuko icyo gihe yagarukiye mu bahanzi 15.

Uyu muhanzi ubusanzwe witwa Muhoza Fatuma amaze kumenyekana mu bikorwa bya muzika ahuriramo na mugenzi we Rulinda Charlotte [Charly].

Charly we mu 2012 yatangiye kugaragara nk’izina rishya ry’umuhanzi uteganya kurushaho kumvikana cyane mu Rwanda mu bahanzi b’igitsina gore. Yari amenyerewe mu bahanzi bafasha abarirmba LIVE mu marushanwa ya Primus Guma Guma Super Star kuva ku ya mbere no muri no mu ya kabiri.

Yakoze indirimbo nke zirimo “Ntawe Ukuruta”, yakoreye muri Unlimited Records kwa Producer Fazzo.

We na Nina bahujwe cyane no kuririmba muri za hotel ndetse no gufasha abahanzi bahataniraga ibihembo bya PGGSS, ariko baza gufata icyemezo cyo kwihuriza hamwe mu 2014, bashinga itsinda baryita ’The Sterioz’ nubwo iryo zina atari ryo bazwiho cyane kugeza ubu.

Symphony Band ni yo yacurangiye abahanzi b'Abanyarwanda baririmbye mu gitaramo

Mugengakamere Joachim uri mu batangije Symphony Band yashimangiye ubuhanga mu kuririmba anacuranga
Abafite ubumuga boroherejwe kwicara ahantu hatuma bareba igitaramo neza

-  Nta nzara n’inyota yaranzwe mu gitaramo

Ibyo kunywa bisembuye n'ibidasembuye byari bihari ku bwinshi
Inzoga zatangwaga mu dukombe twabugenewe mu kwirinda impanuka zaterwa n'amacupa
Abarya brochette na bo ntibarengejwe ingohe

20: 10: Ku rubyiniro habanje itsinda ry’abanyeshuri bize umuziki ku Nyundo rya Symphony.

Iri tsinda rigizwe n’abakobwa n’abahungu ryaririmbye indirimbo z’abahanzi batandukanye bakomeye nka "On The Low" ya Burna Boy, "Sorry" ya Justin Bieber, "Joromi" ya Simi, "Case" ya Teni n’izindi z’abahanzi bakomeye.

Ryageze ku ndirimbo za Bushali The Trigger ugezweho muri iki gihe zirimo "Tsikizo", "Ku Gasima’’,"Ni Muebue" n’izindi ze abantu bajya mu bicu.

Uwayezu Ariel ari mu banyempano bazamukanye ingoga mu muziki w'umwimerere

Ibihumbi by’abakunzi b’umuziki baturutse imihanda yose berekeza muri Kigali Arena mu gitaramo cyari gitegerezanyijwe amatsiko menshi n’abatari bake babonye Ne-Yo aririmbira mu Rwanda.

Uyu muhanzi yasesekaye mu Rwanda mu rukerera rwo ku wa 6 Nzeri 2019 abwira itangazamakuru ko ‘Ni ubwa mbere nje mu Rwanda gusa nizeye ko nzahura n’abantu beza, buri wese azi ko ngira ibitaramo byiza yaba kubyina no kuririmba ni ibintu nsanzwe nkora. Abantu bagomba kwitegura igitaramo cyiza. Buri gihe mpora niteguye.’

Amafoto: Muhizi Serge

Video: Muhumuza Simeon na Hakizimana Alain


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza