Neema Rehema, umunyempano wihariye uri mu mfura zize umuziki ku Nyundo

Yanditswe na Dusabimana Aimable
Kuya 11 Ukwakira 2017 saa 05:21
Yasuwe :
0 0

Uwitabiriye igitaramo cya mbere cyabaye muri 2017, cyaririmbwemo na The Ben nyuma y’imyaka irindwi yari amaze mu mahanga; atigijije nkana ntiyakwibagirwa ubuhanga bugeretse ku bundi bwagaragajwe n’umwe mu bakobwa bize umuziki ku Nyundo wasubiyemo indirimbo y’icyamamare Jessie J agakurirwa ingofero n’imbaga yacyitabiriye.

Ishuri ry’umuziki ku Nyundo ryarekuye imfura 29 zahize ku itariki ya 17 Werurwe 2017, icyo gihe byari ibyishimo bidasanzwe ku rubyiruko rurimo abakobwa batanu n’abahungu 24. Bakanyujijeho mu kuririmba no gususurutsa imiryango yabo n’abantu b’ingeri zitandukanye bitabiriye uwo munsi mukuru wabo.

Mutesi Neema Rehema, umwe mu bakobwa batanu mu mfura z’ishuri ryisumbuye ry’Umuziki rya Nyundo riherereye mu Ntara y’Amajyaruguru, we na bagenzi be bahuriye mu cyo bise Sebeya Band bahise batangira ibikorwa byo gucuranga no kunganira abahanzi bakomeye mu Rwanda mu bitaramo bigarurira iryo soko henshi hadashize igihe kirekire.

Uyu muhanzi wari umaze umwaka akora uwo mwuga, yiyemeje kwinjira mu muziki n’ingamba zidasanzwe yizeyeho kuzamugeza ku rwego rukomeye mu muziki w’ejo hazaza. Iyo muganiriye akugaragariza ko yizera impano yo kuririmba afite, ikigeretseho akaba azi no kwicurangira mu buryo bw’umwimerere utasangana abahanzi benshi mu gihugu.

Mu kwinjira mu muziki, Neema Rehema yatangiriye ku ndirimbo yise ’Oya’ ifite umudiho w’injyana ya ’Afro Pop’, yayikorewe na DayStar Records ya Producer Nicolas wazamuye abahanzi bubatse izina mu muziki w’u Rwanda. Uyu mukobwa avuga ko zimwe mu ntego afite ari ukuririmbira ingeri zose no gutambutsa ubutumwa abinyujije mu njyana z’amoko yose nk’umunyamuziki wabyize akabisobanukirwa byimbitse.

Mu kiganiro yagiranye na IGIHE, uyu mukobwa w’imyaka 21 yasobanuye ko indirimbo yahereyeho yibanda ku butumwa buhumuriza abacitse intege ndetse bugatera imbaraga abihaye intego mu kugera ku rwego runaka.

Yagize ati "Nkora injyana zose, kugeza ubu ndavanga, iyo nandika indirimbo nibanda ku rubyiruko, abakuru n’abandi bose. Ntabwo ntoranya, nandikira ingeri zose. Ubutumwa nibandaho iyo ndi kuririmba ni urukundo, amahoro. Muri rusange ni urukundo."

Yongeyeho ati "Indirimbo nahereyeho yitwa ’Oya’, nyandika nayikoreye ingeri zose, abana, abakuru, abantu bose bazayiyumvamo. Ikomeza umuntu wese wacika intege ngo ntacike intege mu byo yifuza kugeraho. Nahisemo kuyiheraho kuko numva izahindura benshi kandi nizera ko izabafasha."

Ishuri ry’umuziki ku Nyundo ni rimwe mu bigize School of Arts and Music ribarizwamo abanyeshuri 360, rikurikiranwa bigizwemo uruhare na WDA. Buri mwaka hatoranywa abanyeshuri 30 bo kujya kuhigira umuziki, biri mu bizatuma u Rwanda rukomeza kugira abanyamwuga benshi mu muziki, ugatera imbere.

Neema Rehema yakoreye indirimbo ya mbere muri DayStar Records

Ikiganiro kirambuye IGIHE yagiranye na Neema Rehema, umunyempano mushya mu mfura zigiye umuziki ku Nyundo

IGIHE: Ni gute wibwira abatazi uwo uri we?

Neema Rehema: Nitwa Mutesi Neema Rehema nkaba ndi umwe mu bakobwa batanu barangije kwiga umuziki ku Nyundo, mu cyiciro cya mbere. Ndi umuririmbyi unacuranga acoustic guitar.

Neema ni umukobwa ufite imyaka 21, ukunda ubuhanzi, muri rusange yagaragaye mu gitaramo cya The Ben, mu gitaramo cya Guma Guma, mu gitaramo cya Meddy, n’ibindi bitandukanye.

Navutse mu 1996, ndi umukobwa w’imfura mu bana batanu, mfite ababyeyi bombi.

IGIHE: Iby’umuziki wabyinjiyemo gute? Inganzo uyikomora he?

Neema Rehema: Mfite imyaka itatu nibwo natangiye kugaragaza ko nkunda umuziki, ababyeyi bakabibona na bo, niba indirimbo ibabaje nabishyiramo njyewe ukabona ndabigaragaje kandi ntari no kubyumva. Nabihaye agaciro igihe nari mfite imyaka 12.

IGIHE: Haba hari abahanzi ubona nk’icyitegererezo ku muziki wawe?

Neema Rehema: Mu Rwanda umuhanzi mbona nk’icyitegererezo ni Bruce Melodie, undi akaba Miss Jojo nubwo ntakimubona cyane. Hanze ni Michael Jackson, Whitney Houston na Jessy J.

Icyo mbigiraho ahanini ni ubwitange, imbaraga bakorana, ubutumwa batanga ndetse n’uburyo bategura urubyiniro.

Bruce Melodie nkunda imyandikire ye ni n’umuhanga mu kuririmba mugenderaho cyane. Abo hanze mbareberaho mu butumwa bagiye baririmba, n’imbyino kuri Michael Jackson.

IGIHE: Ni ibihe bikorwa Neema amaze gukora mu muziki? Afite iyihe ntumbero?

Neema Rehema: Kugeza ubu nafashaga abahanzi mu gihe baririmba, nakoranye na The Ben, Charly & Nina, Bruce Melodie, Meddy, Riderman. Ibitaramo bitandukanye nabikozemo.

Icyo nteganya muri iyi myaka ije ni ugushyira ahagaragara ibihangano byanjye, nshyire hanze indirimbo zanjye, ubutumwa bwanjye bwumvikane ku Isi hose.

Maze gukorana na DayStar Records indirimbo yanjye ya mbere yitwa ’Oya’. Ni ibintu nifuza ko bikomeza nk’uko nabibabwiye nkakomeza gukora ibihangano byanjye bikajya hanze.

Ubutumwa ntanga buherekeje indirimbo yanjye ya mbere, ni ukudacika intege ku byo twihaye kugeraho, cyane cyane ndabuha abakobwa. Ni byiza kumva ko bashoboye kandi bashobora kugera kure.

DayStar Records bakora neza, ni iby’agaciro kuba ndi gukorana na bo muri iyi minsi, nta kabuza ko tutakomezanya kuko umushinga wanjye wa mbere wagenze neza. Ni ibintu bishimisha gukora indirimbo ya mbere igakorwa ku rwego nk’uru.

IGIHE: Ni uwuhe mwihariko wa Neema Rehema nk’umuhanzi nyarwanda mushya?

Neema Rehema: Umwihariko akenshi ubasha kumvwa n’umuntu ugukurikiye, njyewe ntabwo navuga ngo umwihariko ni uyu mu byo nkora. Umuntu ubashije kumva ibyo nkora no kureba aho ndirimba abibona neza akamenya itandukaniro ry’inganzo yanjye n’iya bagenzi banjye nsanze mu muziki.

Ngiye mu muziki mfite intego yo gukora ibishakwa na benshi, umuziki mwiza, ubutumwa bwiza, niba umuntu ababaye bukamusana umutima, ushaka kwishima akabona injyana ijyanye na byo. Nzagerageza gukora uko nshoboye ku buryo abanyarwanda bazabona impinduka.

IGIHE: Watubwiye ko wize umuziki ku Nyundo, ni iki kidasanzwe wumva wahakuye?

Neema Rehema: Ku Nyundo nahagiye mu 2014, ntabwo ari ibintu byari byoroshye kuko hakorwa amarushanwa ariko hagatoranywa bacye bafite ibikenewe, bafite umwihariko.

Ku ishuri narahageze biba ibintu byiza cyane, twize amasomo atandukanye, hari ugusoma ’Solfège’, kwiga kuririmba, gucuranga, kuvuza ingoma, ’piano’, ’guitar’, gusa isomo hariya njyewe ryankomereye cyane ni gakondo ariko kuba ryari rikomeye ntibyambujije kuryiga, nubwo byari bishya kuri njye, byanteye umwete mu kuryiga. Ryaranshimishije cyane.

IGIHE: Isomo rya gakondo ryagukomereye gute ubwo?

Neema Rehema: Impamvu mvuga ko ryankomereye, ni uburyo bwaryo nk’ukuntu wayiririmba birihariye. Bitandukanye cyane n’uko waririmba izindi njyana zo hanze. Byabaye nk’ibinkomerera ho gato.

IGIHE: Wavuze ko ukora umuziki mu njyana zose, ni uwuhe musaruro uteganya kubyaza iryo somo wize rihuza n’umuco wa kinyarwanda?

Neema Rehema: Gakondo irimo ibintu byinshi cyane, hari ukubyina, ukuririmba, n’imidiho myinshi cyane. Nshobora kutayiririmba ariko nkaba nayikomoraho inganzo, nkayikuramo umudiho runaka cyangwa ikindi kuko ikubiyemo byinshi cyane kandi by’ingenzi.

IGIHE: Ni irihe tandukaniro riri hagati y’umuhanzi wize umuziki n’utarawize mu mboni zawe?

Neema Rehema: Ubundi umuntu wese yabasha kuririmba, gusa mu Cyongereza hari uwo bita ’Vocalist’, uwo ni uwabyize, atandukanye n’uwo twakwita ’Singer’ kuko we umuntu wese ashobora kumuba.

Uwo twita ’Vocalist’ ni umuntu uzi uburyo butandukanye bw’imiririmbire akaba ashobora no kubyigisha abandi ariko ’Singer’ ni umuntu ushobora kuririmba bisanzwe.

Biragoye kubatandukanye gusa umuntu wize umuziki, ashobora no kuwigisha abandi. Gusa icy’ingenzi burya ni ubutumwa batanga, injyana bakora n’uburyo bateguramo ibikorwa byabo.

IGIHE: Winjiye mu muziki umaze igihe ufasha abahanzi mu kuririmba mu bitaramo bitandukanye. Ni izihe nyungu zirimo zashidukirwa n’undi muhanzi wifuza kunoza imiririmbire?

Neema Rehema: Biriya birimo inyungu nyinshi mu by’ukuri, birafasha cyane njye nungukiyemo ibintu byinshi, icya mbere harimo kwiga, nongereye ubumenyi, bigufasha guhura n’abantu batandukanye b’ingirakamaro, ikindi bibamo amafaranga kuko byanatunga umuntu.

IGIHE: Abahanzi benshi babihereyemo ariko nyuma bakabisezerera burundu nyuma yo kumenyekana? Nawe niyo nzira?

Neema Rehema: Nifuza gukomeza umuziki, gufasha abahanzi mbikora nk’umwuga, ntabwo numva ko nakabiretse kuko ndabikunda gusa ndashaka gukora umuziki nk’umuririmbyi ku giti cyanjye no gushyira hanze indirimbo zanjye bwite.

IGIHE: Mu myaka yose umaze ukunda umuziki n’iyo wawukoze ni iki cyagushimishije mu byo wagezeho? Haba hari icyo wicuza?

Neema Rehema: Mu byo navuga byanshimishije, ntabwo nakwibagirwa igitaramo cya The Ben naririmbyemo, kwinjira mu ishuri ry’umuziki ku Nyundo, ibyo byaranshimishije mu muziki muri rusange. Nta na kimwe nicuza, ntabwo ari kenshi nacitse intege.

Mu byo nishimira bindi ni ugushyigikirwa n’umuryango, nubwo njye nagize umugisha wo kubyarwa n’ababyeyi basanzwe ari abacuranzi basobanukiwe umuziki icyo ari cyo, gusa byakabaye amahirwe ya buri mwana kubyaza umusaruro impano runaka afite.

Neema Rehema yakuriwe ingofero mu gitaramo The Ben yakoreye i Kigali nyuma y'imyaka irindwi aba mu mahanga
Neema (hagati) ni umwe mu banaririmbanye na Meddy i Nyamata

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza