Senderi Hit yongeye gutakamba avuga ko inzara imwishe

Yanditswe na Munyengabe Murungi Sabin
Kuya 6 Werurwe 2018 saa 09:52
Yasuwe :
0 1

Senderi Hit wakuwe mu bemerewe kujya bahatanira irushanwa rya Primus Guma Guma yavuze ko byamusigiye ubukene n’inzara, yatakambiye Bralirwa asaba ko yakomorerwa akazarushanwa nk’abandi.

Senderi umaze igihe ataragara mu dushya n’ibintu bidasanzwe yakoraga mu myaka yashize yagaragaje kenshi ko ingingo yo gushyiraho imyaka ntarengwa ku bitabira Primus Guma Guma ko yamubangamiye cyane. Yashimangiye ko muri iki gihe ashonje ndetse ngo byamwishe mu mutwe bimutera no kwiheba.

Yavuze ko ibaruwa aherutse kwandikira Bralirwa ayicishije kuri Instagram ngo yari amaze igihe kinini ayitekerezaho gusa muri iyi minsi byegereje amatora yo guhitamo abahanzi bakwiye kuzahatana ngo yakajije umurego mu kubisaba kugira ngo atazongera kubuzwa amahirwe.

Yagize ati “Nerekana ko iriya ngingo y’imyaka bashyizeho yavanwamo, umuziki ntabwo ari umupira, umuziki ni ubuzima. Natanze ingero, hari aho navuze nti ‘ese umunyamakuru wujuje imyaka 30 abujijwe kongera kuvugira kuri micro ubwo byamushimisha?’”

Yongeyeho ko ari mu gice cy’abahanzi bamerewe nabi n’ubukene muri iyi minsi bityo agasaba ko nibura Bralirwa yakuraho ingingo y’imyaka mu guhitamo abahatanira PGGSS kugira ngo arebe ko yazibona mu bazakirigita ifaranga mu minsi ya vuba.

Ati “Iyo ngingo yaratubangamiye, yarambangamiye ku giti cyanjye ariko hari n’abandi yakocaguriyemo. Icyo gihe ndashaka kuvuga ngo Bralirwa nkumbuye abantu, iriya ngingo nimuyikureho iyo ngingo y’imyaka. Inzara itumereye nabi, ntabwo ikibazo ari mu mufuka, iyo ubwiye umuntu ngo iyo ugeje imyaka 35 uba wavuye muri gahunda icyo gihe uba umwishe mu mutwe.”

Yongeyeho ati “Ntabwo nigeze mu by’ukuri mvugana na Bralirwa, nk’uko nsoma ibikorwa baba bageza ku banyarwanda nanjye baba bagomba gusoma ibyo nandika nka Senderi International Hit ku rubuga rwa Instagram […] Bagomba kubikurikirana bakabisoma ariko baracecetse, Bralirwa kuraho ingingo dukore akazi.”

Mu ngingo Bralirwa iheruka gushyiraho kugira ngo umuhanzi yemererwe kujya muri Guma Guma harimo iyateje impagarara ivuga ko ‘umuhanzi wemerewe kujya mu irushanwa agomba kuba afite imyaka iri hagati y’imyaka 18 na 35 y’amavuko’.

Iyi ngingo yatumye Senderi Hit ndetse na Danny Vumbi batabasha kwibona mu bemerewe guhatanira iri rushanwa riheruka kuba ku nshuro ya karindwi.

Senderi Hit avuga ko inzara imumereye nabi muri iyi minsi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza