Sonia Rolland akunda bihebuje ubugari n’isombe…ibindi yahishuye (Video)

Yanditswe na Munyengabe Murungi Sabin
Kuya 8 Werurwe 2018 saa 10:56
Yasuwe :
1 0

Miss Uwitonze Sonia Rolland amaze iminsi i Kigali aho yaje mu gikorwa cyo gutoranya Nyampinga w’u Rwanda watowe ku itariki ya 24 Gashyantare 2018.

Sonia Rolland ni Umunyarwandakazi ufite ubwenegihugu bw’u Bufaransa ari naho amaze imyaka irenga 20 abana n’umuryango we. Ni umuhanga mu gukina no kuyobora filime, ubu afite inshyashya yitwa «Femmes du Rwanda» irimo abagore icumi b’indashyikirwa mu gihugu, yerekanwe mu kwizihiza Umunsi mpuzamahanga wahariwe abagore.

Mu kiganiro kirambuye yagiranye na Makeda, Sonia Rolland yavuze birambuye ku buzima bwe uko yiyumva nka Nyampinga w’u Bufaransa wa mbere w’umwirabura, ibyo akunda, ibyamugoye cyane no ku muryango we.

Yavuze uburyo byari inzozi zidasanzwe kwiyumvisha ko ashobora kuba Nyampinga w’u Bufaransa ari umwirabura ukomoka mu Rwanda. Ati “Ntabwo nabyizeraga, nari imvange, ni njye wa mbere ukomoka muri Afurika, byari bishya…”

Sonia Rolland iyo ataza kuba Nyampinga w’u Bufaransa cyangwa ntiyinjire mu byo gukina no kuyobora filime yari gukora mu byerekeye kumenyekanisha ibikorwa n’ubucuruzi. Ati “Ndi umuhanga mu byerekeye imenyekanisha bikorwa, byizere ndabivuze.”

Nta wundi mwana nifuza…

Yabajijwe niba ajya atekereza kuba yabyara umwana wa gatatu avuga ko yafashe umwanzuro ndakuka wo kurera abo Imana yamuhaye kuko “Guhuza inshingano z’urugo nk’umubyeyi no gukora ibya filime ni akazi kagoye.”

Yagize ati “Ooh! Oya, Oya, Oya! Kuko nshobora kureba umukunzi wanjye byonyine ngahita ntwita, rero oya rwose. Biroroshye gutwita ariko ntabwo byoroshye kuba umubyeyi bigakomera cyane kuba umubyeyi mwiza. Ikindi, guhuza ibyo nkora byose ntabwo byoroshye muri iki gihe.”

Ubugari n’isombe, ifunguro riruta ayandi

Sonia Rolland nubwo amaze imyaka myinshi aba mu mahanga, iteka iyo yagarutse muri Afurika by’umwihariko mu Rwanda ngo ntashobora kuhava atariye ubugari buhrekejwe n’isombe itetse neza.

Yagize ati “Nicyo kintu mbaza iteka iyo ngeze mu Rwanda, ubugari n’isombe. Nkunda cyane kurya isombe…” Iyi ndyo kandi ngo azi kuyirya akoresheje intoki.

Yagize ati “Navukiye hano erega, iyo nsubiye mu Bufaransa kuko bo babayeyo imyaka myinshi barambwira ngo ‘Sonia uri Umunyafurika cyane kuturusha’ uzi byose, uvuga ururimi rwawe, wumva byose iyo usubiye iwanyu mu gihugu cyawe, binyereka umwihariko.”

Yavuze ko ataramenya niba abakobwa be bakunda ibyerekeye amarushanwa y’ubwiza gusa ngo baramutse bakuze bakiyumvamo kuba bahatana yabaha rugari.

Ubwo Miss Sonia Rolland yari mu kiganiro na Makeda

Sonia Rolland na Jalil Lespert bafitanye umwana w’umukobwa witwa Kahina wavutse mu Ugushyingo 2010 gusa uyu mugore wabaye Nyampinga w’u Bufaransa asanzwe afite undi mukobwa witwa Tess w’imyaka icyenda yabyaranye na Christophe Rocancourt mu mwaka wa 2007. Sonia na Christophe Rocancourt bari barihaye akabyiniriro ka Roc & Rol impine y’amazina yabo.

Miss Sonia Rolland ntateganya kubyara undi mwana
Sonia Rolland avuga ko kuba Nyampinga w'u Bufaransa yabibonaga nk'inzozi zidashoboka

Amafoto: Mahoro Luqman


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza