Ubundi ‘Slay Queen’, imvugo yaciye igikuba; yitirirwa bantu ki?

Yanditswe na Uwiduhaye Theos
Kuya 8 Ugushyingo 2018 saa 01:03
Yasuwe :
0 0

Miss Uwase Vanessa Raïssa wabaye igisonga cya mbere cya Nyampinga w’u Rwanda 2015 yagarutsweho cyane ku mbuga nkoranyambaga nyuma yo kwitwa ‘Slay Queen’, izina rihabwa abakobwa barisha ikimero.

Aya magambo yatuweho yamuguye nabi, yisobanura ko ahabanye n’uko abamutaranze bamutekereza.

Amateka agaragaza ko ‘Slay Queen’ ari ijambo ryatangiye gukoreshwa hambere mu kugaragaza umunyempano ukunyura.

Iri jambo bivugwa ko ryakoreshejwe bwa mbere mu rwenya rw’uwitwa Sarah Andersen. Yagize ati “Slaaaaayy Queen, slaayy!” Yagaragazaga akanyamuneza ku cyamamare yiyumvagamo.

Iki gisobanuro cyahinduye inyito, ndetse abiyita iri zina batangira no kubirisha nubwo hari abukwa umunabi bakaruca bakarumira.

Mu Rwanda bamwe ntabwo barasobanukirwa! Bazi ko Slay Queen ari umukobwa usa neza ufite amafaranga kandi ukunda kuryoshya nk’uko ab’ubu babivuga.

Iyi foto imaze iminsi icicikana igaragaraza ikiba kiri mu mutwe wa ba Slay Queen

Aba-Slay Queen ni bantu ki?

‘Slay Queen’ ni ijambo rimaze kumvikana mu matwi ya benshi. Mu Rwanda ryatangiye kugira ubukana mu 2017. Abarikoresha baba baninura abakobwa birirwa ku mbuga nkoranyambaga bacugusa amabuno. Abenshi muri bo nta kazi kazwi bagira ariko bagahora mu bagaragaza ko bafite agatubutse ku mufuka.

Ubwiza bagaragariza umuhisi n’umugenzi unyura ku mbuga nkoranyambaga akenshi buhuzwa no kurembuza amafaranga yo mu buriri bahabwa n’abafite agatubutse. Mu yandi magambo, abitwa Slay Queen babona amafaranga bayakesha ibikorwa byo gusambana.

Abasobanura ‘Slay Queen’ bashimangira ko ari inkumi zidatana no kugaragaza imiterere y’imibiri yazo, aho zisohokera, imyambarire igezweho, amafunguro akunzwe, imodoka nziza n’ibindi zikoresheje imbuga nkoranyambaga. Ni nk’ipata n’urugi, ntibitana.

Ba ‘Slay Queen’, ni abanyabirori! Ahari umuziki hose urahabasanga kandi bakarangwa n’imyambarire yihariye. Ni bo usangana imyambaro igezweho ku isoko, urukweto rwiza, amavuta ahumura neza n’isakoshi nziza. Ubuzima bwabo bwose babukubira mu mafoto asakazwa ku karubanda.

Muri make batuye ku mbuga nkoranyambaga kuko abenshi basangiza Isi ibikubiye mu munsi wabo.

Bakunda gusohokera mu tubari tugezweho bafite gahunda yo kwiyereka abanyemari bahasohokera kugira ngo babaryoshyaryoshye babarye utwabo.

Urubuga rwa Google rugaragaza ko Slay Queen ari umukobwa utajya akundana cyangwa agendana n’abasore batifite kandi akamara amasaha menshi ku mbuga nkoranyambaga nka Snapchat na Instagram akaraga ikibuno.

Akenshi kuri izi mbuga biyerekana nk’ababayeho mu buzima bwa gikire nyamara muri bo hari n’abadafite urwara rwo kwishima.

Hari n’abongeraho ko aba bakobwa [Slay Queens] baba bafite ubwenge hafi ya ntabwo kuko abakandagiye mu ishuri wababarira ku mitwe y’intoki n’abarigiyemo ugasanga nta buhanga buhambaye bavanyemo cyangwa barayasubitse.

Miss Vanessa ati reka reka!!!

Uburakari bwa Miss Uwase Vanessa ku bamwise ‘Slay Queen’ bwakongejwe n’igishushanyo kigaragaza ko ubwonko bw’aba bakobwa butekereza ku mafiriti no kwinezeza mu mibonano mpuzabitsina ariko mu mutwe nta kirimo.

Mu Rwanda hari abakobwa benshi bamaze kwamamara ndetse bamwe ntibatinya kwiyita Slay Queens ariko ugasanga babyitiranya no kuba umunyamujyi.

Miss Vanessa Raïssa we yiyamye abakobwa bajya bamushyira mu gatebo kamwe na bo.

Mu butumwa bw’uruhererekane yashyize ku rubuga rwa Instagram yagaragaje ko ari umushabitsi urajwe ishinga no kurwana ku muryango we no gukarishya ubwenge.

Yagize ati “Nshaka gukuraho urujijo kuri iki kintu ku bakobwa bajya bambwira ko batekereza ko nanjye ndi Slay Queen; mwumve neza … ndi gukora ubucuruzi nshaka ko bugera ku rwego rwo hejuru [V Coffee House].”

Yakomeje avuga ko iyo atari mu bucuruzi, aba akarishya ubwenge.

Ati “Iyo ntari gukora mu bucuruzi, umutwe wanjye uba uri kuri mudasobwa ndi kwiga mboneyeho no kubatumira umwaka utaha muri Nyakanga kuko nzarangiza kaminuza. Ntabwo njya niyerekana mu myambaro n’inkweto bihenze cyangwa ngo mpfundure inzoga zihenze muri weekend mu tubyiniro dutandukanye. Nshaka gutanga umusanzu ku muryango wanjye mu gihe nkibana nawo.”

Miss Uwase yavuze ko amafaranga abona ayizigama ashaka kuzakomeza amashuri ye mu cyiciro cya gatatu cya kaminuza [Master’s degree] nasoza amasomo ari kwiga ubu.

Miss Uwase yavuze ko abantu bakwiye kujya bamutandukanya n'abandi bakobwa
Ni uku ateye...
Vanessa akunda kwiyerekena mu buzima bwo kwinezeza
Miss Vanessa yavuze ko ahanze amaso amasomo n'imishinga imuteza imbere kuruta kuba Slay Queen
Miss Vanessa yihanangirije ababona umukobwa wese ku mbuga nkoranyambaga bakamwita Slay Queen

Shaddy Boo ni umwe mu badatana n’imbuga nkoranyambaga mu myamboro ivugisha benshi

Supersexy nawe yabaye ikimenyabose kubera imbuga nkoranyambaga

Ibyo akora ngo ntiyita ku bamuvuga nabi
Umubano we n'umugabo baherutse kurushingana ni nta makemwa nubwo hari abamufata nk'uwataye umuco
Nana Supersexy ubusanzwe yitwa Hycente Weber
Supersexy ni umugore wubatse mu buryo bwemewe n'amategeko
Izina rye ryaramamaye ku mbuga nkoranyambaga

Supersexy Nana ashyira ku mbuga nkoranyambaga videos zivugisha benshi


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza