Zabyaye amahari hagati ya Bruce Melodie n’umunya-Ecosse bakoranye n’indirimbo

Yanditswe na Muvunyi Arsène
Kuya 9 Mutarama 2019 saa 08:59
Yasuwe :
0 0

Umuhanzi Bruce Melodie ntavuga rumwe n’umunya-Ecosse, Iain Stewart, ku ndirimbo aherutse gusohora batabyumvikanyeho.

Iain Stewart ni umuhanzi w’umunya-Ecosse washakanye n’umunyarwandakazi. N’ubwo adakora umuziki nk’uwabigize umwuga, ajya anyuzamo agashyira hanze indirimbo zirimo ize bwite n’izo akorana n’abahanzi bo mu Rwanda.

Afite iyitwa ‘Love Again’ yakoranye na Mani Martin, ‘Ndagukunda’ iri mu rurimi rw’ikinyarwanda na ‘Karma’ yakoranye na Bruce Melodie imaze iminsi mike isohotse.

Iyi ndirimbo ‘Karma’ ni nayo yateje ibibazo hagati y’aba bahanzi bigendanye n’uburyo yashyizwe hanze.

Mu itangazo yashyize ku mugaragaro, Iain Stewart uri muri Ecosse, yavuze ko yari yumvikanye na Bruce Melodie ko bazakorana iyi ndirimbo ikazasohoka ifite n’amashusho, ariko ntibyaboshoboka bemeranywa ko bazashyira hanze amajwi n’amagambo gusa ubundi bakazafata amashusho babonye umwanya.

Yakomeje avuga ko abajyanama b’uyu muhanzi bagiye bamusaba kwimura igihe bashyirira hanze iyi ndirimbo, ibintu yabonaga ko ari ukumutinza, kandi nta n’umwanya azabona vuba ngo agaruke mu Rwanda bafate amashusho.

Ati “abajyanama be bemeye gushyira hanze iyi ndirimbo mu Ugushyingo, ariko babyimurira mu Ukuboza, ubundi muri Mutarama kugira ngo izabone umwanya uhagije wo kuyimenyekanishwa. Nyuma bansabye ko twabyimurira muri Werurwe kugeza igihe amashusho afashwe. Nababwiye ko ntashobora kubikora kuki hari abantu bategereje iyi ndirimbo kandi ntazabona umwanya wo kugaruka gusura u Rwanda ngo dufate amashusho.”

Uyu mugabo yavuze ko yashakaga kumenyekanisha umuziki wa Bruce Melodie hanze y’u Rwanda, avuga ko yababajwe bikomeye no kuba nta bufasha yigeze amuha mu kumenyekanisha iyi ndirimbo kandi yarayigizemo uruhare.

Ati “Ubutumwa bwa nyuma noherereje Bruce ni ku itariki 2 Mutarama, nemeza ko tugiye gushyira hanze indirimbo nk’uko twari twabyemeje mbere kandi nari nizeye ko nzabona ubufasha bwe. Kugeza ubu ntaransubiza, birambabaje cyane.”

Mu kiganiro yagiranye na IGIHE, Bruce Melodie yavuze ko uyu mugabo bari bumvikanye ko indirimbo igomba gusohoka ifite amashusho ariko birangira yisubiyeho.

Ati “Na mbere y’uko tuyikora nari nabimusobanuriye. We yaje ansaba ubufasha ngo dukorane indirimbo, ndabumuha ariko ku ihame izasohokana n’amashusho, ariko bigeze hagati ashaka ko tuyisohora idafite amashusho, mubwira ko gahunda mfite n’abajyanama banjye, ari uko tugomba gusohora indirimbo zifite amashusho.

Bruce Melodie yavuze ko nta kuntu atari yagize ngo yorohereze Stewart dore ko yanamwishuriye amafaranga yo kuyinonosora (mastering) nyamara ibyagombaga kuyigendaho byose byari kuri we.

Ati “Ubundi we yagombaga kwishyura ibintu byose, mastering ananiwe kuyishyura ndayimwishurira, hanyuma twumvikana ko iyo ndirimbo igomba gusohoka ifite amashusho.”

Uyu muhanzi yemeza ko Iain Stewart atari akwiye kwihutira gushyira hanze indirimbo bitewe n’igitutu cy’abafana kuko umuhanzi w’umwuga ‘akwiye guhora afite indirimbo yaha abakunzi mu gihe bikenewe’.

Bruce Melodie yanzuye ko mu gihe uyu muhanzi adafashe indege ngo agaruke mu Rwanda, bakore amashusho, adashobora kuyimenyekanisha.

Iyi ni indirimbo ya kabiri ya Bruce Melodie igiye hanze mu buryo butumvikanyweho, dore ko mu mpera za Ukuboza 2018 nabwo indirimbo yitwa ‘Appetit’ yakoranye Fik Fameica wo muri Uganda nayo yashyizwe hanze na studio na IDA Records nta burenganzira bwatanzwe.

JPEG - 233.6 kb
Iain Stewart yari aherutse mu Rwanda ahakorera indirimbo ebyiri
Bruce Melodie yagaragaje ko yatengushywe na Iain Stewart mu gihe undi yashimangiye ko ibyo yagombaga gukora byose yabikoze

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza