R. Kelly agiye gukorwaho filime isobanura uko yashoye abakobwa mu busambanyi

Yanditswe na Dusabimana Aimable
Kuya 22 Gicurasi 2018 saa 09:11
Yasuwe :
0 0

R. Kelly ukomeje gushyirwaho igitutu n’imiryango y’abakobwa bivugwa ko yinjije mu tsinda rikora imibonano mpuzabitsina nk’abacakara abizeza ubwamamare, agiye gukorwaho filime mbarankuru irondora ibyo byaha byose ashinjwa.

Uyu mushinga ukiri mu itunganywa ufitwe mu biganza n’ikigo gitunganya kikanerekana amashusho cya Lifetime, giteganya kwifashisha ubuhamya bw’imiryango y’abakobwa ‘bogejwe mu bwonko’ n’uyu muhanzi w’icyamamare akabinjiza mu bikorwa by’ubusambanyi.

Tim Savage, se w’umwe muri abo bakobwa witwa Joycelyn Savage, yahamirije TMZ ko imiryango itatu iri gukorana by’imbonankubone na Lifetime kugira ngo hakorwe icyo cyegeranyo kizagaruka ku manyanga yakoreshejwe na R. Kelly akoresha ubucakara bw’imibonano mpuzabitsina abo bakobwa.

Yongeyeho ko iyo filime mbarankuru izagaragaramo umwana w’uwitwa Michelle Gardner akina umupira kimwe n’uwa Angelo Clary. Yavuze ko amwe mu mashusho azagaragaza uwo mugore mu Mujyi wa Los Angeles ashakisha umukobwa we witwa Dominique.

Michelle uri mu bazagaragara muri ayo mashusho avuga ko yabonye umukobwa we mu mashusho yasohowe mu ibazwa rya mugenzi we Joycelyn, yambaye ingofero y’ibirango by’umukino wa ‘Baseball’ n’umupira w’umukara.

Iki kinyamakuru gitangaza ko Michelle mu buryo bumwe yaje kuvumbura aho Dominique yari ari akamucyura mu gihe Angelo we akigerageza gushaka umukobwa we witwa Azriel wahuye na R. Kelly afite imyaka 17 bagahita bajya kubana.

TMZ ivuga ko ikigo cya Lifetime cyatangiye gukora filime mbaragankuru kuri ibyo bibazo imiryango itandukanye yagiranye na R. Kelly kubera kwigarurira abakobwa b’abangavu bayivukamo akabashora mu busambanyi.

Ibihangano bya R. Kelly biherutse gukurwa ku ntonde z’indirimbo zicurangwa ku rubuga rwa Spotify ruri mu ziyoboye zisakaza umuziki ku Isi, biturutse kuri ibi birego byinshi amaze kumvikanamo.

Intandaro y’ikibazo cy’uyu muhanzi ni ubushakashatsi bwakozwe n’ikinyamakuru Buzzfeed mu 2017 bugashyize ku mugaragaro ubuhamya bw’abakobwa benshi bavuze ko bari baragizwe abacakara b’igitsina mu ngo ze ziri i Chicago na Atlanta nubwo abanyamategeko be babyamaganiye kure bikarangira adahanwe.

Mu bihe bitandukanye, R. Kelly yagiye agaragazwa mu mafoto ari kumwe n’abakobwa arusha imyaka myinshi ndetse rimwe akemeza urukundo rwe na bo ntibivugweho rumwe.

R. Kelly akomeje kotswa igitutu kubera ibirego byo gushyira abangavu mu busambanyi

R.Kelly yaherukaga kuregwa ku ishami rya polisi yo mu Mujyi wa Dallas n’umugore wavuze ko yamwanduje indwara yandurira mu mibonano mpuzabitsina. Iki kirego cyafunguwe muri Mata uyu mwaka.

Yaherukagwa no gukorerwa imyigaragambyo bikozwe n’amatsinda ya ‘Time’s Up’ muri Leta Zunze Ubumwe za Amerika yasabaga ko hakorwa “iperereza ryimbitse” mu birego ashinjwa ndetse hasabwa ko abakomeye mu ruganda rw’umuziki bamukuraho amaboko ntibongere kumucuranga.

R. Kelly amaze gushinjwa inshuro nyinshi gukoresha abangavu imibonano mpuzabitsina
R. Kelly azwi nk'umwe mu baririmbyi bubatse ibigwi muri R&B

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza