Chorale de Kigali yateguye igitaramo kizanatangirwamo isomo rya muzika y’abahanga

Yanditswe na Cyprien Niyomwungeri
Kuya 8 Ugushyingo 2018 saa 05:40
Yasuwe :
0 0

Abaririmbyi ba Chorale de Kigali imaze kuba ubukombe mu kuririmba indirimbo zuje ubuhanga bunyura amatwi n’umutima, barategurira abakunzi babo igitaramo cy’indirimbo zizabafasha kwitegura neza Noheli.

Kuva mu 2013 Chorale de Kigali itegura igitaramo kitwa ‘Christmas Carols Concert’, kigamije kwifuriza abanyarwanda by’umwihariko abakunzi bayo Noheli nziza, batibagiwe gusoza neza umwaka no gutangira undi mu mahoro no mu munezero.

Iki gitarambo kizabera muri ‘Kigali Conference and Exhibition Village’, ahahoze ari Camp Kigali, kuwa 23 Ukuboza 2018, mu ihema ryitwa Akagera Hall. Kikazatangira saa kumi n’ebyiri z’umugoroba.

Ubuyobozi bwa Chorale de Kigali buvuga ko bwateguriye abakunzi b’iyi korali ibyiza byinshi birenze ibyo bakunze mu myaka yatambutse, bukabasaba kuzajya kwiyumvira umuziki mwiza unyuze amatwi n’umutima.

Mu kiganiro cyihariye na IGIHE, Visi Perezida wa Chorale de Kigali, Rukundo Charles Lwanga, nk’uko bisanzwe mu gutegura igitaramo nk’iki bashaka ibyiza birushijeho, uyu mwaka bikaba ari agahebuzo ku buryo yizera ko abazaza bazishima kuruta uko bishimye mbere.

Ati “Tuzabaririmbira indirimbo ziririmbanye ubuhanga, kubera ko ugereranyije n’izo twaririmbye mu myaka yashize, ubu rwose abahanga bacu mu by’umuziki bagerageje gushaka indirimbo zuje ubuhanga n’uburyohe, zigaragaza koko umuziki nyamuziki”.

Akomeza avuga ko igitaramo cya 2018 gifite umwihariko w’indirimbo zifite ubuhanga butandukanye n’izindi, aho abazitabira igitaramo bazishima ariko bakaniga uko izo ndirimbo ziririmbwa.

Ati “Sinatinya no kubwira abantu ngo bazaze bige umuziki muri iki gitaramo kuko ni umwanya mwiza wo kureba uburyo abantu baririmba neza kandi baririmba indirimbo koko zifite ubuhanga buhanitse”.

Ku bijyanye n’ubuhanga buhanitse bw’indirimbo zitegurirwa abazitabira igitaramo, Ndikubwimana Gilbert uri mu bazitegura, asobanura ko zifite amanota akomeye aririmbwa n’abahanga cyane mu muziki.

Ati “Hari nk’ibintu abantu bazi umuziki bita ‘ton’, ‘demi-ton’, ibyo bintu rero kuririmba demi-ton nk’eshanu cyangwa esheshatu zikurikirana, abantu benshi ntabwo bakunze kubishobora, turimo turabyitoza”.

“Ikindi rero hari ibyitwa Octave, kuva kuri Octave imwe ujya ku yo hasi, ujya hejuru, ukongera ugasubirayo cyangwa ukamanukaho gato, gutyo gutyo bigafata umwanya, ni ibintu turimo kwitoza dutoza n’abaririmbyi, ku buryo inyinshi mu ndirimbo zigiye zifite utwo tuntu tw’umwihariko. Uretse n’uko abantu igitaramo bagikuramo ibyishimo, ariko nanone bagikuramo n’amasomo”.

Chorale de Kigali ikomeje imyiteguro kandi y’indirimbo ziri mu ndimi zitandukanye nk’Ikinyarwanda, Icyongereza, Igifaransa, Igitaliyani n’izindi. Ntiyibagiwe kandi izo gucinya akadiho dore ko igitaramo ari umwanya w’ibyishimo.

Imyiyereko n’indirimbo ziririmbwa n’abana ni ikindi gice cy’igitaramo cyizihira abakunzi ba Chorale de Kigali, uyu mwaka nacyo nticyibagiranye ahubwo kizanogera abakunzi bacyo mu isura nshya.

Kwinjira mu gitaramo ni 5000 Frw mu myanya isanzwe na 10 000Frw mu myanya y’imbere. Amatike azatangira kugurishirizwa ahantu hatandukanye mu Mujyi wa Kigali bidatinze.

Chorale de Kigali yashinzwe mu 1966, ubu ni korali irimo abagore, abagabo n’urubyiruko ari nabo benshi. Ifite abanyamuryango bahoraho 125.

Ikiganiro na Rukundo Charles Lwanga ku myiteguro y’igitaramo

Chorale de Kigali imaze kuba ubukombe mu kuririmba indirimbo z'ubuhanga
Benshi banyurwa n'amajwi ayunguruye y'abagore n'abakobwa baririmba muri Chorale de Kigali

Zimwe mu ndirimbo Chorale de Kigali yaririmbye mu bitaramo biheruka

Video: Salomo George


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza