Slaï wamamaye mu njyana ya Zouk agiye gutaramira abasohokera muri Cadillac

Yanditswe na Muvunyi Arsène
Kuya 13 Kanama 2019 saa 02:32
Yasuwe :
0 0

Umuririmbyi w’Umufaransa wamamaye mu ndirimbo ziri mu njyana ya Zouk, Slaï, agiye gutaramira mu kabyiniro ka Cadillac, ngo afashe abakunda injyana ya Zouk kurushaho kwishima.

Iki gitaramo kizaba tariki ya 16 Kanama 2019 muri gahunda yiswe Zouk Love Party, yahariwe indirimbo zo mu njyana ya Zouk kandi zuje amagambo y’urukundo.

Umuhanzi ukomoka mu Bufaransa Patrice Sylivestre uzwi nka Slaï, ni we watumiwe ngo azataramire abasohokera muri Cadillac Night Club.

Uyu mugabo w’imyaka 46 ni umwe mu bahanzi bakunzwe cyane bitewe n’indirimbo ze zo mu njyana ya Zouk, zifasha abari mu rukundo cyane cyane abumva ururimi rw’Igifaransa.

Indirimbo ze zakunzwe harimo nk’iyitwa “Flamme” yanegukanye igihembo cya Tropical Music Awards mu 2000, "La dernière danse (ne rentre pas chez toi ce soir)" "Après la tempête” n’izindi nyinshi.

Mu kiganiro IGIHE yagiranye n’umuyobozi wa Cadillac Night-Club, Habimana Eugène uzwi nka Cobra, yavuze ko batumiye uyu muhanzi nyuma yo kubona abantu benshi basabye ko yabataramira.

Ati “Hari abantu benshi bamusabye kandi igihe yazaga ntabwo abantu benshi babimenye. Twakoze ubushakashatsi dusanga akenewe cyane.”

Biteganyijwe ko Slaï azagera mu mujyi wa Kigali tariki 15 Kanama 2019 i saa munani z’amanywa.

Cobra yavuze ko bafite gahunda yo gukomeza kuzana abahanzi batandukanye mu rwego rwo gushimisha abakunzi babo no kubarinda kurambirwa.

Ati “Turashaka kubakorera nk’ibintu twakoreraga muri Cadillac kuva kera kugira ngo abakiriya bacu batarambirwa, tugomba kuzajya tubahindurira no kubaha serivisi nziza kugira ngo barusheho kwishima.”

Slaï yeherukaga gutaramira i Kigali muri Gashyantare 2019 ubwo yaririmbaga mu gitaramo cya Kigali Jazz Junction, icyo gihe yashimishije abantu mu buryo bukomeye.

Kwinjira mu gitaramo azakorera muri Cadillac ni ibihumbi 10 Frw mu myanya isanzwe, ibihumbi 15 Frw mu myanya y’icyubahiro n’ibihumbi 250 ku meza y’abantu batandutu ariho icupa ry’icyo kunywa.

Reba ’Flamme’, imwe mu ndirimbo za Slaï zakunzwe cyane

Mu gitaramo Slaï aheruka gukorera i Kigali yashimishije abantu cyane
Slaï yatumiwe ngo ataramire abazasohokera muri Cadillac

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza