Indirimbo ya Meddy na Sauti Sol ishobora kurangirira mu magambo gusa

Yanditswe na Bukuru JC
Kuya 24 Gashyantare 2017 saa 09:48
Yasuwe :
0 0

Meddy umaze imyaka irindwi muri Amerika aherutse gutangaza ko afite umushinga w’indirimbo n’itsinda ry’abaririmbyi bagize Sauti Sol, kugeza ubu amezi atandatu arihiritse uyu mushinga utegerejwe.

Indirimbo ya Meddy na Sauti Sol yatangiye kunugwanugwa muri Nzeri 2016 ubwo Sauti Sol yari imaze iminsi mike ikoreye igitaramo mu Mujyi wa Kigali[bamurika album ‘Live and Die In Afrika’] igasiga ivuze ko yifuza gukorana n’umuhanzi ukunzwe kurusha abandi mu Rwanda.

Mu biganiro aba baririmbyi bakoranye n’itangazamakuru mbere y’uko basubira muri Kenya babajije amazina y’abahanzi bakomeye mu Rwanda bahabwa The Ben na Meddy ari nabwo bahise bavuga ko uzabegera bazakorana indirimbo.

Nyuma y’igitaramo Sauti Sol yakoreye mu Rwanda yerekeye muri Leta Zunze Ubumwe za Amerika gukora ibindi bitaramo, yanitabiriye ibirori byo gutanga ibihembo bya Afrimma Awards biherutse gutangirwa mu Mujyi wa Dallas. Aba bahanzi bo muri Kenya bahuriyeyo na Meddy bahita batangira umushinga wo gukorana indirimbo ariko kugeza ubu yaheze mu magambo gusa.

Icyo gihe Meddy yahise abwira IGIHE ko ‘bari barabanje kuganira kuri iyi ndirimbo mbere y’uko bajya muri Amerika’ ndetse yavuze ko igomba kujya hanze bidatinze none amezi atandatu arashize nta kanunu.

Yagize ati “Twari twabipanzeho gato mbere y’uko baza inaha hanyuma tuza guhurira muri Afrimma awards yabereye i Dallas nibwo twicaye turabipanga duhita dutangira gukorana, ubu turi gushaka uburyo bwo guhita dukora video yayo […] Ndatekereza ubu bufatanye buzatuma umuziki wanjye waguka ukagera kure.”

Mu minsi mike ishize Sauti Sol yanyuze i Kigali yerekeza i Goma muri Repubulika Iharanira Demokarasi ya Congo kwitabira iserukiramuco rya Amani Festival ryabaye kuva ku itariki 10,11 na 12 Gashyantare 2017 i Goma.

Mu kiganiro umwe muri bo witwa Bien-Aimé Baraza yabwiye IGIHE ko hari byinshi bigitekerezwa ku ndirimbo yabo na Meddy ndetse yanze kwerura ngo avuge igihe izagira hanze “kuko hari ibikirebwaho neza”.

Uwitwa Delvin Mudigi we yasaga n’uwibagiwe iby’iyi ndirimbo kuko ubwo umunyamakuru yabazaga iri tsinda aho umushinga wabo n’umuhanzi nyarwanda ugeze yabanje kubaza ati “Nimubwire umuhanzi ukomeye hano, uwo muduha tuzakorana na we…”

Ubwo Meddy aheruka guhura na Sauti Sol muri Amerika

Mugenzi we Bien-Aimé yahise amuca mu ijambo arasubiza ati “eeeh ya ndirimbo na Meddy? Iriya izaza, ni umushinga twakozeho niba nibuka ubwo duheruka kujya muri Amerika, tuwutangira wari umushinga mwiza ku buryo nurangira bizaba ari byiza.”

Meddy afite undi mushinga w’indirimbo yakoranye na Christopher nayo itegerejwe na benshi kuva mu mwaka wa 2016, gusa impande zombi zihamya ko yarangiye ndetse igisigaye ari ukuyirekura.

Meddy aheruka gusohora indirimbo yitwa 'Ntawamusimbura' yaje mu ntangiriro za 2016
Meddy yavugaga ko indirimbo ye na Sauti Sol izamugeza ku rwego mpuzamahanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza