Meddy yakozwe ku mutima n’umukobwa warokotse ubwicanyi bwakorewe Abanyamurenge

Yanditswe na Munyengabe Murungi Sabin
Kuya 18 Mutarama 2017 saa 11:04
Yasuwe :
3 3

Umuririmbyi Meddy yubakiye ku buhamya bw’umukobwa witwa Fille Kinyamahanga warokotse ubwicanyi bwakorewe Abanyamurenge asaba abafite umutima utabara kwerekeza amaso muri Sierra Leone.

Fille Kinyamahanga yasohoye ubuhamya burebure asobanura byimbitse inzira y’umusaraba yanyuzemo kuva mu mwaka wa 2004 ubwo Abanyamurenge n’abantu bose bavuga Ikinyarwanda bameneshejwe muri Congo bakagana iy’ubuhunzi abandi bakicwa.

Kinyamahanga yakuriye mu bibazo by’urudaca, ubukene, kurya nabi, guhora abunza akarago ahunga amasasu n’ubwicanyi bwibasiraga abaturage bo mu bwoko yakomokagamo muri Congo. Ubu ni impunzi muri Leta Zunze Ubumwe za Amerika ariko yubakiye ku byo yaciyemo yatangiye ubukangurambaga bwo gushakira ubufasha abaturage bari mu kaga muri Sierra Leone.

Ubuhamya bwa Fille Kinyamahanga bwakoze ku mutima Meddy abusangiza abafana ndetse asaba abafite umutima wo gufasha kumujya inyuma bagashyigikira iki gikorwa kugeza gishyizwe mu bikorwa.

Yagize ati “Mucyo dushyigikire iki gikorwa kizabe mu izina ry’Imana yacu Yesu Kirisitu. Umwuka wera abayobore muri uru rugendo. Ndimo gutekereza ukuntu umuriro ugurumana mu mitima yanyu kubera iki gikorwa. Tanga ubufasha cyangwa usakaze ubu butumwa.”

Nyagisindo Fille ni umukobwa ukomoka muri Congo akaba ari Umunyamurenge uvuga Ikinyarwanda, yahungiye muri Leta Zunze Ubumwe za Amerika, ahamaze imyaka igera ku icumi kuko yahageze muri 2007.

Ashingiye ku bibazo yakuriyemo n’uburyo yarokotse ubwicanyi bwakorewe Abanyamurenge ku ivuko rye muri Congo, mu Mujyi wa Kalemi no mu Burundi aho bahungiye ubu bwicanyi yihaye intego yo gutabariza abari mu kaga muri Sierra Leone igihugu azasura kuwa 27 Gicurasi na 13 Kamena 2017.

Ubuhamya bwa Kinyamahanga Fille warokotse ubwicanyi bwibasiye Abanyamurenge:

Muraho, nitwa Fille Kinyamahanga, navukiye muri Afurika yo hagati muri Congo. Ubwo nari mfite imyaka itanu twatewe n’ibyigomeke biba ngombwa ko duhunga. Icyo gihe nta modoka zari zihari, byadusabye gukora urugendo rw’ibyumweru bibiri n’amaguru kugira ngo tugere mu kandi gace kari gatuwe. Imana yaturinze umubisha mu rugendo rwose twakoze kugeza tugeze mu Mujyi wa Kalemi.

Kuva ubwo ubuzima bwanjye bwabaye bubi, ntabwo nari mfite amahirwe yo kumenya ahantu ngomba kuba, hari intambara z’urudaca ijoro n’amanywa, twirirwaga mu nzu ku manywa hanyuma nijoro tukajya kwihisha mu bihuru.

Muri 2004 habaye ihererekanya ry’ubutegetsi muri Congo ryatumye haba ubwicanyi bwibasiye Abatutsi muri Congo. Intego yari ugutsemba abantu bose bavuga Ikinyarwanda cyangwa undi muntu wese usa nkabo, ibyo byagize ingaruka ku bo mu bwoko bw’Abanyamurenge kuko ari bo bavugaga Ikinyarwanda, twagombaga kwicwa. Byabaye ngombwa ko dushaka igihugu cyari hafi tujya gushaka ubwihisho, hafi twabonye ni mu Burundi.

Mu ijoro ryo kuwa 13 Kanama 2004 abarwanyi ba FNL binjiye mu nkambi yacu ubwo bamwe muri twe bari basinziriye. Baje baririmba indirimbo zihimbaza Imana dukeka ko bari gusenga ari twaribeshye cyane. Aho binjiriye batangiye kwica abantu no kumisha gaze ku mahema. Ndacyumva mu matwi yanjye urusaku rw’amasasu n’imiborogo y’abantu basabaga ubufasha.

Mu ijoro rimwe abantu 160 batakaje ubuzima abandi 250 barakomereka harimo na mama, papa, mukuru wanjye na musaza wanjye. Ni njye warokotse kandi nzi neza ko hari impamvu Imana yemeye ko nkomeza kubaho. Nyuma y’ubwicanyi papa yitaga kuri mama na musaza wanjye mu bitaro njye nguma mu nkambi nshakisha ikizatunga abo mu muryango wanjye nyuma yo kuva mu bitaro.

Ndibuka nari nicaye hanze hanyuma umugore wari wambaye umupira wanditseho UNHCR araza ambaza ibibazo ariko ururimi ntirwatuma twumvikana. Yahagaze iruhande rwanjye afata agapapuro anyandikiraho umurongo wo muri Bibiliya Matayo 19:26, havugaga ko ku bwa muntu bidashoboka ariko ku bw’imbaraga z’Imana ibintu byose birashoboka. Ngize amahirwe yo kubona uwo mugore namushimira.

Kuva icyo gihe nifuzaga kuba umuntu uzana impinduka mu buzima bw’abandi bantu. Twagumye mu yindi nkambi imyaka itatu, ubuzima bwari ingume, mama yabyukaga buri munsi agateka amandazi nkajyana na we ku isoko kuyacuruza kugira ngo tubone icyo kurya n’imyambaro. Kugira ngo tugere ku isoko twakoraga urugendo rw’amasaha arenga abiri, hari n’igihe twageragayo ntitunacuruze n’irindazi rimwe.

Kuwa 20 Werurwe 2007 twagize amahirwe yo kuza muri Amerika aho nabonye ubwigenge n’uburenganzira bwo kuryama nijoro no kudatekereza ko umunsi ukurikiyeho ngomba gupfa. Ni ahantu mfite uburenganzira bwo guhitamo ibiryo nshaka, mfite akabati kuzuye imyenda n’inkweto, ni kuki ntashima Imana yampaye amahirwe yo kuba uwo yifuzaga ko mba we.

Narokotse Jenoside kugira ngo mbe undi muntu wamamaza ijambo ry’Imana mpereye muri Sierra Leone. Maze imyaka icumi muri Amerika, ubu ni igihe cyanjye cyo gufasha abakeneye ubufasha.

Ubwo ninjiye muri Kaminuza ya Southwestern Assemblies of God University ntabwo nari nzi uko ubuzima bwanjye buzamera. Ubu nditegura kujya gukora igikorwa cyanjye muri Sierra Leone. Ndi umunyeshuri, niga igihe cyose kandi nta kazi mfite. Nkora ibikorwa byo gufasha, umuryango wanjye ntabwo Wabasha gufasha kubera akazi ufite.

Umuntu wese uzamfasha kugera ku nzozi zanjye Imana izamuha umugisha iteka. Nzakoresha ubufasha muzampa mu kubona amatike y’indege n’ibyo kurya by’itsinda tuzajyana. Tuzajyayo kuwa 27 Gicurasi kugeza kuwa 13 Kamena 2017. Nkeneye ubufasha mu buryo bwihuse, nsigaranye amezi make, nimumfasha bizaba bisobanuye ko byose bishoboka.

Si njye njyenyine uzafasha abantu bo muri Sierra Leone, namwe nzavuga ko mwakoze akazi gakomeye ningerayo. Nizeye ko hari ingororano izava mu ijuru.

Nyura hano ufashe Kinyamahanga


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza