Meddy yasusurukije ibirori by’ubusabane byahuje Abanyarwanda muri Arizona

Yanditswe na IGIHE
Kuya 25 Nyakanga 2017 saa 08:26
Yasuwe :
0 0

Meddy umaze imyaka irindwi mu mahanga yasusurukije igitaramo cyahurije hamwe Abanyarwanda n’inshuti zabo batuye muri Leta ya Arizona.

Iki gitaramo cyiswe ‘Get Together’ cyabereye mu Mujyi wa Phoenix ku mugoroba wo ku wa Gatandatu tariki ya 22 Nyakanga 2017, cyahurije hamwe Abanyarwanda n’inshuti zabo haba abatuye muri Arizona no mu zindi leta zihana imbibi muri New Mexico, Utah, Nevada, California, Colorado n’abatuye mu Majyaruguru ya Mexico.

Iki gitaramo cyateguwe n’umuryango w’Abanyarwanda batuye muri Arizona [RCA/Arizona] mu rwego rwo kwishimira ibyagezweho no kwiha intego yo kutazatatira igihango mu kwimakaza agaciro u Rwanda rwihaye mu myaka ishize.

Ibi birori byatangiye ahagana saa kumi n’imwe z’umugoroba, byabereye ahitwa Peoria Community Center hari hateraniye Abanyarwanda biganjemo urubyiruko na benshi mu babyeyi batuye muri Arizona ndetse n’inshuti zabo zaturutse mu mijyi ihana imbibi na Phoenix.

Ubu busabane kandi bwitabiriwe na Madame Raissa Irakoze Cunningham waje ahagarariye Umuryango w’Abanyarwanda baba muri Amerika (USRCA), Colonel Vincent Nyakarundi ushinzwe ibijyanye n’igisirikare muri Ambasade y’u Rwanda muri Leta Zunze Ubumwe za Amerika na Canada waje ahagarariye Madamu Mathilde Mukantabana uhagarariye U Rwanda muri iki gihugu.

Ibi birori byari umwihariko ku batuye muri diaspora y’u Rwanda kuko hari umudiho ukomeye mu mbyino gakondo za kinyarwanda benshi bari bamaze igihe kinini bakumbuye.

By’akarusho, umuririmbyi Meddy wari umuhanzi w’imena mu batumiwe muri ubu busabane yararirimbye benshi baranyurwa ndetse yongereye ibyishimo mu baje muri ibi birori byasusurukijwe na MC Ally Soudy usanzwe atuye muri North Dakota.

Mu ijambo rye, Jean Claude Habineza, Perezida wa RCA Arizona, yashimiye abitabiriye ubusabane nyuma y’amezi agera kuri atandatu badataramira hamwe kuko baherukaga guhura ku itariki ya 7 Mutarama 2017.

Yakomeje agira ati « Icyo gihe tukaba twari twiyemeje kujya duhura kenshi kugirango dushimangire ubumwe bwacu hagamijwe kwiteza imbere no guteza imbere igihugu cyacu. Uyu munsi w’ubusabane uhuriranye n’uko turimo kwitegura umunsi wo kwitorera Perezida wa Repubulika uzaba ku itariki ya 3 Kanama 2017. Nshimiye abiyandikishije kuzatora mboneraho no kubatangariza inkuru nziza ko Arizona yemerewe ibiro by’amatora.»

Uyu muyobozi yashishikarije abitabiriye ubu busabane kuzatora neza avuga ko ushaka amahoro, ubumwe n’iterambere azi uwo akwiye guhitamo.

Yibukije ko umukandida wa RPF Paul Kagame yagaragaje ubuhanga n’ubushobozi bwo kuyobora bikaba bigaragazwa n’ibyo yagejeje ku Banyarwanda harimo kuyobora urugamba rwahagaritse Jenoside yakorewe Abatutsi, ndetse n’ibikorwa by’amajyambere yagejeje ku Rwanda mu gihe amaze mu ntebe y’ubuyobozi.

Umushyitsi mukuru, Col. Vincent Nyakarundi yashimye ukuntu umuryango wa RCA Arizona umaze gutera imbere. Yasobanuye ko kuba Arizona ari hamwe mu hantu 10 hashyizwe ibiro by’itora muri Leta Zunze Ubumwe z’Amerika bitikoze ahubwo hari umubare wagombaga kugerwaho mu biyandikishije kuzatora.

Yagize ati « Ntimuzadutetereze twe twemeje ko hano hakwiye koko ibiro by’itora, ndetse n’Umuyobozi wa RCA Arizona. Muzitabire amatora, kandi mutore ingirakamaro.»

MC Ally Soudy wari uyoboye ubu busabane yatangaje ko ibirori bisojwe ahagana saayine z’ijoro, umuhango wasojwe abitabiriye bakigaragaza ko bari bakinyotewe no gutarama.

Bamwe mu bayobozi bitabiriye ubu busabane
Ubu busabane bwahurije hamwe Abanyarwanda batuye muri Leta ya Arizona
Mu mudiho w'indirimbo za kinyarwanda
MC Ally Soudy wayoboye ibi birori
Madame Raissa Irakoze Cunningham waje ahagarariye Umuryango w’Abanyarwanda baba muri Amerika (USRCA)
Col. Vincent Nyakarundi ushinzwe ibijyanye n’igisirikare muri Ambasade y’u Rwanda muri Leta Zunze Ubumwe za Amerika na Canada yari umushyitsi mukuru
Meddy yararirimbye benshi barizihirwa
Ibirori byasojwe bakigaragaza ko bashaka gutarama

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza