00:00:00 IGIHE NETWORK KN KINYARWANDA EN ENGLISH FR FRANCAIS

Filime zigaragaramo Abanyarwanda wasanga kuri Netflix

Yanditswe na Mahoro Vainqueur
Kuya 23 Ugushyingo 2022 saa 09:02
Yasuwe :

Ikigo cya Netflix kizwiho kuba ari kimwe mu biza imbere mu bicururizwaho filime zikomeye ku Isi, aho kuri ubu gifite abafatabuguzi barenga miliyoni 222 mu bihugu 190.

Ku bakunzi ba sinema , hari zimwe muri filime nziza wasanga kuri uru rubuga zigaragaramo abakinnyi b’abahanga bafite inkomoko mu Rwanda.

Zimwe muri filime tugiye kugarukaho zirimo abakinnyi ba sinema b’Abanyarwanda nka; Trezzo Mahoro , Eliane Umuhire, Mizero Ncuti Gatwa na Lionël Ruzindana.

‘To All the Boys: P.S. I Still Love You’

Iyi filime igaruka ku gice cya kabiri cy’iyitwa ‘To All the Boys I’ve Loved Before’ yagiye hanze muri 2018, yayobowe na Michael Fimognari yandikwa na Sofia Alvarez na J. Mills Goodloe.

Igaruka ku nkuru y’umukobwa wakundanye n’ abahungu bahuye mu bihe bitandukanye, gusa akajya abandikira amabaruwa akayabika, rimwe murumuna we ayagwaho akayoherereza ba bahungu batanu baba barakundanye na we.

Umwe muri bo aza kumusaba ko bakongera gukundana ariko ari kumubeshya agira ngo atere ishyari undi mukobwa wamwanze, agace ka mbere karangira aba bombi baratangiye gukundana bya nyabyo.

Umunyarwanda Trezzo Mahoro ukina yitwa [Lucas] aba ari umwe mu nshuti z’uyu mukobwa ubusanzwe witwa Lara Jean.

Uyu Trezzo Mahoro aba ari umwe muri abo basore uyu mukobwa yigeze gukundana nabo ndetse akanamwandikira ariko Lucas (Trezzo Mahoro) aza ku mwanga kuko aba ari umutinganyi.

Trezzo Mahoro [Lucas] yamamaye mu zindi filime zitandukanye zirimo "The Magicians" yakinnyemo yitwa Ralphie, “The X-Files” yakinnyemo yitwa Crewman ya Fox , “iZombie” yakinnyemo yitwa Darius na Van Helsing yakinnyemo episode 24 yitwa Mohammed.

‘Trees of Peace’

Iyi ni filime y’Umunyamerika Alanna Brown ivuga kuri Jenoside yakorewe Abatutsi mu 1994. Yaguzwe n’Ikigo cya Netflix muri Kamena 2022.

Trees of Peace ivuga ku bagore bane barokotse Jenoside yakorewe Abatutsi mu 1994, igaragaza uko babashije kwihisha iminsi 81 mu mwobo bakawuvanamo icyizere, kwiyunga n’imbaraga zidasanzwe zo guhindura Isi.

Iyi filime igaragaramo Umunyarwandakazi Eliane Umuhire ukina yitwa Annick, umwanya afite muri iyi filime akina atwite ariko agerageza guhisha abagore batatu baba bahigwa muri icyo gihe.

Aba bagore bose bihisha mu mu mwobo uri munsi y’igikoni cy’urugo rwe bagategereza igihe abasirikare ba UN bazazira kubatabara.

Eliane Umuhire yakinnye mu zindi filime zakunzwe zirimo De Grace, aho akina yitwa Joy , La fille au coeur de cochon akina yitwa Colombe , Bazigaga akina yitwa Bazigaga ,Neptune Frost akina yitwa Memory ,Birds Are Singing in Kigali akinamo ari Claudine Mugambira na Things of the Aimless Wanderer.

‘Sex Education’

Iyi ni filime y’uruhererekane iri mu zaciye ibintu kuri Netflix, yiganjemo inyigisho zerekeranye no gutera akabariro.

Igaruka ku musore witwa Otis uba afite ubumenyi buke mu bijyanye n’urukundo n’imibonano mpuzabitsina ariko akaza kumenya byinshi kubera nyina uba ari inzobere muri byo.

Uyu musore akoresha ubwo bumenyi aba yaravomye mu rugo iwabo kugira ngo abanyeshuri bagenzi be bamwubahe.

Aza kwihuza n’undi mukobwa witwa Maeve bagahitamo gushinga ivuriro ryigisha ibijyanye n’imyanya y’ibanga ku kigo cyabo mu buryo bwo gukemura ibibazo by’abandi banyeshuri ku byerekeranye n’imibonano mpuzabitsina.

Mizero Ncuti Gatwa akina muri iyi filime yitwa Eric Effiong, aho aba ari umusore w’umutinganyi ukomoka mu muryango w’abihaye Imana bakomoka muri Afurika.

Niwe munyeshuri uba ashize amanga mu ishuri ryisumbuye rya Moordale High School, ndetse aba ari intyoza mu kwigisha ibyerekeye imibonano mpuzabitsina.

Uretse kuba ari umunyeshuri ushabutse, akunda kubyina mu ishuri ndetse akigisha bagenzi be uko abagore bo muri Afurika batega igitambaro n’ibindi bijyanye no kongera ubwiza.

Ncuti yakinnye mu zindi filime zirimo; Doctor Who izasohoka mu 2023, The Last Letter From You akinamo yitwa Nick , Stonemouth akina ari Dougie na A Midsummer Night’s Dream akinamo yitwa Demetrius.

‘La Terre et le Sang’

Iyi filimi yayobowe na Julien Leclercq, ivuga ku mugabo witwa Saïd ufite uruganda rukata ibiti agira ibibazo agaterwa n’abagabo biba bakanacuruza ibiyobyabwenge agahitamo kurwana nabo abarinda umukobwa we.

Lionël Ruzindana, umusore w’Umunyarwanda ari mu bikinnyi b’iyi filimi akina yitwa Süleyman, ndetse aba ari umwe mubajura biba Cocaine.

Uretse iyi ‘La Terre et le Sang’ Ruzindana yakinnye mu zindi filime zitandukanye zirimo; Red Soil akina ari Le vigile , na la vue akinamo ari K-Yen .

Ncuti Gatwa ni umwe mu Banyarwanda bamaze kubaka izina muri sinema, kuri ubu ategerejwe muri filime ya BBC ‘Doctor Who’ izasohoka mu 2023
Umuhire Eliane yegukanye ibihembo bitandukanye akesha sinema
Trezzo Mahoro Lucas na Lala Jean ukina muri filime ‘To All the Boys P S Still Love You’ ari umukinnyi w'imena
Lionël Ruzindana yakinnye muri filime yitwa Plein la vue yasohotse mu 2019

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .