00:00:00 IGIHE NETWORK KN KINYARWANDA EN ENGLISH FR FRANCAIS

Ncuti Gatwa yabuze amahirwe mu bihembo yari ahatanyemo bikomeye muri Amerika

Yanditswe na Uwiduhaye Theos
Kuya 14 March 2022 saa 10:45
Yasuwe :

Ncuti Gatwa, umukinnyi wa Filime w’Umunyarwanda uba mu Bwongereza, umaze kwamamara ku rwego mpuzamahanga muri sinema, yabuze amahirwe mu bihembo bya "Critics’ Choice Movie Awards" yari ari guhatanamo.

Ibi bihembo bimaze imyaka 26 bitangirwa muri Leta Zunze Ubumwe Za Amerika, byari bihatanyemo abakinnyi ba filime bakomeye ku Isi barimo nka Will Smith, Billy Porter n’abandi bafite amazina aremereye mu ruganda rwa sinema ku Isi. Ibyatanzwe kuri iki Cyumweru tariki 13 Werurwe 2022.

Ncuti Gatwa yari ahatanye mu cyiciro cy’umukinnyi utari uw’imena witwaye neza mu gukina filime yo bwoko bwo gusetsa. Aha yagiyemo kubera ‘Sex Education’ ica kuri Netflix yamumenyekanishije.

Muri iki cyiciro yari ahatanye na Brett Goldstein wakinnye muri Ted Lasso akaba ari nawe wedukanye igihembo, Harvey Guillén wo muri What We Do in the Shadows, Brandon Scott Jones wagaragaye muri Ghosts, Ray Romano wakinnye muri Made for Love na Bowen Yang wa Saturday Night Live.

Filime "The Power of the Dog" niyo yegukanye ibihembo bine ihiga izindi mu kwegukana byinshi. Yakurikiwe na "Belfast" yatwaye bitatu ndetse n’izindi nka “Succession”, "Mare of Easttown" na "Ted Lasso" zitwaye ibihembo bikomeye.

Ncuti ni umusore w’imyaka 29, yamamaye kubera filime y’uruhererekane ya Netflix yitwa Sex Education.

Gatwa yavukiye muri Nyarugenge mu Mujyi wa Kigali ku wa 15 Ukwakira 1992. Avuka kuri Dr. Tharcisse Gatwa, umunyamakuru akaba n’umwanditsi ukomeye ufite Impamyabumenyi y’Ikirenga mu by’Iyobokamana. Afite inkomoko i Karongi mu Burengerazuba bw’u Rwanda.

Gatwa Ncuti n’umuryango we bimukiye muri Écosse mu gihe cya Jenoside yakorewe Abatutsi mu 1994 ndetse ni naho uyu musore yakuriye. Yize ibijyanye no gukina filime muri Kaminuza Royal Conservatoire of Scotland, yahawe Impamyabumenyi y’Icyiciro cya Kabiri cya Kaminuza mu Ishami ryo gukina Filime mu 2013.

Kuri ubu we n’umuryango we na nyina batuye mu Mujyi wa Londres mu Bwongereza.

Yatangiye gukina muri filime zitandukanye mu 2014 mu yitwa Bob Servant, mu 2015 akina mu yitwa Stonemouth, mu 2019 muri Sex Education yamwubakiye izina bikomeye na Horrible Histories: The Movie – Rotten Romans.

Nyuma yo gukina muri Sex Education yahatanye mu bihembo bitandukanye birimo MTV TV & Movie Awards itangirwa muri Leta Zunze Ubumwe za Amerika mu byiciro bibiri; icy’umukinnyi wa filime uri kuzamuka ndetse n’icy’uwasomanye neza, hombi ntiyabashije kwegukana igihembo na kimwe.

Mu 2019 kandi nabwo yahatanye mu bihembo birimo BAFTA Scotland nk’umukinnyi mwiza wa filime y’uruhererekane icishwa kuri televiziyo, ariko ntiyabasha kwegukana igihembo.

Mu 2019 ikinyamakuru gikomeye cya Elle cyashyize Ncuti Gatwa ku rutonde rw’abanyempano 50 bari kugaragaza impinduka kurusha abandi [50 Game-changers].

Mu 2019 kandi yashyizwe n’Ikinyamakuru The New York Times ku rutonde rw’abantu 10 icyo kinyamakuru kibona bitwaye neza mu myuga itandukanye bakora.

Tariki 13 Werurwe 2020 yegukanye igihembo cy’umukinnyi wa filime uri kuzamuka neza mu bihembo bya The Broadcasting Press Guild [BPG], bitegurwa n’ishyirahamwe ry’abanyamakuru bandika, abo ku mateleviziyo ndetse n’abo kuri Radio.

Reba urutonde rw’abegukanye ibi bihembo Gatwa yari ahatanyemo:

Ncuti Gatwa ari mu banyarwanda bake bamaze kubaka izina ku ruhando mpuzamahanga muri sinema
Ncuti Gatwa yabuze amahirwe mu bihembo yari ahatanyemo bikomeye muri Amerika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .