Serge Iyamuremye na Luc Buntu batumiwe mu gitaramo cya Potters Hand Worship Team

Yanditswe na Ishimwe Israel
Kuya 11 Ukwakira 2017 saa 08:30
Yasuwe :
0 0

Itsinda ry’abaririmbyi rya Potters Hand Worship ribarizwa mu Itorero Potters Hand Church rikorera mu Karere ka Kicukiro, ryateguye igitaramo rizamukiramo album y’indirimbo 14, ryatumiyemo abanyempano b’i Kigali barimo Luc Buntu na Serge Iyamuremye.

Potters Hand Worship Team iri mu myiteguro ya nyuma yo gushyira ahagaragara album yabo ya mbere yise ‘Ishimwe ni Iryawe’ imaze imyaka ibiri itegura kuko yatangiye kuyitekerezaho kuva mu 2015.

Iki gitaramo Potters Hand Worship Team izahuriramo na Serge Iyamuremye wamenyekanye muri ‘Uwiteka Arampagije’, ‘Amashimwe’, n’izindi na Luc Buntu uzwi muri ‘Ntutinye’ na ‘Mfite ubuhamya’ kizabera kuri New Life Bible Church ku Kicukiro ku wa 29 Ukwakira 2017; biteganyijwe ko kizanafatirwamo amashusho mu buryo bw’ako kanya ‘Live Recording’.

Umuyobozi wa Potters Hand Worship Team, Emmanuel Rwagasana, yatangarije IGIHE ko iki gitaramo kibumbatiye ishimwe rikomeye ku Mana rishingiye ku byo banyuzemo mu rugendo rw’ivugabutumwa.

Yagize ati “Iki gitaramo cyo kumurika album byadusabye igihe kinini cyo kugitegura. Twashyize imbaraga mu bacuranzi n’abaririmbyi bitoza neza mu bijyanye no kunoza amajwi ndetse twiyegereje n’abandi bazadufasha muri iki gikorwa. Indirimbo zacu nyinshi zigaragara kuri iyi album zishingiye ku kuramya no guhimbaza Imana tuvuga gukomera kwayo.”

Yakomeje agira ati “Izina twahaye album ‘Ishimwe ni iryawe’ rikubiyemo ishimwe dufite, kuko ibyo twagezeho byari nk’inzozi kandi n’ibigiye kuba kuri twe biraduhagije. Ni album ya mbere tugiye gusohora kandi twizeye ko bizagenda neza.”

Igitaramo kizatangira saa kumi n’imwe za nimugoroba kucyinjiramo ni ibihumbi bitanu (5,000 Frw), ugahabwa na CD y’ubuntu ndetse n’ibihumbi bibiri (2,000 Frw) ku bandi bazacyitabira.

Potters Hand Worship Team ni umutwe w’abaririmbyi bagera kuri 40 bamaze imyaka isaga itanu mu ivugabutumwa rinyuze mu ndirimbo. Iri tsinda ryarezwe n’Itorero Potters Hand, ryavuye mu iyerekwa ryagizwe n’Umushumba mukuru waryo James Muyango mu 2012 ryo guhembura ubuzima bwashenjaguritse binyuze mu ivugabutumwa.

Potters Hand Worship Team igizwe n'abaririmbyi bagera kuri 40
Potters Hand imaze imyaka itanu ikora ivugabutumwa rinyuze mu ndirimbo
Imyiteguro yo kumurika album abacuranzi bayigeze kure
Serge Iyamuremye na Luc Buntu batumiwe mu gitaramo cya Potters Hand Worship Team

Reba hano indirimbo ‘Umwami Wankunze’ ya Potters Hand Worship


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza