Bazivamo yashimangiye ko politiki ya FPR ari urugero rw’ukwibohora nyako

Yanditswe na Cyprien Niyomwungeri
Kuya 12 Ukuboza 2017 saa 02:30
Yasuwe :
2 0

Vice Chairman w’Umuryango FPR-Inkotanyi, Bazivamo Christophe, yashimangiye ko politiki yawo ari urugero rwiza rw’ukwibohora nyako no kugera ku mpinduka mu iterambere rirambye zikenewe muri Afurika yose.

Bazivamo yatanze ubwo butumwa kuri uyu wa Kabiri mu nama mpuzamahanga ku kwibohora yateguwe na FPR-Inkotanyi mu rwego rwo kwizihiza isabukuru y’imyaka 30.

Iyi nama iraganira ku kwibohora kuganisha ku iterambere, guteza imbere no guha agaciro Afurika. Yitabiriwe n’abashakashatsi baturutse hirya no hino muri Afurika ndetse n’ahandi ku Isi.

Mu ijambo rye, Bazivamo yagarutse ku rugendo rwa FPR-Inkotanyi ruhera ku rugamba rwo gukura igihugu ku ngoyi y’ubutegetsi bw’igitugu, ivangura, ubwicanyi ndetse no kumenesha abaturage bacyo bakaba impunzi mu mahanga.

Yasobanuye ko FPR-Inkotanyi imaze gufata ubutegetsi itigeze iteshuka ku ntego yo guharanira ubumwe bw’Abanyarwanda, iterambere ridaheza, kubasubiza agaciro ndetse n’Abanyafurika muri rusange.

Iyi nama yanitabiriwe na Madamu Jeannette Kagame; Uwahoze ari Perezida wa Tanzania, Benjamin Mkapa na Madamu we; Jendayi Frazer wahoze ari Umunyamabanga wa Leta Zunze Ubumwe za Amerika wungirije uw’Ububanyi n’amahanga ushinzwe Afurika, abahagarariye ishyaka riri ku butegetsi muri Ethiopia, mu Bushinwa n’abandi.

Bazivamo yasobanuye ukwibohora nyako, avuga ko ubwo FPR-Inkotanyi yari irangije urugamba rwo kubohora igihugu no guhagarika Jenoside yakorewe Abatutsi, itaruhutse ahubwo yakomeje urugamba rwo kugarura amahoro mu gihugu, gucyura impunzi no kongera guteza imbere igihugu harimo kubaka ibikorwaremezo, ubuyobozi, gukemura ibibazo byatewe na Jenoside; gucira imanza abayikoze; guhangana n’ihungabana no guharanira ubumwe bw’abaturage.

Yakomeje avuga ko uru ari urugero rwiza rw’ukwibohora nyako gukwiye kuranga Afurika kugira ngo igere ku iterambere rirambye.

Yagize ati “Nshingiye ku bunararibonye bwa FPR n’Abanyarwanda muri rusange, ndasaba Abanyafurika kwibohora ubwabo kandi bagafata ingamba zishingiye ku gusaranganya ubutegetsi, guha umwanya abaturage mu bibakorerwa, kubungabunga amahoro n’iterambere rirambye ry’uyu mugabane.”

Isabukuru y’imyaka 30 ifatwa nk’umwanya wo gutekereza uko FPR yakomeza guteza imbere imibereho myiza n’ubukungu bw’igihugu ari ko kwibohora nyako kandi igatanga umusanzu ku bandi Banyafurika wo kumva ko kwigenga nyako ari ukwigira mu bukungu n’iterambere.

Uwahoze ari Perezida wa Tanzania, Benjamin Mkapa, yagarutse ku kwibohora nyako kwa Afurika, avuga ko gukwiye gushingira ku kwishyira hamwe kw’ibihugu, guharanira iterambere ry’igihugu kandi rigera kuri bose.

Yavuze ko FPR-Inkotanyi na CCM yayoboye imyaka 10 ari Perezida wa Tanzania, bifite aho bihuriye mu kwibohora kuko rimwe ryakuye igihugu ku ngoyi y’abakoloni b’Abongereza, irindi rikagikura ku ngoyi y’ubutegetsi bubi bw’ivangura, ubwicanyi n’ibindi bikorwa bidahesha agaciro umuntu.

Mkapa yavuze ko u Rwanda ari igihugu cy’icyitegererezo cyerekanye ko nyuma y’amahano nka Jenoside igihugu gishobora kongera kubaho kandi kigatera imbere.

Ati “U Rwanda ubu ni igihugu cy’icyitegererezo mu kugaragaza uko Jenoside ishobora guhagarikwa hagakurikiraho ubuzima bwiza. Kugera ku iterambere ni umusaruro w’ubuyobozi bwiza, ibyagezweho by’intangarugero tubikesha ubuyobozi bwiza bwa Perezida Kagame.”

Yakomeje avuga ko u Rwanda rwakoze byinshi mu kugaragaza impinduka zikenewe mu iterambere yaba gushyigikira abagore n’urubyiruko, uburezi kuri bose, ubuzima, kurwanya inzara, indwara n’ibindi. Hari kandi gahunda zo kwishakamo ibisubizo nka Gacaca zatanze umusanzu udasanzwe mu bumwe n’ubwiyunge.

Bazivamo Christophe yashimangiye ko politiki ya FPR Inkotanyi ari urugero rwiza rw’ukwibohora nyako
Abarenga 1000 bitabiriye inama Mpuzamahanga ku kwibohora yateguwe na FPR-Inkotanyi
Benjamin Mkapa wahoze ari Perezida wa Tanzania yavuze ko kwibohora nyako kwa Afurika gukwiye gushingira ku kwishyira hamwe kw’ibihugu
Minisitiri w'Umuco na Siporo, Uwacu Julienne, aganira n'umwe mu bitabiriye inama
Perezida wa Komisiyo y'Igihugu y'Ubumwe n'Ubwiyunge, Musenyeri John Rucyahana aganira na Kanzayire Bernadette wigeze kuba Umuvunyi wungirije ushinzwe gukumira no kurwanya akarengane
Minisitiri w’Ubuhinzi n‘Ubworozi, Mukeshimana Geraldine
Umuyobozi Mukuru w'Urugaga rw'Abikorera mu Rwanda (PSF), Gasamagera Benjamin
Senateri Tito Rutaremara asoma ikinyamakuru
Minisitiri w’Ibikorwaremezo, Musoni James
Minisitiri w'Ubuzima, Dr Gashumba Diane aganira n'uw'Ubutabera akaba n'Intumwa Nkuru ya Leta, Busingye Johnston
Senateri Mukasine Marie Claire n'umwe mu bahagarariye ishyaka riri ku butegetsi mu Bushinwa witabiriye inama
Umunyamabanga Mukuru wa FPR Inkotanyi, Ngarambe François asuhuzanya na Perezida w'Ishyaka Riharanira Demokarasi ihuza Abanyarwanda (PDC), Mukabaranga Agnès
Minisitiri w’Abakozi ba Leta n’Umurimo, Rwanyindo Kayirangwa Fanfan
Minisitiri w’Ubutegetsi bw’Igihugu, Francis Kaboneka
Minisitiri w’Ububanyi n’Amahanga, Ubutwererane n’Umuryango w’Ibihugu bya Afurika y‘Iburasirazuba, Mushikiwabo Louise aganira n'uw’Ubutegetsi bw’Igihugu, Francis Kaboneka (ibumoso) n'Umunyamabanga Mukuru wa FPR Inkotanyi, Ngarambe François
Iyi nama yiga ku kwibohora yateguwe na FPR-Inkotanyi mu rwego rwo kwizihiza isabukuru y’imyaka 30

Amafoto: Niyonzima Moses


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza