Perezida Kagame yageze muri Gabon mu ruzinduko rw’iminsi ibiri

Yanditswe na Ishimwe Israel
Kuya 10 Kamena 2019 saa 03:35
Yasuwe :
0 0

Perezida Paul Kagame kuri uyu wa 10 Kamena 2019, yageze muri Gabon aho agiye mu ruzinduko rw’akazi rw’iminsi ibiri rugamije kunoza umubano hagati y’ibihugu byombi.

Ibiro by’Umukuru w’Igihugu bibinyujije kuri Twitter, byatangaje ko Perezida Kagame yamaze kugera muri Gabon ndetse aragirana ibiganiro na mugenzi we Ali Bongo Ondimba mu biro bye.

Mu itangazo Ibiro bya Perezidansi ya Gabon byageneye itangazamakuru byavuze ko abakuru b’ibihugu byombi baganira ku mubano uri hagati y’ibihugu bayoboye n’icyerekezo ukwiye kugira mu gihe kizaza.

Mu biganiro byabo hitezwe ko bavuga ku bijyanye n’ubukungu bw’umugabane wa Afurika binyuze mu turere bayoboye.

Perezida Ali Bongo ayoboye Umuryango w’Ubukungu bw’Ibihugu bya Afurika yo Hagati, CEEAC mu gihe Perezida Kagame afite inshingano zo kuyobora Umuryango wa Afurika y’Iburasirazuba, EAC, yahawe muri Gashyantare 2019.

Gabon iri mu bihugu 44 byashyize umukono ku masezerano ashyiraho isoko rusange ry’ibihugu bihurira mu Muryango wa Afurika Yunze Ubumwe, AU, azwi nka AfCFTA.

Aya masezerano yatangirijwe i Kigali muri Werurwe 2018, yamaze kwemezwa burundu; biteganyijwe ko azatangira gushyirwa mu bikorwa muri Nyakanga 2019, ubwo hazaba hateranye Inteko rusange y’Abakuru b’Ibihugu bya AU.

Perezida Kagame abaye umukuru w’igihugu wa Gatandatu watumiwe muri Gabon nyuma y’amasaha 48, iki gihugu kivuye mu muhango wo kwibuka ku nshuro ya 10, Omar Bongo Ondimba, wabaye ku wa 8 Kamena 2019.

Perezida wa Gabon Ali Bongo Ondimba aheruka mu Rwanda tariki 13 Gashyantare 2018 mu ruzinduko rw’akazi rw’umunsi umwe.

Abakuru b’ibihugu byombi bagiranye ibiganiro muri Village Urugwiro, byibanda ku buhahirane hagati y’ibihugu n’umutekano mu karere. Banaganiriye ku mavugurura y’Umuryango wa CEEAC, ibihugu byombi bihuriyemo.

Gabon ikungahaye ku bucukuzi bwa peteroli, ubucuruzi bw’imbaho n’amabuye y’agaciro.

U Rwanda na Gabon basinyanye amasezerano y’imikoranire mu 1976, aza kuvugururwa mu 2010.Bifitanye ubuhahirane buhagaze neza dore ko indege ya RwandAir ikorera ingendo mu Mujyi wa Libreville.

Muri Kamena 2016, ibihugu byombi byakuyeho amafaranga yacibwaga umuntu ukoresheje umurongo wa telefoni mu guhamagara hagati yabyo.

Biteganyijwe ko abakuru b'ibihugu byombi baganira ku mubano uri hagati y'u Rwanda na Gabon n’icyerekezo ukwiye kugira mu gihe kizaza.
Perezida wa Gabon Ali Bongo Ondimba aheruka mu Rwanda tariki 13 Gashyantare 2018 mu ruzinduko rw’akazi rw’umunsi umwe.
Perezida Kagame yakiranye urugwiro mugenzi we wa Gabon Ali Bongo Ondimba mu 2018

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza