Kigali Marriott Hotel yishimiye kwegukana ibihembo bibiri bya World Travel Awards

Kigali Marriott Hotel, imwe muri hoteli zikomeye mu Rwanda yishimiye ko yegukanye ibihembo bya ‘World Travel Awards, bishimangira ko ihiga izindi mu gihugu.”

Ni ibihembo byatanzwe kuwa Mbere, ku ya 10 Ukwakira 2017, byagenewe ibigo bitanga serivisi zijyanye n’ubukerarugendo byahize ibindi ku mugabane wa Afurika.

Kigali Marriott yahembwe nka hoteli ikomeye iri mu gace kagenewe ubucuruzi, n’iya mbere ikomeye muri hoteli zikorera mu mijyi y’u Rwanda. Ibyo bihembo byatanzwe hagendewe ku matora yakozwe n’impuguke mu by’ubukerarugendo zo hirya no hino ku Isi.

Ni nyuma y’umwaka umwe iyi hoteli itangiye gukorera mu Rwanda kuko yafunguwe ku ya 6 Nyakanga 2016. Umuyobozi wa Kigali Marriott Hotel, Rex Nijhof yavuze ko igihembo bahawe byerakana umuhate bashyira mu kazi bakora.

Yakomeje agira ati “Tuzakomeza guhindura imitekerereze y’abakerarugendo batugana tubafata neza tukabaha aho gucumbika hateye neza, ari nako dukomeza gushaka ibintu bitandukanye bibashimisha.”

Kigali Marriott Hotel iherereye hafi y’Ibiro by’Umujyi wa Kigali. Ifite ibyumba 254 birimo 25 by’abiyubashye, n’ahanti ha metero kare 11 000 ho gukorera ibikorwa bitandukanye. Ifite ubwogero bw’agatangaza n’amaresitora atandukanye arimo Soko, Cucina n’akabari kitwa Iriba.


Kwamamaza