Marriott International igiye kwagura ibikorwa byayo muri Afurika

Yanditswe na IGIHE
Kuya 5 Ukwakira 2018 saa 07:40
Yasuwe :
0 0

Marriott International ibarizwamo Kigali Marriott Hotel, yatangaje gahunda ikomeye yo kwagura ibikorwa byayo ikabigeza hirya no hino muri Afurika.

Ibi byatangajwe ku wa Mbere, mu Nama ku ishoramari mu birebana n’amahoteli muri Afurika (Hotel Investment Forum, AHIF), yaberaga i Nairobi muri Kenya.

Gahunda yo kwagura ibikorwa bya Marriott International isanzwe izwiho serivisi ziri ku rwego rwo hejuru yabimburiwe n’amasezerano na hoteli eshanu, zaje ziyongere ku zindi ifite muri Ghana, Kenya, Maroc, Afurika y’Epfo, ndetse n’isoko rishya muri Mozambique.

Aya masezerano yabimburiye urugendo rugana ku ntego Marriott International yiyemeje rwo kwagura gahunda zayo kugera kuri 50%, ikagira hotel 200 zifite ibyumbi ibihumbi 38 bitarenze umwaka wa 2023. Ibi kandi bizagira uruhare mu ihangwa ry’imirimo mishya ibihumbi 12.

Umuyobozi Mukuru wa Marriott International muri Afurika no mu Burasirazuba bwo hagati, Alex Kyriakidis, yavuze ko kwegukana hotel zirimo Protea Hotels na Starwood Hotels and Resorts Worldwide byatumye ibikorwa birushaho kwaguka n’abafite amazina akomeye batangiye kugaragaza ko bifuza gukorana nabo.

Ati “Ubukungu bwa Afurika bwakomeje kuzamuka cyane, ibintu byatijwe umurindi no kwiyongera kw’abaguzi imbere mu gihugu, imikorere myiza y’ubucuruzi buciriritse na politiki nziza zigenda ziyongera. Umugabane ariko uracyari hasi ku birebana na hotel nziza, ibintu biduha amahirwe akomeye yo guteza imbere izina ryacu.”

Kugeza ubu Marriott International ibarizwa mu bihugu 21 bya Afurika birimo; Algeria, Djibouti, Misiri, Ethiopia, Gabon, Ghana, Guinea, Kenya, Malawi, Mali, Mauritius, Maroc, Namibia, Nigeria, Rwanda, Seychelles, Afurika yEpfo, Tanzania, Tunisia, Uganda na Zambia.

Muri gahunda ifite harimo gutangiza ibikorwa byayo muri Benin, Botswana, Côte d’Ivoire, Mauritania, Mozambique na Sénégal.

Uretse kubaka hotel nshya, Kyriakidis avuga ko banagenda bakorana n’izari zisanzwe ariko bakazivugurira, aho yatanze urugero rw’izirimo; Marriott Marrakech Hotel yo muri Maroc izaba yamaze kuvugururwa bitarenze umwaka 2020 ikazaba ifite ibyumba 360.

Mu zindi yegukanye harimo Four Points by Sheraton, Protea Hotels by Marriott na AC Hotels by Marriott.

Protea Hotels by Marriott ibarizwamo Protea Hotel by Marriott Accra Kotoka Airport muri Ghana izaba ifite ibyumba bigera kuri 200, Protea Hotel by Marriott Nairobi, biteganyijwe ko izuzura mu 2021 ikazaba ifite ibyumba 250 na Protea Hotel by Marriott Pretoria Loftus Park muri Afurika y’Epfo izafungura bitarenze uyu mwaka.

Ni mu gihe Four Points by Sheraton Nampula muri Mozambique izaba ari iya mbere muri iki gihugu, biteganyijwe ko izafungura imiryango mu 2023 ikazaba igizwe n’ibice bitandukanye birimo ibyumba 185 bya hotel, iguriro ryagutse, ibyumba n’inzu zo guturamo igihe kirekire, ivuriro, ibiro n’ibindi.

Bitarenze uyu mwaka kandi Marriott International izatangiza AC by Marriott ikazahera kuri AC by Marriott Cape Town, Waterfront muri Afurika y’Epfo izaba ifite ibyumba 188.

Izanafungura kandi AC by Marriott Umhlanga Ridge, izaba iri mu ntara ya Kwazulu Natal izaba igizwe n’ibyumba 205, izafungura imiryango mu 2023.

Mu bihe bya vuba kandi iki kigo kirateganya no gutangiza serivisi z’andi mazina yacyo azwi nka Aloft Hotels, Element, Courtyard by Marriott na Residence Inn by Marriott.

Marriott International kandi ifite gahunda yo kubaka inyubako nini zo guturamo zigezweho zimeze nk’izisanzwe zizwi nka The Ritz-Carlton, St. Regis and W Hotels.

Marriott International ibarizwamo Kigali Marriott Hotel, yatangaje gahunda ikomeye yo kwagura ibikorwa byayo ikabigeza hirya no hino muri Afurika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza