00:00:00 IGIHE NETWORK KN KINYARWANDA EN ENGLISH FR FRANCAIS

U Buyapani bwatunguye u Budage mu Gikombe cy’Isi cya 2022

Yanditswe na Byiringiro Osée Elvis
Kuya 23 Ugushyingo 2022 saa 07:51
Yasuwe :

Ikipe y’igihugu y’u Buyapani yatunguye u Budage ibutsinda ibitego 2-1, mu mukino wa mbere mu itsinda E, wabereye kuri Khalifa International Stadium kuri uyu wa Gatatu tariki 23 Ugushyingo 2022.

Uyu mukino watangiye u Budage busatira bikomeye nk’ikipe yahabwaga amahirwe yo gutsinda uyu mukino. Ariko uko iminota yagendaga niko u Buyapani bwinjiraga mu mukino.

Ku munota wa munani Joshua Kimmich yatakaje umupira hagati mu kibuga u Buyapani buzamuka bwiruka cyane Daizen Maeda afungura amazamu ariko umusifuzi w’igitambaro avuga ko Maeda yaraririye.

U Budage bwahise butangira gusatira bikomeye ariko Gundogan ateye ishoti rikomeye umuzamu Shūichi Gonda awukuramo. Mu minota 25 u Budage bwari butarigaragaza nk’ikipe ikomeye.

Ku munota 28 u Budage bwabonye amahirwe yo gufungura amazamu ariko u Buyapani bwose buryama mu izamu umupira uvamo,basobyamo Maya Yoshida arongera awukuramo.

David Raum yakorewe ikosa n’umuzamu Shūichi Gonda maze umusifuzi atanga penaliti,yahise yinjizwa neza cyane na Ilkay Gundogan ku munota wa 33 ateye umupira mu nguni imwe umuzamu ajya mu yindi.

U Budage bwaje kuyobora umukino mu minota 40, butangira kwiharira umupira bigaragara ari nako bwahushaga ibitego byinshi. Mu minota ine y’inyongera Jamal Musiala yazamukanye umupira neza awucomekera Muller azamura umupira imbere y’izamu ariko Kai Harvertz atsinze igitego cya kabiri umusifuzi avuga ko yaraririye.

Igice cya mbere cyarangiye u Budage butsinze u Buyapani igitego 1-0.

U Budage bwatangiye igice cya kabiri busatira cyane nk’aho ku munota wa 52 Jamal Musiala yacenze abinyuma bose b’u Buyapani ariko ateye ishoti umupira ujya hejuru y’izamu.

Ilkay Gundogan yongeye guhusha igitego ku mupira mwiza yahawe na Musiala ariko ateye umupira ufata igiti cy’izamu. Ilkay Gundogan yasimbuwe na Leon Goretzka,Thomas Muller asimburwa na Hofman.

Ku munota wa 70 umuzamu Shūichi Gonda yagumishije ikipe ye mu mukino ubwo yakuragamo amashoti ane y’abakinnyi b’u Budage.Manuel Neuer nawe yahise arokora ikipe ye ubwo yakuragamo umupira wa Takuma Asano.

U Buyapani bwari bwakambitse mu izamu rya Neuer, Takumi Minamino yazamukanye umupira neza cyane atera ishoti rikomeye Neuer awukuramo ariko usanga Ritsu Doan ahagaze wenyine ahita atsinda igitego cya mbere cy’u Buyapani ku munota wa 75.

U Buyapani bwakomeje gusatira bikomeye maze Takahiro Tamiyasu atera umupira muremure usanga Takuma Asano azamuka neza areba uko umuzamu Neuer ahagaze atsinda igitego cya kabiri ku munota wa 83.

Mu minota irindwi y’inyongera Leon Goretzka yateye ishoti rikomeye ariko rica hanze gato y’izamu,imitima y’abakunzi b’u Budage ikomeza kwiheba.

Umukino warangiye u Buyapani butsinze u Budage ibitego 2-1.

U Budage bwaririmbye indirimbo yubahiriza igihugu,abakinnyi bapfutse umunwa mu rwego rwo kwigaragambya kubera ko bangiwe kwambara imyambaro igaragaza gushyigikira ibikorwa by’abaryamana bahuje ibitsina.

Umukino wa kabiri muri iri tsinda urahuza Espagne na Costa Rica saa 18:00


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .