00:00:00 IGIHE NETWORK KN KINYARWANDA EN ENGLISH FR FRANCAIS

Bamporiki ntakwiye kuba agifungiwe mu rugo

Yanditswe na Musangwa Arthur
Kuya 11 May 2022 saa 01:12
Yasuwe :

Maze iminsi nsoma ibitekerezo by’abantu batandukanye bagaruka ku ifungwa ry’uwari Umunyamabanga wa Leta muri Minisiteri y’Urubyiruko n’Umuco, Edouard Bamporiki.

Nifashishije “wari”, kuko biheruka gutangazwa ko yahagaritswe ku mirimo, kubera iperereza arimo gukorwaho.

Ubusanzwe aho umugabo aguye, urenzaho utwatsi. Ni umugani benshi twamenye, ukomoka kuri Cyilima Rujugira wari Umwami w’u Rwanda, mu gitero yagabye mu Bugesera bwa Nsoro ahasaga mu 1700.

Narwanye n’umutima ngo numve niba nahamanya na wo ko gutereraho utwatsi bihwanye no kureka uwemera icyaha akaguma iwe, ariko ibitekerezo bikomeza kumbana byinshi.

Mu “Irangashingiro” ry’Itegeko Nshinga twitoreye mu 2003 tukarivugurura mu 2015, tuvugamo ngo “Twebwe, Abanyarwanda… Twiyemeje kubaka Leta igendera ku mategeko, ishingiye ku iyubahirizwa ry’uburenganzira bwa muntu, ku bwisanzure no ku ihame ry’uko Abanyarwanda bose bareshya imbere y’amategeko n’iry’uburinganire hagati y’abagore n’abagabo;”

Mu minsi ishize nibwo byatangiye kunugwanugwa ko Bamporiki yatawe muri yombi, bikomeza kuvugirwa mu matamatama, ariko hashize amasaha make Urwego rw’Ubugenzacyaha (RIB) ruca impaka.

Rwemeje ko “Bamporiki Edouard wari Umunyamabanga wa Leta muri Minisiteri y’Urubyiruko n’Umuco akurikiranyweho icyaha cya ruswa n’ibyaha bifitanye isano nayo”, ndetse ko iperereza ku byaha akurikiranyweho rikomeje mu gihe afungiwe iwe mu rugo.

Gukorwaho iperereza ubusanzwe ni ikintu kimwe, ariko no kuba umuntu yarakoze icyaha ni ikindi.

Birasanzwe ko ushobora gukekwaho icyaha runaka ukaba wanafungwa, wagera imbere y’umucamanza ukagihakana ugatsemba, ukaba umwere, cyane ko mu rukiko hatsinda ibimenyetso.

Bamporiki yaje kwiyemerera ko ibyo akekwaho yabikoze, atakambira Perezida Paul Kagame. Nta wamenya niba ari byo azasubiramo nagera imbere y’umucamanza, kuko icyemerwa, cyandikwa, ni ikivugiwe mu rukiko.

Ati “Bavandimwe, Nshuti zanjye, namwe abankurikira kuri uru rubuga, nakoze icyaha cyo kwakira indonke. Nkaba ntafite irindi jambo navuga usibye kubasaba mwese imbabazi. Ndatakambye.”

Icyo gihe benshi baguye mu kantu, nubwo abandi bahise batangira kuvuga ko “nta we Inkotanyi zifata zitakenguje.”

Wifashishije imvugo za Bamporiki atakamba cyangwa amagambo yigeze gukoresha ubwe, yari abizi neza ko ibyo yakoze ari icyaha ndetse gihanirwa.

Ubwe yigeze kuvuga ati “Nitudafata ruswa nk’urundi rugamba turwana mu buryo runaka, dushobora kuzatsindwa. Ariko dukomeze kuzirikana ko Abanyarwanda badatsindwa, kandi n’imishinga yapfuye ari iyo bene yo banze gupfira.”

Urugendo Bamporiki yanyuzemo nk’uko yabyivugiye, akava ku kuba umukozi wo mu rugo, uwacukuraga imisarani, umukinnyi w’ikinamico, umudepite, Perezida wa Komisiyo y’Itorero n’umwe mu bagize Guverinoma, ni urugero rwiza rwakwigisha abakibyiruka ko ukoze cyane ntacyo utageraho.

Abemera Imana nabo mu mvugo yabo bituma bahamya neza ko “nta kure habaho Imana itakura umuntu.”

Nari mvuze ku rugero rumwe yaha abakibyiruka, ariko hari n’urundi akwiye gutanga. Aho wagera hose, ukwiye kugengwa n’amategeko.

Ngarutse kuri ya mategeko twitoreye, harimo ko Urwego rw’Umuvunyi rugomba gutangaza abahamwe n’ibyaha bya ruswa mu buryo bwa burundu, hagamijwe kurushaho kuyikumira.

Urutonde ruheruka rw’amezi ya Mutarama-Werurwe 2021 rutangizwa n’uwitwa Uwimana Innocent wari umusekirite w’abamotari, wakatiwe gufungwa imyaka itanu n’ukwezi kumwe, nyuma yo guhamwa no kwakira ruswa ya 15.000 Frw.

Ni uwo uza imbere ku rutonde, ariko hariho n’abandi bigaragara ko bafashwe barimo gutanga ruswa ya 3000 Frw.

Nkeka ko wenda Bamporiki yakiriye indonke yo ku rwego rwa Minisitiri.

Ku rundi ruhande, aba bose uko bakekwaga, bambikwaga amapingu bagashyirwa muri kasho, urukiko rukabakatira imyaka itanu.

Itegeko N°54/2018 ryo kuwa 13/08/2018 ryerekeye kurwanya ruswa, risobanura ko indonke ari ikintu cyose gisabwe, gitanzwe, cyakiriwe cyangwa gisezeranyijwe kugira ngo, mu buryo bunyuranyije n’amategeko, hakorwe cyangwa hatagira igikorwa.

Ingingo ya kane iteganya ko umuntu wese usaba, utanga cyangwa wakira, mu buryo ubwo ari bwo bwose, indonke iyo ari yo yose, kuri we cyangwa ku wundi muntu cyangwa wemera amasezerano yabyo kugira ngo akore cyangwa adakora ikiri mu nshingano ze yifashishije imirimo ye kugira ngo gikorwe cyangwa kidakorwa aba, akoze icyaha.

Iyo abihamijwe n’urukiko, ahanishwa igifungo kirenze imyaka itanu ariko kitarenze imyaka irindwi, n’ihazabu y’amafaranga y’u Rwanda yikubye inshuro kuva kuri eshatu kugeza kuri eshanu z’agaciro k’indonke yatse cyangwa yakiriye.

Iryo tegeko rinateganya impamvu nkomezacyaha ku cyaha cya ruswa cyakozwe n’umuntu uri mu rwego rw’ubuyobozi, mu nzego za Leta, iz’abikorera, sosiyeti sivili n’imiryango mpuzamahanga ikorera mu Rwanda.

Icyo gihe “ahanishwa igihano kinini giteganyijwe kuri icyo cyaha yakoze.”

Itegeko ryerekeye imiburanishirize y’imanza z’inshinjabyaha Nº027/2019 ryo ku wa 19/09/2019, Ingingo ya 67, rivuga ko "mu gihe cy’iperereza n’iyo haba hari impamvu zikomeye zo gukeka ko umuntu yakoze icyaha cyangwa ko yagerageje kugikora, Umugenzacyaha cyangwa Umushinjacyaha bashobora kutamufunga bakamutegeka ibyo agomba kubahiriza".

Ibyo bishobora kubamo kumutegeka kutava iwe mu rugo, kutarenga ahantu hagenwe atabiherewe uruhushya, kutajya aha n’aha cyangwa kutaba ahantu ku gihe iki n’iki; kugenzurwa hifashishijwe ikoranabuhanga no gushyikiriza ibyangombwa bye urwego rwagenwe.

Nasomye ibitekerezo by’abantu benshi bagaragaza ko iyo aza kuba umutu usanzwe, Bamporiki aba ari muri gereza.

Nahuye na Bamporiki mu buryo bwihariye mu 2019, nashimye uburyo ari umugabo utega amatwi, akaganira yeruye ku buryo iyo umureba mu maso utabonamo uburyarya. Gusa nta we ureba mu mutima wundi.

Nakunze intambwe zose yateye mu buzima ahereye hasi, nubwo mfite impungenge z’ahazaza he muri politiki bijyanye n’ibyaha yakoze kuko yabyiyemereye.

Ariko nanone, mfite impungenge z’isomo uburyo ikirego cye kizakurikiranwamo rizasiga ku bakibyiruka bakwiye gutinya ikibi.

Hari bamwe batangiye kuvuga ku mbuga nkoranyambaga ko uburyo Bamporiki atarafungwa bishobora kurangira atagejejwe imbere y’inkiko, ibyo byose bikaba byatiza umurindi ya nenge y’ibifi binini ku butabera.

Ese amategeko yaba akurikizwa bitewe n’umuntu uwo uri we, twaba twese tureshya imbere y’amategeko?

Reka ndeke amarangamutima, amategeko akore akazi kayo.

Bamporiki Edouard ari gukorwaho iperereza ku byaha bifitanye isano na ruswa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .