Mu itongo kwa Richard Kandt! Igicumbi cy’ubushakashatsi, icumbi ry’abamisiyoneri ryasinyiwemo amasezerano akomeye (Amafoto)

Yanditswe na Evariste Nsengimana
Kuya 13 Kanama 2019 saa 08:41
Yasuwe :
0 0

Dr Richard Kandt, umuvumbuzi uzwi cyane mu mateka y’u Rwanda no mu Karere ka Afurika y’Uburasirazuba yageze mu Rwanda mu 1898 aje mu bikorwa by’ubushakashatsi birimo gushakisha isoko y’uruzi rwa Nile.

Nyuma yo kuzenguruka u Rwanda umwaka wose, yaje kwiyemeza kubaka inzu y’ibyatsi yo kubamo i Shangi, aho yakorega ubushakashatsi, akayakiriramo n’abashyitsi barimo umumisiyoneri wa mbere wanahasomeye misa yabaye iya mbere y’abazungu.

Uru rugo rwasinyiwemo n’amasezerano akomeye aho Ababiligi bifuzaga ko umupaka wa Congo unyuzwa mu ishyamba rya Nyungwe, icyari Cyangugu cyose kibaka umutungo wa RDC.

Uru rugo ruherereye mu Karere ka Nyamasheke mu Murenge wa Shangi, Kandt, yaje kuruvamo ajya kuba i Kigali mu 1907, ubwo yagirwaga Rezida w’u Rwanda.

Kuwa 7-10 Kanama 2019, Umunyamakuru wa IGIHE kimwe n’abafite ibigo bifasha ba mukerarugendo mu Rwanda, basuye ahahoze urugo rwa Kandt, mu rugendo rugamije gutangiza inzira nshya y’ubukerarugendo bushingiye ku muco n’amateka.

Uru rugendo ikigo gishinzwe Ingoro z’Umurage w’u Rwanda n’Umushinga w’Abadage wita ku iterambere (GIZ) byabageneye, rwabumburiwe no gusura inkima zo mu birunga Kandt yakozeho ubushakashatsi, rukomereza i Shangi aho yabanje gutura.

Uretse ibyo bikorwa bishushanya urugendo rwa Kandt, banasuye ibindi bice nyaburanga byabyazwa umusaruro n’abafasha abakerarugendo birimo ahahoze urugo rw’Umwami Kigeli IV Rwabugiri, ingoro y’ibidukikije i Karongi, ubukerarugendo bushingiye ku burobyi n’ibindi.

Aho i Shangi uyu munsi wahagereranya n’itongo rya Richard Kandt kuko uretse kuba kwinjiramo bigoranye, n’iyo nzu bivugwa ko yahubatse utayihabona uretse ibisigazwa by’amateka yayo birimo ibiti by’imbuto, ikawa n’ibindi by’imitako byahatewe mu gihe cy’Abakoloni.

Kugera kuri uru rugo uturutse ku muhanda wa Kaburimbo mu Murenge wa Ruharambuga mu gasanteri ka Shangazi, uhabona icyapa kikuyoborayo kikugargariza ko kuhagera ugenda kilometero 10.3.

Winjirira mu muhanda w’igitaka ubona ukoze neza ariko uko ugenda usatira aho iyi nzu yari yubatse niko ugera ku bice bidakoze neza. Ku marembo hari icyapa cyashyizweho n’Ikigo gishinzwe ingoro z’igihugu, kigaragaza ko ari kamwe mu duce tubitse amateka dushobora gusurwa n’abakerarugendo.

Ukihagera ubona hameze nko mu ishyamba ritarimo ibiti byinshi ariko ibirimo bikuze cyane, bikikijwe n’urugo rufite amarembo yubakishije imbaho ariko rufite akaryango gato gahora gafunze, bigaragara ko hinjirwa na nyiraho cyangwa undi wabanje kubisabira uburenganzira. Ntabwo imodoka wabona uko uyigezamo.

Urakomanga ugategereza ko abasore bahakora baza kukubaza ikikugenza bakaguha uburenganzira bwo kujyamo, bivuze ko hari n’ubwo bashobora kubukwima bitewe n’impamvu runaka.

Ukinjira, imbere harimo agahanda gafite nka metero ebyiri gakikijwe n’ibiti by’imikindo bivugwa ko byatewe ku ngoma y’Abakoloni. Ugenda nka metero 50 ukagera ku nzu zimaze igihe zubatswe mu 1930, mu gihe u Rwanda rwagenzurwaga n’Ababiligi ariko bigaragara ko mu gihe cyazo zari mu zigezweho.

Haruguru yazo aho bivugwa ko Kandt yari yarubatse iyo nzu y’ibyatsi harisanzuye nta kintu giteyemo uretse ibyatsi cyimeza. Gusa hari uruhande ubonamo ikawa bigaragara ko zatewe cyera ariko zidakoreye.

Hepfo y’izo nzu ziteye irangi ry’umweru ridaheruka kuvugurwa n’amabati y’ubururu ashaje zirimo na sima, hari umwanya mugari ukikijwe n’ibiti by’inganzamarumbo. Kubera ibimera birimo n’indabo zizikikije bihari, hahora hahereye.

Hirya gato, ka gahanda kinjiramo gakikijwe n’imikindo karakomeza kugera ku mazi y’ikiyaga cya Kivu, harimo urugendo nk’urwa metero 800, bivuga ko yari inzira Kandt n’abandi bahabaye banyuragamo bagiye cyangwa bavuye mu bwato.

Izo nzu iriho imitako itandukanya ifoto ya Richard Kandt, ay’umwami Yuhi V. Musinga ari kumwe n’umwe mu Badage bari mu Rwanda icyo gihe n’andi asobanura bimwe mu bikorwa byahabere.

Ubwo butaka bubarizwamo iryo tongo uyu munsi ntabwo burajya mu maboko ya Leta, ni ah’umuzungu witwa Sett Manfred, Umudage wo mu muryango wa Dr Richard wamuzunguye, ndetse aza kuhagura na Leta mu 1989.

Mu itongo ry’aho Kandt yabaga uyu munsi ntabwo inzu y’ibyatsi yabagamo wayihabona. Ni isambu nini bivugwa ho yarengaga hegitari 10 izitije ibiti by’ubwoko butandukanye birimo ibimaze imyaka isaga 100.

Dr Kandt yubatse iyi nzu y’ibyatsi iherereye i Shangi, ruguru gato y’ikiyaga cya Kivu ku wa 24 Werurwe 1899, nyuma yo kuvumbura isoko y’uruzi rwa Nile, mu ishyamba rya Nyungwe.

Igicumbi cy’ubushakashatsi

Umushakashatsi mu kigo cy’igihugu cy’ingoro z’Umurage, Mugabowagahunde Maurice, yavuze ko muri uru rugo ariho Kandt yakoreraga ubushakashatsi butandukanye.

Yasobanuye ko ariho yicaraga agakubira mu nyandiko ibintu bitandukanye yabonye bishya birimo ibijyanye n’isoko y’uruzi rwa Nil yabonye mu ishyamba rya Nyungwe, ishusho y’ikiyaga cya Kivu yashushanyije nyuma yo kukizenguruka n’amaguru n’ibindi.

Mugabowagahunde ati “Ubushashatsi bwose yabukoraga ataha hano kugera igihe bamugiriye umuyobozi w’umujyi wa Kigali mu 1907, ajya kubayo.”

Yahakiriye abamisiyoneri bahasomera misa ya mbere

Mugabowagahunde yavuze ko Abamisiyoneri binjiye bwa mbere mu Rwanda baturutse i Bujumbura mu Burundi, bakagirwa inama yo kubanza kwiyegereza Richard Kandt wari uhamenyereye.

Ati “Abamisiyoneri ba mbere baza baturutse i Bujumbura mu Burundi, bayobowe na Musenyeri Joseph Hirth bamubwiye ko kugira ngo ahite ajya kureba umwami agomba kubanza kuvugana na Kandt wari uhamenyereye, akamubwira uko yabyitwaramo.”

Muri icyo gihe Musenyeri Joseph Hirth yari ategereje kugirwa inama na Kandt, we na bagenzi be b’abamisiyoneri basomeye misa ya mbere i Shangi mu rugo rwa Kandt, yitabiriwe n’abaturage bacye.

Nyuma Kandt yaje kubagira inama yo kujya gutura i Save muri Butare, hafi y’umwami.

Imishyikirano yo kwambura ubutaka u Rwanda

Ubwo u Bubiligi bwakolonizaga Congo, u Rwanda rugakolonizwa n’u Budage, mu myaka ya 1900 impande zombi zagiraga igihe zihura zikaganira ku buryo bwo kwigabanya ubutaka.

Mugabowagahunde ati “Habereye imishyikirano ikomeye yamaze igihe hagati y’Abadage n’Ababiligi bari muri Congo. Nyuma yaho Ababiligi baje kongera gushaka ko umupaka wimuka, ukava aho u Rwanda rugabanira na Congo, ugaca muri Nyungwe iki gice [Cya Cyangugu] kikajya muri Congo, Richard Kandt arabyanga.”

Mugabowagahunde yavuze ko mu nyandiko zitandukanye Kandt yanditse, zisobanura ko yanze ko umupaka wimuka kuko yari agifite impungenge z’uko azabwira Umwami Musinga, ukuntu ibindi bice nko ku Idjwi byagiye ku ruhande rwa Congo.

Umuyobozi w’Ingoro z’Umurage w’u Rwanda, Amb Robert Masozera, yavuze ko kumenyekanisha ubukerarugendo bushingiye ku rugendo rwa Kandt ‘atari ugushyigikira ibyo yakoze kuko atari byiza ahubwo aho yageze ari ahantu heza habyazwa umusaruro no kwagura ubukerarugendo bukarenga gushingira ku ngagi na Pariki’.

Agace bivugwa ko kahozemo inzu y'ibyatsi Kandt yabagamo
Bimwe mu bimera biri mu bigize ingoro y'ibidukikije
Hakingishwa iminyururu ariko hari n'icyuma bahondaho kugira ngo baze kugukingurira
Hari ikawa zihahinze bigaragara ko zimaze igihe kirekire
Hateye ibiti by'indabo nziza
Ibiti birimo byatewe mu myaka 100 ishize
Ingoro y'ibidukikije igizwe n'inyaswa zumishijwe
Inzira ijya mu rugo ikikijwe n'imikindo
Inzu zihari bigaragara ko ari iza cyera
Inzu zihasigaye zubatswe ku bw'Ababiligi
Inzu zirimo ni uku ziteye
Iri tsinda ryanasuye ingoro y'ibidukikije i Karongi
Isambu yose bivugwa ko yarengaga hegitari icumi
Itsinda ry'abatuye aho urugo rwa Kigeli rwahoze ririmo kwerekana ubuzima bwa buri munsi bw'ibwami
Kuva mu isanteri ya Shangazi ujyayo harimo 10.3 Km
Nta modoka yemerewe kwinjira muri uru rugo
Ubwo iri tsinda ryasuraga ahahoze urugo rw'Umwami Kigeli IV Rwabugiri
Umuhanda umanuka ujya ku Kivu ukikijwe n'imikindo
Umwe mu basore baba muri urwo rugo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza