Airtel yaguze imigabane yose ya Tigo Rwanda

Yanditswe na Mukaneza M.Ange
Kuya 19 Ukuboza 2017 saa 10:26
Yasuwe :
3 1

Mu rwego rwo kwagura imikorere yayo no gutuma Airtel igira umwanya ukomeye mu itumanaho ry’u Rwanda, Bharti Airtel ibarizwamo Airtel Rwanda yatangaje ko yaguze imigabane yose ya Sosiyete y’Itumanaho ya Tigo Rwanda.

Abakiliya bose ba Tigo Rwanda ibarizwa muri Millicom International Cellular S.A, bagiye kwiyongera ku basaga miliyoni 370 bari ku murongo wa Airtel ikorera mu bihugu 17 ku isi.

Amasezerano yashyizweho umukono tariki 19 Ukuboza 2017, i New Delhi mu Buhinde, avuga ko Airtel Rwanda izegukana 100% by’imigabane yose ya Tigo Rwanda.

Aya masezerano ategereje gushyirwaho umukono n’inzego zibifitiye ububasha, ateganya ko Tigo izagurwa amafaranga yikubye inshuro esheshatu, ayo yinjije ukuyemo inyungu, imisoro, guta agaciro kw’ifaranga ndetse n’ayishyuwe ibindi bintu. Azishyurwa mu gihe cy’imyaka ibiri.

Umuyobozi Mukuru wa Bharti Airtel, Sunil Bharti Mittal, yavuze ko bakomeje gutera intambwe muri Afurika, mu rwego rwo kurushaho kuvugurura imikorere yabo mu bihugu bike usanga ibikorwa byayo bikiri inyuma kubera abakiliya bake, no kuba hari izindi sosiyete z’itumanaho nyinshi zihakorera.

Yagize ati ”Airtel na Tigo byamaze guhuza ibikorwa byazo mu kugira ikigo gikomeye muri Ghana. Uyu munsi yateye indi ntambwe ikomeye yo kwegukana Tigo Rwanda, kugira ngo igire imbaraga ndetse ibashe guhangana ku isoko rigizwe n’ibigo bibiri gusa.”

Yakomeje avuga ko banateganya kuvugurura imikorere mu gihe kirambye muri Kenya na Tanzania, mu rwego rwo guharanira ko mu 2018, ibigo bya Airtel biri mu bihugu 15 bya Afurika bitangira kugira uruhare mu kuzamuka ku nyungu no kubaka izina ry’iki kigo ku mugabane.

Umuyobozi mukuru wa Airtel Africa, Raghunath Mandava, yavuze ko kugura Tigo bizatuma barushaho gushinga imizi ku isoko ry’u Rwanda, aho uretse kuba bizatuma iki kigo kigira umwanya mwiza, ari n’inyungu ku bakiliya n’itumanaho ry’u Rwanda muri rusange.

Sosiyete Mpuzamahanga y’Itumanaho ya Millicom, ifatwa nk’umubyeyi wa Tigo, yasohoye itangazo rigaragagaza ko Tigo Rwanda yamaze kugurwa na Bharti Airtel.

Umuyobozi wa Millicom, Mauricio Ramos, yagize ati “Icyemezo cyo kugurisha Tigo Rwanda kiri muri gahunda yo kwagura imikorere yacu no kunoza imitangire ya serivisi z’itumanaho mu bice byo muri Amerika y’Amajyepfo.”

Yakomeje agira ati “Turashimira Leta y’u Rwanda ku nkunga yaduteye mu gihe cy’imyaka umunani tumaze dukora aho twazamuye imikoreshereze y’ikoranabuhanga mu buzima bw’Abanyarwanda b’ingeri zitandukanye. Turashimira cyane kandi abakozi bacu bagaragaje umuhate watumye Tigo Rwanda iza ku isonga mu bigo bitanga serivisi z’ikoranabuhanga mu gihugu. Twizeye ko Bharti Airtel izubakira ku buhangange bwa Tigo Rwanda igakomeza kunoza serivisi zigenerwa abakiliya.”

Kuva mu myaka ishize, Airtel yagiye ikora ibikorwa bigamije gutuma ishinga imizi, aho yaguze ibigo bya Warid Uganda na Congo, Yu Mobile muri Kenya na Tigo Ghana.

Ibi byatumye abakiliya barushaho kwishimira gukoresha umurongo wagutse, guhamagara na internet ihendutse ndetse no guhererekanya amafaranga bakoresheje Airtel Money.

Airtel ubusanzwe ikorera mu bihugu 15 bya Afurika, ahabarurwa abakiliya bagera kuri miliyoni 83. Ku isi iza ku mwanya wa gatatu mu kugira abafatabuguzi benshi.

Airtel Rwanda ifite icyicaro i Remera mu Mujyi wa Kigali

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza