Minisante igiye kwigisha urubyiruko iby’ubuzima bw’imyororokere ibinyujije kuri telefone

Yanditswe na Evariste Nsengimana
Kuya 14 Ukwakira 2017 saa 09:23
Yasuwe :
0 0

Minisiteri y’Ubuzima yatangaje ko igiye gutangiza uburyo bw’ikoranabuhanga bwo koherereza urubyiruko ruri mu kigero cy’imyaka 16 na 24, ubutumwa bwo kuri telefone buvuga ku buzima bw’imyororokere n’uburyo rwakwirinda indwara zandurira mu mibonano mpuzabitsina.

Ni ubutumwa ku ikubitiro buzoherezwa kuri telefone z’urubyiruko rusaga ibihumbi 100 rwiyandikishije mu cyiciro cya mbere narwo rukazabusangiza bagenzi barwo, Minisante yagiteguye ifatanyije n’Imbuto Foundation.

Batangiza iki gikorwa kuri uyu wa 14 Ukwakira 2017, cyabanjirijwe n’umuganda w’urubyiruko wo gutera ibiti by’intusi bisaga 6200 kuri hegitari enye mu Karere ka Rubavu.

Umunyamabanga wa Leta muri Minisante, ushinzwe Ubuzima Rusange n’Ubuvuzi bw’Ibanze, Dr. Patrick Ndimubanzi, yavuze ko iyi gahunda yo kohereza ubutumwa izafasha urubyiruko kubona amakuru ku buzima.

Yaguze ati “Ni uburyo buzafasha urubyiruko kugira ubumenyi ku buzima bw’imyororokere dukoresha ubutumwa bugufi bunyura kuri telefone zigendanwa. Ni imwe mu ngamba Minisante ifashijwe na Imbuto Foundation n’abandi bafatanyabikorwa ishaka kugira ngo ifashe urubyiruko kugira amakuru n’ubumenyi. Ibi bizarufasha guhitamo neza, kwirinda ibibazo birmo gusama inda zitateguwe n’indwara zandurira mu mibonano mpuzabitsina zirimo na Virusi itera Sida.”

Umuyobozi Mukuru w’Imbuto Foundation, Umutoni Sandrine, yavuze ko ikibazo cy’abakobwa batwara inda zitateganyijwe giterwa no kudatanga ubutumwa bubisobanurira urubyiruko ku gihe.

Yagize ati “Twese hamwe nk’abafatanyabikorwa turimo kugerageza guha urubyiruko ubumenyi n’amakuru ahagije mbere y’uko bahura n’ingaruka zo kutamenya no gusobanukirwa ubuzima bw’imyororokere."

Imibare yashyizwe hanze mu 2016 yagaragaje ko abakobwa basaga ibihumbi 17, batewe inda zitateganijwe.

Gahunda yo kwandika abantu bazajya bohererezwa ubutumwa, icyiciro cya mbere cyanditswe guhera muri Kanama kugeza muri Nzeri, ubu bakaba batangiye kohererezwa ubwo butumwa ndetse hakaba hari gahunda yo kwandika abandi.

Minisante ivuga ko abahawe ubwo butumwa bakwiye kububyaza umusaruro no kubusangiza abandi kugira ngo bugere kuri benshi.

Dr. Patrick Ndimubanzi yavuze ko iyi gahunda yo kohereza ubutumwa kuri telefone z'urubyiruko izarufasha kubona amakuru ahagije ku buzima
Umuganda wo gutera ibiti witabiriwe n'abiganjemo abakibyiruka bari bayobowe na Minisitiri w’Urubyiruko, Rosemary Mbabazi
Abitabiriye umuganda berekeza aho bateye ibiti 6200
Minisitiri w’Urubyiruko, Rosemary Mbabazi, atera igiti
Ingabo z'igihugu na zo zatanze umusanzu wazo mu gutera ibiti by'intusi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza