RBC yakajije ingamba zo guhangana na Malaria yiganje mu Majyepfo n’i Burasirazuba

Yanditswe na Prudence Kwizera
Kuya 10 Kanama 2019 saa 08:21
Yasuwe :
0 0

Ikigo cy’Igihugu cy’Ubuzima, RBC, cyatangaje ko cyakajije ingamba mu guhashya indwara ya Malaria kandi igenda igabanyuka mu gihugu, ibipimo bikaba byerekana ko yiganje mu Ntara y’i Burasirazuba no mu Majyepfo.

Byavuzwe kuri uyu wa Gatanu ubwo RBC yatangizaga ibikorwa byo gukumira no kurwanya malaria mu Karere ka Gisagara ko mu Ntara y’Amajyepfo.

Umuyobozi Mukuru wa RBC, Dr Nsanzimana Sabin, yavuze ko batangiye gukumira malaria kuko ibihe by’imvura byegereje kandi ari bwo imibu iyitera ikunze kuba ari myinshi.

Yasobanuye ko bari kwibanda mu turere two mu Ntara y’Amajyepfo n’i Burasirazuba kuko ari ho yibasiye cyane.

Ati “Malaria iri mu Rwanda 80% iri mu Ntara y’Amajyepfo n’i Burasirazuba, ni yo mpamvu twaje hano kugira ngo tujye inama y’uko twayihashya ntikomeze gutwara ubuzima bw’abantu.”

Umuyobozi ushinzwe Porogaramu y’Igihugu yo kurwanya Malaria muri RBC, Dr Mbituyumuremyi Aimable, yavuze ko ingamba zitandukanye zashyizweho mu guhashya malaria zatumye igabanyuka mu myaka itatu ishize.
Ati “Dufashe nk’igihe Malaria yazamutse bikabije muri 2016 tukagereranya n’uyu mwaka tubona ko yagabanyutseho abantu hafi miliyoni imwe muri iyi myaka ibiri ishize.”

Ibipimo byagaragajwe byerekana ko uturere twa Gisagara, Huye na Nyanza ari two twibasiwe mu Ntara y’Amajyepfo naho mu Burasirazuba ni twose.

Muri utwo turere hafashwe ingamba zihariye zo gutera imiti yica imibu mu nzu z’abaturage.

Izi ngamba zunganira izindi zisanzwe zirimo gutema ibihuru biri hafi y’ingo, gusiba ibidendezi by’amazi, kurara mu nzitiramibu n’izindi.

Bamwe mu baturage bo mu Karere ka Gisagara bagaragaje ko bamaze gusobanukirwa ingamba zo kurwanya malaria kandi basigaye bazikurikiza ari yo mpamvu badaheruka kuyirwara cyangwa kuyirwaza cyane nka mbere.

Ahishakiye Marie wo mu Murenge wa Mamba ati “Mbere wasangaga turi gukinga inzu tukihisha ngo bataduterera imiti ariko ubu twamenye ibyiza byayo turemera bakayitera. Turara mu nzitiramibu kandi tukarwanya ibihuru n’ibidendezi hafi y’ingo zacu.”

Mu Karere ka Gisagara abantu basuzumwe bagasangwamo malaria mu mwaka ushize bagera ku 114 554.

Abaturage bo mu Karere ka Gisagara bagaragaje ko bamaze gusobanukirwa ingamba zo kurwanya malaria kandi bazikurikiza
Guverineri w'Intara y'Amajyepfo, CG Gasana Emmanuel, yasabye abaturage kongera imbaraga mu kurwanya malaria bubahiriza amabwiriza yashyizweho
Hamuritswe amavuta umuntu yisiga ntarumwe n'imibu itera malaria
Ubukangurambaga ku kurwanya Malaria bwitabiriwe n'urubyiruko rw'abanyeshuri
Muri ubwo bukangurambaga hahembwe umwana w'umunyeshuri wabashije gusubiza neza ko umubu wica abantu benshi ku isi
Umuyobozi Mukuru wa RBC, Dr Nsanzimana Sabin, yavuze ko batangiye gukumira malaria kuko ibihe by’imvura byegereje
Umuyobozi wungirije ushinzwe iterambere ry'ubukungu mu Karere ka Gisagara, Hanganimana Jean Paul

p[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza