U Rwanda ruhagaze rute mu guhangana n’igituntu gishobora kwibasira abagera kuri 60%?

Yanditswe na Evariste Nsengimana
Kuya 9 Mutarama 2019 saa 09:48
Yasuwe :
0 0

Imibare y’abarwaye n’abicwa n’igituntu mu Rwanda igenda igabanuka gusa Minisiteri y’Ubuzima itangaza ko ari indwara ikwiriye gushyirirwaho ingamba zihariye kubera ubukana bwayo kuko abari hagati ya 20-60% bashobora kuba bafite udukoko tugitera.

Ishami ry’Umuryango w’Abibumbye ryita ku Buzima (OMS) rivuga ko ari indwara y’ibihaha iterwa n’agakoko kitwa ‘bacille de Koch’ yandurira mu mwuka igihe uyirwaye akoroye cyangwa yitsamuye, utwo dukoko tujya mu kirere umuntu wese uhumetse uwo mwuka ashobora kuyandura.

OMS yatangaje ko mu 2017 abantu basaga miliyoni 10 bari barwaye igituntu harimo abagabo miliyoni 5,8 abagore miliyoni 3,2 n’abana miliyoni imwe. Gusa 64% nibo cyagaragayeho. Bivuze ko 36% kitababagaragayeho. Icyo gihe miliyoni 1,3 cyarabishe.

Buri minsi nibura igituntu cyica abantu 4384 nyamara mu bakirwaye, 78% ntibivuza kandi ari indwara ivurwa igakira. Isi itanga amadolari asaga miliyoni ibihumbi 16,7 ku mwaka mu kwita ku bakirwaye.

Mu Rwanda bimeze gute?

Mu 2018, OMS yatangaje ko abanyarwanda 57 ku bihumbi 100, (hafi 6900) bari barwaye igituntu mu gihe umwaka wawubanjirije bari 64 ku bihumbi 100 (7 680). Bivuze ko bagabanutseho hafi 700.

Mu myaka itanu ishize, abakirwaye bagabanutseho nibura 8% buri mwaka. Ibi bitanga icyizere gikomeye ko bikomeje uko, u Rwanda rwazesa umuhigo rwihaye mu ntego z’iterambere rirambye (2030) ko ruzaba rwagabanyije 80% by’abakirwaye.

Uretse igananuka ry’abakirwaye, umubare w’abo cyica ugenda ugabanuka. Mu 2018, OMS yatangaje ko abanyarwanda bishwe n’igituntu bari 4,9 ku bihumbi 100 (hafi 580) mu gihe umwaka wawubanjirije bari 6,2 ku bihumbi 100 (hafi 740). Bivuze ko bagabanutseho abantu nibura 60.

Mu kiganiro IGIHE yagiranye n’Umuyobozi w’ ishami rishinzwe igituntu mu kigo cy’Igihugu gishinzwe Ubuzima, Dr. Migambi Patrick, yavuze ko ‘nubwo indwara y’igituntu igenda igabanuka mu Rwanda, hakenewe imbaraga zidasanzwe kuko yandurira mu mwuka’.

Ati “Igihe cyose tuzaba dufite abarwayi ntibivurize ku gihe, bazakomeza kuyanduza abandi bantu.”

Iryo gabanuka ryatewe n’ingamba Leta yagiye ishyiraho mu rwego rw’ubuzima n’ahandi. Ubu mu bigo nderabuzima, ibitaro by’Uturere n’iby’icyitegererezo mu gihugu hatangirwa serivisi yo gusuzuma no kuvura igituntu, hari ibikoresho, imiti n’abakozi babifitiye ubushobozi.

Dr. Migambi ati “Ni ukuvuga mu myaka yose tumaze ntitwigeze tubura umuti w’igituntu n’ibifasha ngo bagipime. Noneho tumaze n’imyaka isaga itatu tuzanye ikindi gipimo gifite imbaraga gishobora kugaragaza umuntu urwaye igituntu, ubu kiri mu bitaro byose by’Uturere no mu bigo nderabuzima bimwe hano mu Mujyi wa Kigali.”

Uretse ibyo kandi mu Rwanda habarurwa abajyanama b’ubuzima barenge ibihumbi 45. Ni bamwe mu bafatiye runini urwego rw’ubuzima mu kwita no guha imiti abarwaye indwara zitandukanye zirimo n’igituntu. Ku gituntu, bishimangirwa n’uko abasaga 90% by’abafata imiti neza bagikira.

Igabanuka kandi rigirwamo uruhare n’izamuka ry’igipimo cy’imibereho myiza y’abanyarwanda. Iyo abantu bafite imibereho myiza bizamura n’ubudahangarwa bw’umubiri mu guhangana n’indwara zandura.

Dr Migambi ati “Kuko buriya indwara y’igituntu ushobora gusanga abantu hafi ya twese dushobora kuba twarayanduye ariko tutaragaragaza ibimenyetso, noneho igihe ubudahangarwa bugenda bugabanuka mu muburi, ni naho utwo dukoko twa ‘Bacille de koch’ dukora ku muburi, umuntu agatangira kugaragaza ibimenyetso.”

Icyuho mu bisuzumisha igituntu

Minisante yo igaragaza ko mu mwaka ushize, hari abakirwaye 5755 mu gihe OMS yagaragaje ko hari 6 900. Bivuze ko hari umubare w’abanyarwanda Minisante itabasha kumenya bitewe n’impamvu zitandukanye zirimo kutisuzumisha.

Dr. Migambi ati “Ni nayo mpamvu dukangurira abantu kugira ngo uwaba afite ibimenyetso runaka birimo gukorora, inkorora imaze ibyumweru bibiri ko yakwegera amavuriro bakamupima bakareba niba adafite igituntu.”

Igituntu ni umutwaro kuri Leta

Kwita ku barwaye igituntu bitwara amafaranga menshi yababa agura imiti, ahemba abakozi n’ayubaka ibikorwa remezo byo kubafasha.

Kugeza ubu, kwisuzumisha igituntu mu Rwanda ni ubuntu, ugize ibyago bakakimusangana n’imiti ayihabwa ku buntu ariko iba yaguzwe n’abaganga bamwitaho ukwezi kurashira bagahembwa.

Minisante ivuga ko gupima igituntu, bitwara amafaranga agera ku 9000Frw hakoreshejwe uburyo bushya bwitwa ‘GeneXpert’ ariko hatabariwemo igihembo cy’umuganga, umwanya bitwara, ibikoresho byifashishwa n’ibindi.

Umuntu umwe ufata imiti y’igituntu gisanzwe, afata imiti igihe cy’amezi atandatu. Nibura buri kwezi akenera ifite agaciro k’ibihumbi 22 Frw.

Umurwayi w’icy’igikatu kimusaba gufata imiti igihe cy’amezi hagati y’icyenda na 22. Nibura buri kwezi hakoreshwa amadolari 1500 ku muntu uyifata amezi atarenga icyenda, yarenga hagakoreshwa nibura amadolari 4400.

Aba banakenera kwitabwaho byihariye. Kuri ubu mu Rwanda bajyanwa ku bitaro bya Kabutare na Kibagabaga. Icyo gihe bapimwa igikororwa buri kwezi harebwa niba badashobora kwanduza abandi, bagahabwa ibiribwa n’ibindi batishyurwa igihe cy’amezi agera kuri atatu.

Dr. Migambi ati “Turebye amafaranga dukoreshamo (ku barwaye icy’igikatu) mfashe imiti, ibyo bakoresha gupima, bifata amafaranga arenga ¼ cy’ayo dukoresha ku gituntu kandi dufite abarwayi batarenga 100. Igituntu cy’igikatu nitwe tugitera kubera ko turwara igisanzwe ntidufate imiti neza.”

Muri rusange, buri mwaka Leta ikoresha miliyoni 8$(hafi miliyari 7,5Frw) muri gahunda zo kurwanya igituntu zirimo imishahari y’abakozi, amahugurwa, kugura ibipimo, kwita ku bikoresho, gukurikirana abarwayi n’ibindi.

Abanyarwanda basabwa iki?

Dr. Migambi yavuze ko ikibazo kiri ku batazi uko bahagaze kuko ukirwaye atarisuzumisha akomeza kugikwirakwiza, akabasaba kwihutira kwipimisha no gufata imiti vuba kandi neza.

Ati “Umuntu wese waba afite inkorora irengeje ibyumweru bibiri, ntavuge ngo ni ibicurane cyangwa atangire gukeka ibyo arwaye, ajye kwa muganga bamupime, bareba niba koko atarwaye igituntu.”

Uretse inkorora, umuntu ashobora no kuba nta kibazo afite ariko agatangira kunanuka, kunanirwa kurya, gukorora akazana amaraso mu gikororwa; akwiye kwihutira kujya kwa muganga.

Abafata imiti basabwa gukurikira inama bagirwa zo kuyifata buri munsi kandi badasibye, kuba ahantu hafunguye umuyaga ugera neza ku buryo aho akororeye udukoko tucyanduza tutafata undi muntu uhaje, kurya ibiryo bikungahaye intungamubiri n’ibindi.

Umuburo ku banyarwanda

Dr Migambi yavuze ko abavuga ko barwaye igituntu ari abantu baba bamaze kugaragaza ibimenyetso ariko mu Rwanda no mu bihugu bikiri mu nzira y’amajyambere muri rusange, usanga abafite ibimenyetso byacyo ari benshi.

Ati “Hagati y’abantu 20 na 60% by’abanyarwanda bashobora kuba bafite utwo dukoko mu mubiri ariko icyiza ni uko mu bantu bandura indwara y’igituntu, 80% bashobora kubaho ubuzima bwabo bwose batagaragaje iyo ndwara.”

Gusa igiteye inkeke ni uko muri Afurika, nta bushobozi buhari bwo kuvura abantu bafite igituntu bataragaragaza ibimenyetso byacyo. Minisante igira inama abantu yo kutacyitiranya n’amarozi bakihutira kwivuza.

Abakunze kugaragaza iyi ndwara ni bacye barimo abafite Virus ya sida, kanseri, abafite ibibazo by’imirire mibi, abageze mu zabukuru n’abandi.

Isuzuma ryakozwe mu 2014 ku bisigazwa by’umubiri w’umunya-Peru wari ukirwaye, ryerekanye ko gishobora kuba cyarabayeho mu myaka isaga 6000 ishize ariko ku wa 24 Werurwe 1882 nibwo Dr. Robert Koch yavumbuye agakoko kagitera, uhita unagirwa umunsi mpuzamahanga wo kukirwanya.

Igitutu ni indwara ivurwa igakira ariko benshi mu bayirwaye batinda kwisuzumisha

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza