Inzobere zo mu bitaro bikomeye mu Buhinde zizasuzumira Abanyarwanda kanseri n’umutima i Kigali

Yanditswe na Iradukunda Samson
Kuya 27 Ugushyingo 2018 saa 07:12
Yasuwe :
0 0

Inzobere mu buvuzi ziturutse mu Bitaro Mpuzamahanga bya Medanta mu Buhinde, zizasuzuma Abanyarwanda indwara ya kanseri, umutima ndetse n’imtsi kugira ngo bamenye uko bahagaze babe banakwivuza uburwayi butarakomera.

Ni igikorwa kizakorwa guhera kuri uyu wa Kane, tariki ya 29 kugeza ku ya mbere Ukuboza 2018, aho Abanyarwanda babyifuza bazasuzumwa indwara z’umutima, amagufwa, ubwonko, imitsi ndetse na kanseri, zimwe mu ndwara zugarije abatuye Isi muri iyi minsi.

Ni mu gikorwa cyateguwe n’Ibitaro Mpuzamahanga bya Medanta bikorera mu Buhinde ku bufatanye na Global Healthcare Network, Umuryango Nyarwanda uhagarariye ibi bitaro mu Rwanda.

Nkuko Karojo Olivier, Umuyobozi wa Global Healthcare Network yabibwiye IGIHE, iki gikorwa kizabera mu Mujyi wa Kigali kuri La Polyclinique La Medicale ahazwi nko kwa Kanimba, hasuzumwa abasanzwe bafite ikibazo cy’uburwayi ndetse n’abashaka kumenya uko bahagaze ngo babone kugirwa inama z’uko bakwitwara, nibiba ngomwa babe bakwandikirwa imiti bashobora kwifashisha.

Uzakorerwa iri suzuma wese n’inzobere zo mu Buhinde azasabwa 5000 Frw, nibiba ngombwa ko hagira imiti yandikirwa ayigurire ahazabera iri suzuma, aho kwa Kanimba.

Karojo yagize ati “Abantu bazacishwa mu byuma kugira ngo bamenye uko imitima yabo itera n’uko ihagaze muri rusange. Abasanzwe biyiziho izi ndwara, kanseri, umutima ndetse n’iz’amagufwa nk’uruti rw’umugongo, umutwe udakira n’izindi nabo bazabasha kumenya uko bahagaze maze bagirwe inama z’icyo bakora.”

Yashishikarije abantu kuza kwisuzumisha ari benshi kuko imwe mu mpamvu zituma indwara zizahaza abantu ari uko bajya kuzivuza bagasanga zararengeranye mu gihe bashoboraga kuzivuza zigakira zitarakomera. Yatangaga urugero kuri kanseri.

Ibitaro bya Medanta bizohereza izi nzobere eshatu bifatwa nk’ibitaro bikomeye kurusha ibindi mu gihugu cy’u Buhinde gisanwe kizwiho kuba cyarateye imbere cyane mu buvuzi. Medanta nta mwihariko w’indwara bizwiho kuko bivura indwara zose nyuma yo gushingwa n’inzobere mu buvuzi bw’indwara z’umutima Dr. Naresh Trehan mu 2009.

Umwe muri aba baganga b’inzobere azakora amasuzuma kuri kanseri zose mu gihe undi muganga azita ku bibazo by’imitsi, ubwonko, umugongo ndetse n’amagufwa naho undi we azasuzuma anite ku bibazo by’indwara y’umutima.

Global Healthcare Network yatangiye gukorera mu Rwanda guhera mu 2017 ikaba ikorana by’umwihariko n’ibitaro bya Medanta, ibihuza n’abarwayi bo mu Rwanda baba boherejwe muri ibi bitaro mu gihe uburwayi bwabo bwananiranye mu Rwanda.

Karojo avuga ko kuva iki kigo cyatangira gukorana n’ibi bitaro bya Medanta, Abanyarwanda bagera ku ijana bamaze koherezwa muri ibyo bitaro mu buryo boroherejwemo cyane na Global Healthcare Network.

Abenshi boherejwe muri ibi bitaro bakaba barivuzaga indwara y’umutima, izifite aho zihuriye n’ubwonko, kanseri, impyiko ndetse n’umwijima.

Nkuko Karojo abivuga, Global Heathcare Network ikora kandi nk’ikigo gicuruza amatike y’indege kikorohereza by’umwihario abarwayi bagana mu bitaro byo mu Buhinde kubona amavuriro.

Ati “Ibitaro bya Medanta ni akarusho ku Banyarwanda bajya kwivuriza mu Buhinde kuko biherereye hafi cyane y’Ikibuga cy’Indege Mpuzamahanga cya New Delhi, ku buryo bitagora na mba ugezeyo agiye kwivuza.”

Ibitaro bya Medanta bikorana bya hafi na Ambasade y’u Rwanda mu Buhinde dore ko uvuye aho bikorera kugeza ku cyicaro cy’iyo ambasade ari iminota 15 gusa mu modoka.

Kubera uku gukorana, Umunyarwanda wese wivurije muri ibi bitaro agabanyirizwa 15% kuri buri serivisi aherewe mu Bitaro bya Medanta, byaba ibizamini akorerwaho ndetse n’ubuvuzi ahabwa nkuko Karojo akomeza abivuga.

Global Healthcare Network ihagarariye Ibitaro bya Medanta mu Rwanda, aho inafite ibiro bikorera mu Mujyi wa Kigali ku Kimihurura mu nyubako izwi nko kwa Polisi Dennis. Inahagarariye ibi bitaro muri Uganda, u Burundi na Repubulika Iharanira Demokarasi ya Kongo nubwo nta biro yari yahagira.

Global Healthcare Network ihagarariye Ibitaro bya Medanta mu Rwanda ikorera mu nyubako yo kwa Polisi Dennis
Karojo Olivier, Umuyobozi wa Global Healthcare Network ihagarariye Ibitaro bya Medanta mu Rwanda
Abaganga b'inzobere ba Medanta

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza