Tumenye mburugu, indwara ishobora gucagagura zimwe mu ngingo z’umuntu

Yanditswe na David Eugène Marshall
Kuya 31 Ukwakira 2018 saa 03:37
Yasuwe :
0 0

Mburugu ni indwara iterwa n’agakoko kitwa ‘Treponema Pallidum’, uwayanduye ayihereza undi mu maraso mu gihe bakoze imibonano mpuzabitsina idakingiye cyangwa umubyeyi utwite akayanduza umwana.

Ni indwara izahaza umuntu, ibimenyetso byayo bigaragara bitinze hagati y’iminsi 10 na 120.

Itangira ari agasebe kamwe, uyirwaye akagira amasazi mu iyasha cyangwa mu ruhande rw’igitsina ako agasebe gaherereyemo.

Inzobere mu buvuzi bw’indwara z’uruhu n’izifata mu myanya ndangagitsina muri CHUK, Dr Amani Uwajeni Alice, yabwiye IGIHE ko mburugu ari indwara mbi, kandi uko gutinda kugaragaza ibimenyetso ku wayanduye kuzengereza uyifite.

Mu gihe igeze ku rwego rwo hejuru ishobora guteza uyirwaye gutakaza zimwe mu ngingo z’umubiri we, kuzana ibibara umubiri wose, gutoboka kw’igisenge cy’akanwa, gushirira kw’amenyo, gutamuka iminwa, gupfuka imisatsi, kuzana ibibara mu kirenge no mu kiganza n’ahandi.

Ku bijyanye n’ibimenyetso mpuruza byayo, Dr Uwajeni, yagize ati “Ibamo ibyiciro bitandukanye bitewe n’ikigero uyifite agezeho. Icyiciro cya mbere gihera ku minsi 10 kugeza ku minsi 90 cyangwa 120 hagati aho. Ni ha handi umurwayi aba afite agasebe kamwe hafi y’igitsina kandi katamurya, ndetse n’amasazi.”

“Ikindi cyiciro gishobora no kugeza ku myaka itatu ariko bya bisebe biba byinshi, bigafata ishinya, mu bworo bw’ikirenge no mu kiganza hakavuvuka. Umubiri wose ukazana ibibara, byiyongera no ku gupfuka imisatsi.”

Gusa ngo hari aho umubiri ugera ugatangira kwirwanaho, ariko ngo nta kindi bitanga kitari ugusinziriza ubu burwayi, bukazagera ku rwego rushegesha imikoreree y’ubwonko, imitsi igafatwa ku buryo umuntu aba ‘paralyse’.

Kuri uru rwego mburugu ishobora guca zimwe mu ngingo z’umubiri hazirimo n’imyanya ndangagitsina, ahanini kubera ibisebe biba byigabije umubiri w’uyirwaye.

Dr Uwajeni yavuze ko abarwaye iyi ndwara bakunze kwivuza bakererewe kubera ipfunwe.

Yakomeje agira ati “Urwaye mburugu bamutuma uwayimwanduje cyangwa ku bashakanye bakazana bombi. Nabyo biri mu bituma abaza kwivuza bakererwa, kandi nta uvura izi ndwara aba agomba kuvura aho zaturutse hose.”

Abagore bagirwa inama yo kwipimisha mu gihe batwite, gusa ngo ikibazo ni uko bamwe bipimisha mu mezi abanza y’inda, bakirengagiza ko igihe icyo aricyo cyose bashobora kuyandura cyangwa kuyanduza uwo batwite cyangwa yonsa.

Ibi kandi bijyanye n’uko abana bavukana mburugu bagirwaho ingaruka zikomeye n’ubu burwayi.

Dr Uwajeni avuga ko 60% by’ababyeyi batwite barwaye mburugu, abana batwite bagirwaho ingaruka n’ubu burwayi zirimo gupfa n’inda zivamo.

Mu gihe umugore cyangwa umukobwa yibonyeho amaraso ku myenda y’imbere atari mu mihango kandi azi ko yakoze imibonano mpuzabitsina idakingiye, aba akwiye kwihutira kujya kwa muganga.

Kwihutira kujya kwa muganga yaba ku bagabo cyangwa abagore ni imwe mu nama ikomeye abafite ibimenyetso by’iy’indwara bahabwa.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza