Uganda yagaragayemo icyorezo cya Marburg gisa na Ebola

Yanditswe na Evariste Nsengimana
Kuya 21 Ukwakira 2017 saa 12:40
Yasuwe :
0 0

Minisiteri y’Ubuzima yo muri Uganda yatangaje ko umugore w’imyaka 50 wo mu karere ka Kween mu Burasirazuba bw’igihugu, yishwe n’icyorezo cya virusi ya ‘Marburg’ yo mu bwoko bumwe na Ebola.

Iyi virusi ifata abantu n’inyamaswa, igira ibimenyetso bimwe n’ibya Ebola nko kuvirirana amaraso ahari umwenge ku mubiri, kuruka amaraso, kuribwa umutwe, guhinda umuriro, kubabara umubiri wose n’ibindi, yakunze kwibasira byinshi mu bihugu byo muri Afurika y’Uburengerazuba mu 2014.

Ku wa kane w’iki cyumweru nibwo Minisiteri y’ubuzima yatangaje ko uwo mugore wo yaguye mu bitaro biherereye mu Burasirazuba bw’igihugu kuwa 11 Ukwakira 2017.

Minisitiri w’ubuzima, Jane Ruth Aceng, yatangaje ko umuntu wa mbere uheruka kugaragaza ibimenyetso by’iyi ndwara muri Nzeri, ari umugabo w’imyaka 42, uheruka gupfa, yari umuhigi mu gace gakunze kugaragaramo uducurama, bimwe mu binyabuzima bikunze kwibasirwa n’iyi ndwara.

Jane Ruth yatangaje ko hari itsinda ry’abaganga ryoherejwe muri ako karere gutanga ubufasha bujyanye no gusuzuma abafite ibimenyetso byayo, anasaba abagigaragaza kwihutira kubegera.

Umuvugizi w’Umuryango w’Abibumbye wita ku buzima (OMS), Christian Lindmeier, yatangarije Reuters ko wohereje muri Uganda itsinda ry’abaganga gusuzuma abafite ibimenyetso byayo no gutanga ubundi bufasha bukenewe mu gukumira icyo cyorezo cya Marburg.

Si ubwa mbere icyorezo cya Marburg na Ebola bigeze muri Uganda kuko no mu 2000 abantu basaga 425 bagaragaje ibimenyetso bya Ebola, ½ cyabo bitabye Imana.

OMS itangaza ko 80% by’abarwayi b’icyo cyorezo bagaragaye mu bihugu by’Afurika birimo Repubulika Iharanira Demokarasi ya Congo, cyane cyane mu myaka ya 1998 -2000 no muri Angola mu 2005.

Virusi ya Marburg, nta muti cyangwa urukingo igira, yahawe iri zina bitewe n’uko bwa mbere yavumbuwe mu mujyi witwa Marburg mu Budage mu 1967, iza kugenda ikwirakwira mu bindi bihugu kugera no muri Uganda.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza