Inkomoko y’Insigamugani “Ntihasigaye n’uwa kirazira”

Yanditswe na Nsanzabera Jean de Dieu
Kuya 9 Nzeri 2019 saa 08:30
Yasuwe :
0 0

Uyu mugani bawuca babonye umuryango washize umazwe n’indwara y’icyorezo cyangwa se watanzwe na nyiri igihugu, ukarimbuka ntiharokoke n’uw’indamyi, nibwo bavuga ngo “Ntihasigaye n’uwa kirazira”.

Wakomotse kuri Kidamage cya Rugaju rwa Mutimbo, mu rwimo rwa Rwogera ahagana mu mwaka w’i 1800.

Mbere y’urwimo rwa Rwogera, se Gahindiro yari afite umutoni we w’akadasohoka witwa Rugaju; bari barareranywe ari abana barakundana bigera mu busore n’ubukwerere n’ubujigija rucyomekanye.

Gahindiro yari yaramutonesheje cyane, ariko ubutoni bwe ntibwaturutse ku babyeyi cyangwa ku bakunzi ngo babe baramusohoje ibwami, cyangwa se ngo na we abe yarijyanye gukeza Gahindiro. Oya! Ahubwo byaturutse ku mugisha we gusa ; nuko hanyuma waje kuba nka wa wundi wa rugurumira, ibye n’abe bigashirira gishike.

Se wa Rugaju, Mutimbo yari umushumba w’inka z’ibwami zitwaga ingeyo, ariko atari we mutahira wazo, yari umushumba utazwi. Bukeye ibwami batumiza ingeyo n’izindi nyambo kumurikwa mu birori byo gukura Gicurasi. Ingeyo zirimurika n’abashumba bazo, abakomeye n’aboroheje batazwi abo Mutimbo akababamo ; ajyana nabo.

Umuhungu we Rugaju abakurikiye, Mutimbo aramwirukana ku bw’indagu bari baramuraguriye nyina akimutwite. Bari baramuraguriye ko umwana uzavuka muri iyo nda bazamwica kugira ngo ejo atabatera igisare. Ariko Rugaju amaze kuvuka nyina aramwimana, amushegaho kugeza igihe bamureka. Gusa amaze gukura baramwandarika kugira ngo azabe intamenyekana he kugira umutware umuhaka cyangwa undi wamusohoza ibwami.

Nuko rero Ingeyo zigenda zigana ibwami, zikarenga Rugaju ahinguka. Akomeza kuzoma mu nyuma, na we Mutimbo ntakabimenye akibwira ko yasubiye imuhira. Zigeze ibwami batangira kuzimurika baziteza urugamba. Rugaju aba arahageze azijyamo. Mutimbo amukubise amaso araca.

Ubwo inyambo zose zamurikirwaga umugabekazi Nyirayuhi Nyiramongi, we ntazirebe ahubwo akirebera umwana uzirimo ; Rugaju. Haciyeho akanya Gahindiro arahaguruka ajya mu nka arahamusanga batangira kwikinira. Abatware babibonye baraseka ; bati “Nimurebe namwe umwami umurikirwa inyambo”. Bavuga ko ari umwana. Bamaze kuzimurika zirikubura zirataha.

Rugaju azigendamo, Gahindiro asigara ahagaze mu rubuga. Abakuru bamwe bati “Ese uriya mwana aragira ibiki? Abandi, bati “Data se ngo yakaba umwami nta bwana afite!”. Igihe bakibiseka Gahindiro araturika ararira. Bamubajije ikimuriza, ati “Ndashaka wa mwana twari kumwe”.

Bohereza abantu bajya kumugarura. Ntibari bazi izina rye. Baramuzana, bamugejeje aho Gahindiro arahora. Baricara baraganira, bigeze mu matarama abaheza baraheza ; baheza abatware n’abahungu hasigara abiru, Rugaju bagiye kumujyana, Gahindiro yongera kurira. Bamurekera aho bituma aba umwiru atyo ; adahawe igihango. Akurana na Gahindiro, aratona cyane kugeza igihe agabaniye akatsi k’epfo n’ako haruguru y’inzira. Ni ukuvuga ko ari we wari uwa kabiri kuri Gahindiro.

Bukeye Gahindiro aratanga, abanzi ba Rugaju baboneraho bamutamika igihugu bavuga ko ari we waroze Gahindiro. Bihinduka impamo. Nyiramavugo Nyiramongi nyina wa Rwogera aramutanga baramwica n’umuryango we wose. Hasigara umukokwa we witwaga Kidamage wari wararongowe mu Basinga b’Abahabwa. Ibwami babimenye na we baramutumira. Ahageze Nyiramongi aramutanga.

Yari atwite inda y’uburiza. Abiru n’abakuru bati “Kirazira nta mwami utanga umugore utwite” bati “Ahubwo agwa mu gitero”. Nyiramongi aranga, ati “Na Semukanya yatanze atwite, nimurebe uwo yasize uko angana!”. Ubwo yavugaga Gahindiro yapfuye akiri muto, agasiga umwami w’umwana.

Nuko Nyiramavugo aba aziruye ibizira, arenga umuziro atanga umugore utwite ari we Kidamage bakurikije umuryango we. Rubanda rero babibonye batyo, bati “Noneho kwa Rugaju harazimye ntihasiraga n’uwa kirazira”.

Inkuru ikwira u Rwanda muri iyo mvugo yahindutse umugani baca, bagira ngo “Ntihasigaye n’uwa kirazira”.. Bakawuca babonye umuryango woretswe n’indwara y’icyorezo cyangwa warimbuwe na nyir’igihugu ntihasigare n’uw’indamyi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza