Minisitiri w’Umuco na Siporo yahaye umukoro abanditsi Nyarwanda

Yanditswe na Philbert Girinema
Kuya 19 Gashyantare 2016 saa 07:48
Yasuwe :
0 0

Inteko Nyarwanda y’Ururimi n’Umuco yateguye imurika ry’ibitabo by’Ikinyarwanda ryitabiriwe n’abanditsi n’abahanzi batandukanye basuwe na Minisitiri w’Umuco na Siporo, Uwacu Julienne.

Ari hamwe na bamwe mu bayobozi muri Minisiteri n’abo mu Nteko y’Ururimi n’Umuco, Minisitiri Uwacu yasuye buri bihangano by’abahanzi n’abanditsi birabiriye iryo murika.

Muri rusange wabonaga ashima ibikorwa byabo ndetse n’umuhate ariko abasaba kongera no kugira bimwe na bimwe bavugurura mu buhanzi bwabo.

Yababwiye ko hakenewe ko bandika ibitabo byinshi mu rurimi rw’Ikinyarwanda, ariko bitanga inyigisho zigamije kubaka.

Abanditsi basabwe gukusanya ibitabo bitandukanye birimo n’ibya kera bigahurizwa ahantu hamwe ku buryo ubishaka yabibona bitamugoye.

Imbere y’ibitabo byamurikwaga n’umwanditsi Bizimungu de Gonzague, Minisitiri Uwacu yagize ati “ Ni byiza ko mubishaka mukabihuriza ahantu hamwe, ubishaka akaba yabisoma, nk’igitabo cy’indyoheshabirayi umuntu yagisanga he?”

Indyoheshabirayi yanditse na Musenyeri Alexis Kagame ni kimwe mu bitabo byigwaga mu mashuri abanza n’ayisumbuye ariko bigoranye kubona ubu ndetse n’icyitwa ‘Inganji Kalinga’.

Yashimye umusanzu w’Inzu y’Ibitabo ya Editions Bakame kubera ibitabo bitandukanye bijyanye n’Umuco Nyarwanda n’inyigisho zirimo, kuko bifasha benshi nk’uko yabisobanuriwe na Ukundamaliya Agnes, umwe mu bashinze Editions Bakame, wagaragaje uburyo barimo gukorana n’urubyiruko rw’abanditsi bitanga icyizere ko Ikinyarwanda n’ubuhanzi bitazazima.

Umuhanzi Nsanzabera Jean de Dieu yasobanuriye Minisitiri Uwacu ko amaze kwandika ibitabo 66 mu Rurimi rw’Ikinyarwanda, kandi akaba ari n’umushakashatsi. Minisitiri Uwacu yashimye umusanzu we ariko anamusaba gukomeza kwandika ku mateka yo ku Rwanda rwo muri iki gihe, nyuma y’igitabo ku mateka y’u Rwanda yanditse kuva muri 300 kugera muri 1990.

Yabagiriye inama yo gusanisha imvugo za kera n’iz’ubu urugero ni ahavugwa ‘abasazi, ibumuga, abatumva n’impumyi bigomba gusanishwa n’imvugo zisigaye zikoreshwa.

Minisitiri Uwacu yanashimye Grace Rwanda Society, umuryango w’Abanyarwanda baba muri Canada baje gufasha Abanyarwanda cyane abana gukangukira umuco wo gusoma ururimi kavukire.

Umuyobozi wawo Elizabeth Mujawamariya yamusobanuriye ibikorwa bakora byo kugeza ibitabo ku bana b’u Rwanda aho bamaze gutanga ibitabo bisaga ibihumbi 20, mu mashuri yo mu Rwanda n’ababasura byanditse mu Kinyarwanda no mu Cyongereza.

Minisitiri Uwacu yashimye kandi abahanzi n’abandi bose bamurika ibijyanye n’umuco Nyarwanda , abasaba gukomeza gukora byinshi bijyanye n’insanganyamatsiko y’Umunsi Mpuzamahanga w’Ururimi Kavukire wizihizwa tariki ya 21 Gashyantare, iy’uyu mwaka ikaba igira iti “Ikinyarwanda kinoze, ishingiro ry’Uburere n’Ubumenyi”.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza