Inkomoko y’Insigamugani ‘Yagaruye ubuyanja’

Yanditswe na Nsanzabera Jean de Dieu
Kuya 6 Ukuboza 2018 saa 08:49
Yasuwe :
0 0

Uyu mugani bawucira ku muntu warwaye akamererwa nabi cyangwa uwazironzwe n’umukeno. Abo bombi ari ukize iyo ndwara y’ubujyahabi ari n’ukiranutse n’ubukene, iyo bazahutse bakabyibuha, uwo babonye baravuga ngo ‘Yagaruye ubuyanja’.

Byavuzwe n’abagombozi bo ku Musamo mu Nduga; ahasaga umwaka wa 1300.

Icyo gihe, Ruganzu Bwimba yari amaze gutabara bucengeri i Gisaka, u Rwanda rutegekwa na Cyenge cya Nyacyesa. Atabara umugore we Nyakiyaga cya Ndiga atwite inda nto. Akajya agenda bisha na bisha arindiriye ko umugore yaruhuka. Ibiri amahire abyara umuhungu Bwimba akiri mu nzira.

Ruganzu amaze kubimenya yambika umuhigo awicamo ingwe. Uruhu arwoherereza Cyenge n’Abiru ho ingobyi y’umwana; anabatumaho ngo umwana we bazamwite Rugwe, naho iry’ubwami azaryitwe n’abiru.

Arongera ati “Kandi umwana wanjye ntimuzamuhe ubwami ni we uzabwiha”. Akomeza urugendo aratabara aza kugwa i Gisaka.

Umugore we ahungurwa n’umugabo wabo Mwendo. Umwana amaze kugimbuka, Mwendo amugirira ishyari byo kurwanira ingoma mu bwenge, amuroga inzoka iramuzingamisha aba urutaza.

Rugwe rero akomeza kurwara, rubanda bakuka umutima bavuga ko u Rwanda rugiye kurara nze (kubura umutegetsi). Ubwo Mwendo akirya icyara yibwira ko agiye kuba umwami w’u Rwanda.

Bukeye abiru bashaka abavura Rugwe; bababona i Musambira ku murenge witwa Rwimpyisi hafi ya Kambyeyi, nyuma waje guhinduka Kabungo, ikibyibushye gihozagaye (impogazi).

N’uko abo bavuzi bishingira kuvura Rugwe, baratangira baramurutsa; bamurutsa inzoka. Bamaze kumuvura bagororerwa umusozi witwa Musamo aho mu Nduga; bawuturaho kugeza magingo aya bakiwutuye.

Rugwe rero bamaze kumurutsa inzoka baramwondora arakira aba umusore; batuma i bwami, bati “Rugwe yagaruye ubuyanja aguwe neza, muraze mumujyane”.

Ubwo ava ku Musamo agaruka iwabo i Gasabo mu Bwanacyambwe. Rubanda bagumiriza guhwihwisa bavuga ko yarozwe na Mwendo, Mwendo amaze kubyumva ashya ubwoba aracika; acikira i Bugesera.

Nuko Rugwe akomeza kumererwa neza, ndetse atangira guhiga. Atora abahigi benshi b’urungano rwe: ab’imbwa n’ab’umuheto. Ubwo u Rwanda rwari rugifitwe na Cyenge.

Haciyeho iminsi abahigi ba Rugwe bajya guhigana n’abandi i Karama ka Kigali. Umuhigi umwe arasa impongo inkumbi; undi umuri hafi aramutoya (gusonga icyanegekaye). Impaka zirabyuka baza kuburanira Cyenge. Umwe ati “Ni jye wayirashe”. Undi nawe akavuga atyo; rubura gica.

Rugwe agumya kumva uko Cyenge n’Abatware bavuga bananiwe guca urubanza. Ahagarara hagati yabo ati “Mbese ibwami hagira ababurana gusa hakabura abaca imanza? Ati “Aba bagabo bahaburana ntibahize bonyine, none nibazane uwari uhari abakize”.

Rugwe amaze kuvuga atyo, abari aho bose baramushima bati “Koko umwana yagaruye ubuyanja ubwenge ni bwose”. Abiru babyumvise bibuka isezerano rya Ruganzu wasize avuze ngo “Kandi ntimuzampere umwana ubwami kuko ari we uzabwiha”.

Ubwo baba babonye ikimenyetso cy’uko abwihaye; bategura imihango yo kumwimika baramwimika; arima yitwa Cyilima.

Nuko Abiru bamaze kumwimika, rya jambo ry’abagombozi bo ku Musamo ngo “Umwana yagaruye ubuyanja” batangira ubwo kurikuririza, riza guhinduka umugani bacira ku muntu babonye amaze gukira ubuzahare bw’indwara cyangwa bw’umukeno.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza