Ibibazo byabajijwe Umubyeyi wa Kagame mbere y’uko yigendera

Yanditswe na Pacifique Munezero
Kuya 23 Ukwakira 2020 saa 05:57
Yasuwe :
0 0

Kera nkigera aho ibirori bibera hari icyo nakundaga. Nakundaga ba bahungu bajyaga bamenya gushyushya intore barimo Murayire wari Meya wa Kirehe, Abdallah wari Meya wa Nyanza cyangwa Habitegeko Meya w’ubu wa Nyaruguru uzwi ku kazina k’akabyiniriro ka Umuremure mu bareshya akaba umugufi muri bose. Hirya y’aba kandi habaga hari Balikana na Gatabazi bahitaga bakongeza maze igitaramo cy’igitondo kikinikiza.

Abo bose bashyushyaga intore zikaririmba ariko byagera aho Kagame yinjiye zigahanika ijwi ngo ‘’Mawe karambe, mawe karambe mama we umugongo waguhetse uragahoraho.” Maze ibyari igitaramo bikaba umutingito muto. Uwabaga ari aho wese yaratwarwaga guhisha amarangamutima bikananirana. Byabaye rimwe, biba kabiri, ubwa gatatu Kagame ubwe abacyaha yitonze ati maze mujye muririmba RPF njye mube mundetse. Byari ukuri kandi kuko uko tumuzi ntazindurwa n’ikuzo cyangwa ngo arye ruswa y’ibisigo. Ndetse n’abamusingije bagasarara iyo byagezaga aho abaryoza amakosa yasyaga atanzitse! Ni kimwe mu biranga kamere yihariye ya Kagame.

Umunyapolotiki Musa Fazil yigeze kugira atya atwereka uburyo Kagame adasanzwe ndetse ko yari akwiye kubona umwanya mu mateka yacu. Icyo gihe Fazil yashishikarije ashikamye (adakina) abayoboke ba FPR ko batangira kumwita Baba wa Taifa (umubyeyi w’igihugu). Bamwe bati haracyari kare nibwo agitangira amateka tutabimwita ejo akadutenguha. Abandi bati Fazil agaruye bimwe byo kwa Habyarimana byo kwita Umukuru w’Igihugu umubyeyi. Ndetse abandi bati ntimwishinge sungura y’umuswayire (Bakame) buriya aricinyira inkoro!

Umubyeyi wa Perezida Paul Kagame, Asteria Rutagambwa, yitabye Imana kuwa 22 Ugushyingo 2015 mu bitaro byitiriwe Umwami Faisal azize uburwayi

Tugaruke kuri wa mugongo wamuhetse

Hagati aho Mugongo wamuhetse yarigendeye. Mugongo wamuhetse yaragiye ndetse nagira nti yarangendanye kuko mbere yo kugenda kwe ari ntako ntagize ngo mugereho mwibarize ibibazo bike ku mavu n’amavuko ya Kagame yahekeye u Rwanda. Ariko igena yabigennye ukundi agenda atansubije.

Cyakora iyo mubona nari kumubaza uko amutwite yari amerewe, nari kumubaza icyo yari yaratwariye amutwite. Nari kumubaza niba yarabyariye igihe se cyangwa yarasaguje nk’Abagesera n’ubwo we yari umwega.

Nari kumubaza niba uko yibuka inda yamubyaye yari ituje cyangwa yari ya nda ikuraza rwa ntambi. Yari kumbwira niba yaravukanye amenyo nka Binego bya Nyirakajumba cyangwa yarayameze nyuma. Yari kumbwira niba yarayamereye igihe, yari no kumbwira niba yarakambakambye cyangwa yarahagurutse akagenda adakambakambye nk’uko ibyo byose biba kuri ba bana badasanzwe.

Ibi bibazo mbyibaza nkomeje kuko ntawibwanagiza ku myaka nk’iyanjye kandi ubusanzwe nkaba ntagira ibikabyo. Simvuga ko Kagame ari impanga ya Yesu nka ba bakecuru ba Nyaruguru kuko ku bwanjye hariya baratwawe bararengera. Ariko ku mpamvu eshatu ngiye gusobanura impamvu iyi tariki y’amavuko ye ari umunsi dukwiye kuzirikana no kwibutsa abato icyo usobanura.

Iyi foto yafashwe mu Ugushyingo 1957, uhereye ibumoso: Mzee Mutembe ubyara Kagame muri Batisimu, uteruye umwana ni Agnes Bezinge nyina muri Batisimu mu gihe abandi ari umubyeyi we Asteria Rutagambwa na Gatarina Bushayija wari inshuti y'umuryango

Ntibimugira impanga ya Yesu

1. Kagame wavutse mu bikomerezwa n’ibikomangoma by’ibwami, ubuzima bw’ubuhunzi bwaramwanitse buramwanura, arasonza, arasuzugurwa ndetse agera aho yakwiheba nka benshi muri twe mu buzima twarimo. Ariko ntiyayobotse mayirungi, urumogi cyangwa Kanyanga nk’uko byabaye kuri bamwe b’urungano rwacu rw’ibyo bihe.

Se umubyara amaze gutabaruka, Mugongo wamuhetse yamubereye malayika murinzi maze mu nzitane z’ibibazo avanamo guhora ashakira ibibazo ibisubizo, avanamo imbaraga no kwiyemeza no kutavirira. Yabivomyemo kudasuzugurwa, kudasuna no kudasubira ari yo mpamvu iteka ashyirwa icyo yiyemeje akigezeho.

Yavanyemo igitsure gihora kirwanya akavuyo, umwanda, ruswa, agasuzuguro, ubusinzi n’akarengane. Nemeranya n’uwigeze kuvuga ati ntawakubwira inzoga akunda ngo umenye iyo umutura. Njye ndongeraho ko ntawe numvise avuga ko yaraye inkera kwa Kagame cyangwa ngo agoroberezeyo cyangwa ahataramire. Ntibimugira impanga ya Yesu ariko tariki ya 23 Ukwakira 1957 havutse umunyarwanda w’Inyangamugayo kandi wubatse Ubunyangamugayo.

Ku muntu uzi Kagame azi neza yumva ko adashobora kubaha abantu nka Gaddafi, Mobutu kimwe n’abandi bishyira imbere bo ubwabo kuruta ibihugu byabo n’abo bayoboye.Kuri iyi foto yo hejuru ntako atagize ngo amwubahe, kubera protocole yamusuje yunamyeho gato ariko igicucucu cye nureba neza ku ifoto cyo cyaravuze ngo wapi gisigara gihagaze bwuma!

2. Umuntu umwe mu badakunda Kagame yigeze kumbaza mu bintu byinshi nemera, kumubwiramo kimwe gusa kizira icya kabiri nemera kurusha ibindi. Ati uzi ko uwakumva yagira ngo wararanye na Rudasingwa. Ubivuze neza neza nk’uko Rudasingwa yabimbwiye. Mu gihe ngitengurwa no gutekereza kimwe na Rudasingwa ati reka nkumare amatsiko.

Ati “Umunsi umwe nigeze kubaza Rudasingwa nti sinshaka ko umbwira impamvu wanga Kagame kuko ndazikurusha. Ndashaka ko ahubwo ubanza ukansobanurira ikintu kimwe cye ukunda kuko nta kuntu haba nta kintu kimwe nibura cyiza yaba afite ngo abashe kuyobora ba dogiteri, jenerali na injenyeri. Banza umbwire ni gute koko wowe ubwawe wabashije kwemera ko akuyobora iyo myaka yose niba nta cyiza agira.”

Mu gusubiza, Rudasingwa nawe ati “Kagame ndamuzi mu bihe byose nabaye muri kiriya gihugu mbere y’uko tugifata na nyuma yaho kugeza mpunze. Ndamuzi ndi Umunyamabanga Mukuru wa FPR nkanamumenya nyobora ibiro bye muri Perezidansi. Tuvugishije ukuri rero kimwe cyo ndakikubwira ni na cyo cyonyine kandi aturusha twese. Twese iyo tuva tukagera ariko. Kagame ubuzima bwe ni igihugu. Abyuka atekereza ibyo ari bukore, yirirwa kuri telefoni akurikirana, asoma imishinga yose n’inyandiko nkuru z’igihugu, ibiri mu nteko arabireba, ibiri mu gisoda, ibiri mu nzego z’ibanze, raporo za ba maneko, inyandiko z’abandi bakuru b’igihugu, ibiri kuri twitter. Ibyo kandi nkubwira ni kuva ku wa Mbere kugeza ku Cyumweru. Iyo yicuye arakora, iyo ari mu ngendo arakora igihe cyo gusabana kuri we ni gike cyane. Kagame ntahuga, akurikira byose nta kimucika ni nacyo aturusha twese.”

Uwambwiraga iyo nkuru ngo yahise amukora mu ntoki ati “umbwiye ikintu nari naratekereje: mu gihe tujya impaka dushwanira imyanya mu mashyaka, duhimba buri munsi aba apanga kudufata mpiri, aba yubaka igisirikare kandi akomeza kwigarurira imitima y’ abanyarwanda.”Tariki ya 23 Ukwakira havutse umunyarwanda ukunda umurimo, wubatse ubuyobozi bukorera abaturage, bukemura ibibazo kandi bwumva neza ko politiki ari uguhindura imibereho y’abanyarwanda.

3. Kagame wo kwa Rutagambwa mu batutsi b’i Bunyogombe bwa Ruhango yahunze ahetswe, agenda nta mpamba, agenda acitse icumu akurikirwa n’inkongi. Agarutse nta n’itongo yabonye. Ntiyagarutse ngo atikize ab’aho aturuka. Kagame yarwanye asimbuka imirambo y’abo mu bwoko bumwe nawe ariko ntiyimika ihora kuko yahunze ari umututsi atsinda ari Inkotanyi aruyobora ari Umunyarwanda. Ubu bushishozi yagize ni wo muzi ukomeye ingoma ye yicayeho uyu munsi, ni nawo muhigo u Rwanda ruhigurira amahanga bigatuma rwubahwa. Ntiyize amategeko ariko aca imanza nka Salomoni. Ntiyize ubuhinzi cyangwa ubukungu ariko twamwumvise kenshi yunganira cyangwa akosora intiti nka Kanimba cyangwa Kalibata. Ntiyize ubumenyi mu bya politiki cyangwa imibanire n’ amahanga ariko ni we wakanguye Afurika mu kubona ko Umuryango Mpuzamahanga (International Community) ntawubaho ari Balinga kandi ko ubucamanza mpuzamahanga (International Justice) ari igikoresho. Akunzwe cyane n’urubyiruko rwa Afurika kubera kubwiza ukuri bagenzi be bayobora ibihugu uburyo bagambanira ibihugu byabo no kurwigisha ko Afurika izakizwa n’ubufatanye itazakizwa n’inkunga. Tariki ya 23 Ukwakira havutse umunyarwanda wuje ubwenge n’ubushishozi kandi ureba kure.

Mu gusoza

Tariki ya 23 Ukwakira 1957 mu Rwanda havutse umwana uwiteka yarinze ngo amuhe inshingano yo kuvana u Rwanda aho rwari ruri habi kandi yongere arugire ruzima. Urugendo ruracyari rurerure, ikivi kiracyari kinini ntaho arageza ariko uyu ni umunsi wo gushima Imana ko tukimufite kandi ikaba ikimubitsemo imbaraga zituma tumubyaza umusaruro.

Ntihakenewe ko yitwa amazina adasanzwe cyangwa ngo yambikwe imidali imuca ibikanu. Si ngombwa ko aba Maréchal nka Mobutu wa Zayire nka Deby Itno wa Tchad, ngo yitwe Guide nka Gaddafi na Nkurunziza cyangwa Baba wa Taifa nka Nyerere. Wa mugani we kumuririmba bizagira igihe cyabyo!

Kagame si impamga ya Yesu ariko ni umuyobozi w’imbonekarimwe akaba amahirwe ku Rwanda ku buryo ivuka rye rikwiye kuzirikanwa no kwibukwa. Kagame ntarinjira mu mateka ariko umuryango wayo arawukozaho imitwe y’intoki, igisigaye tuzakigarukaho mu nyandiko itaha.

Hagati aha ariko Isabukuru nziza Kagame wacu, Uwiteka aguhezagire. Abarucira ba Mukase nabo babe bihanganye batange agahenge mu gihe tugihuha buji. Nibura batumye turushaho kumva ko kumugira ari akarusho dushobora kutazahorana. Kuko wa mugani ngo uwambaye ikirezi atamenya ko cyera.

Mu kwizihiza iyi sabukuru ngire icyo nisabira Kagame wacu: “Ntuzahinduke.”

Pacifique Munezero

Gasabo-Kigali


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .